Roma 15 - U Maganda A Baheta Ni Jesu-Cristo

Atádden ti Kasayaan u Kapareho a Tolay Bakán la a u Sadile

¹ Hikitam a mágkabegsák ti pánnampalataya ay dapat a tumulung tu kákkapatkákka hide a mágkahina ti pánnampalataya. Bakán la a u sadile tam a kapiyyaan u dapat tam a isipán,

² nan u ikaganda be nu agum, tánni mapabegsák be u pánnampalataya de.

³ Maskin ti Cristo ay awan naghangad tu sadile na kapiyyaan, nan ayun tu Kasulatan, “Hikán u timmanggap tu atanan a seste de niko, Panginoon.”

⁴ U atanan a nesulat tu Kasulatan tu itod pa a panahun ay nesulat para tolduwan na kitam. Sakay tu pamamag-itan nu Kasulatan ay magin matatag kitam tu pánniwala sakay magkahod kitam ti pag-asa.

⁵ Nakwa u Diyos a mangpatatag sakay mangpabegsk tu pánnampalataya tam u tumulung nikam a mabiyag a te, págkaka-essa bilang tagasunud hide ni Cristo Jesus.

⁶ Tánni konna hod ay pisan-pisan kam a magpure tu Diyos sakay Ama nu Panginoon tam a ti Jesu-Cristo.

U Maganda a Baheta tu Hentil hide

⁷ Tanggapán moy u balang essa konna tu pángtanggap ni Cristo nikam tánni mapure nu tolay u Diyos.

⁸ Dipo kagiyán ko nikam a pinaangay nu Diyos ti Cristo ti lutaáy para magserbi tu Judio hide sakay para mepeta na a tapat u Diyos tu pángtupad na tu pananto na hide tu ninuno de hide.

⁹ Inutusan be ti Cristo tánni mepeta na u kagbi nu Diyos tu bakán hide a Judio, tánni puriyán di be u Diyos. Ayun ngane tu Kasulatan, “Puriyán taka kaguman u awan hide Judio sakay puriyán taka tu kansiyon ko.”

¹⁰ Sakay kinagi na pa tu Kasulatan, “Hikam a bakán hide a Judio, mákpagsaya kam tu tolay hide a date a pinile nu Diyos.”

¹¹ Sakay kinagi na pa, “Hikam a atanan a bakán hide a Judio, puriyán moy u Panginoon. Atanan a tolay ay magpure nikuna.”

¹² Kinagi be ni Isaias, “Tem meenak tu lahe ni Jesse para maghare tu bakán hide a Judio, siya u asaan de.”

¹³ Nakwa u Diyos a mangatád nikitam ti pag-asa ay siya u mangatád nikam ti kasayaan sakay kapayapaan dipo tu pánnampalataya moy nikuna, tánni tulos-tulos a lumagu u pag-asa moy tu pamamag-itan nu Banal a Ispirito.

U Tungkulin ni Pablo

¹⁴ Kákkapatkákka ko hide, maniwalaák a talaga a tunay kam ti kabaitan, te sapat a tukoy sakay marunung a magpaala-alaan tu balang essa.

¹⁵ Pero nagsulaták pade tungkul tu bagay hide a dapat a ipaalaala nikam, dipo impagkaluub nu Diyos nikán

¹⁶ a magin utusanák ni Jesu-Cristo para tu bakán hide a Judio. Magserbiyák tu bakán hide a Judio a konna tu essa a saserdote sakay impangaral nide u Maganda a Baheta nu Diyos. Gimitán ko iye tánni magin alay hide a katanggap-tanggap tu Diyos, a nelaan nikuna tu pamamag-itan nu Banal a Ispirito.

¹⁷ Sakay bilang tagapagserbi ni Jesu-Cristo, mepagmadakál ko u nagimet ko hide para tu Diyos.

¹⁸ Sakay u ipagmadakál ko a iye ay awan ti iba ni awan u ginimet ni Cristo tu pamamag-itan ko, a naakit ko u bakán hide a Judio a sumunud tu Diyos tu pamamag-itan nu toldu ko hide sakay tu gimet ko hide.

¹⁹ Sakay tu pamamag-itan nu makataka-taka hide a bagay tu kapangyariyan nu Banal a Ispirito. Kanya nebaheta ko u Maganda a Baheta tungkul ni Cristo sapul ti Jerusalem hanggan ti Ilirico.

²⁰ U pinakagugusto ko ay mepangaral u Maganda Baheta tu lugar hide a awan palla nepangaral ti Cristo tánni awanák makapangaral tu lugar a tehhod dán a tarabaho a sinapulan nu iba.

²¹ Kinagi na tu Kasulatan, “Matenggi siya nu awan palla hide nakagiyan tungkul nikuna, sakay makaintendi u awan palla hide nakasaneg tungkul nikuna.”

U Plano ni Pablo a Umangay Bumisita ti Roma

²² U pángngaral ko tu lugar hide heeh u dahilan ni bakin hanggan nadid ay awanák palla makademát hina nikam.

²³ Pero nadid tapus dán u tarabaho ko hide heeh, sakay dipo nalay ku dán a gusto a umangay hina,

²⁴ asaan ko a mamágketa-keta kitam nadid. Tamuwák hina káangay ko ti Ispanya. Sakay tukoy ko a magin masayaák tu pamagketa tam maskin sabadit la a panahun. Asaan ko be a matulunganák moy tu káangay ko ti Ispanya kággábwat ko hina.

²⁵ Pero nadid, kailangan ko pa umangay ti Jerusalem tánni iyangay ko u tulung tu kákkapatkákka hod.

²⁶ Dipo masoh u kákkapatkákka hide ti Macedonia sakay Acaya a magkulekta ti tulung para tu mágkahirap hide a kákkapatkákka ti Jerusalem.

²⁷ Masaya hide a nangatád, sakay dapat la dipo kumán hide a te utang tu Judio hide. Dipo u Hentil hide ay nakabahagi tu págpapala a ispiritwal nu Judio hide, marapat be a tulungan u Judio hide tu pamamag-itan nu págpapala de a pangpilas.

²⁸ Pákkeangay ko tu nakagi a tulung tu kákkapatkákka hide ti Jerusalem, maglakadák a tamo hina nikam baguwák a angay ti Ispanya.

²⁹ Maniwalaák a káddemát ko hina nikam, ay tawed ko u makpal a págpapala para nikam a gábwat ni Cristo.

³⁰ Kanya mákkekagbiyák nikam, kákkapatkákka ko hide, alang-alang tu Panginoon a Jesu-Cristo sakay tu págmahal a gábwat tu Banal a Ispirito, tulungannák moy tu panalangin moy.

³¹ Ipagdasalák moy a maligtasák tu awan hide mánampalataya ti Judea, sakay masaya a tanggapán nu kákkapatkákka ti Jerusalem u tawed ko a tulung para nide.

³² Tánni konna hod, masayaák a makademát hina nikam ni kaluuben nu Diyos, sakay makaimang hina nikam.

³³ Tulungan kam nakwa nu Diyos a mangatád ti kapayapaan. Amen.