Roma 14 - U Maganda A Baheta Ni Jesu-Cristo

Dyan moy Hatulan u Kapatkákka moy

¹ Nadid, tanggapán moy u kapatkákka moy a mahina ti pánnampalataya sakay dyan kam mákpagtalo tu pánniwala na hide.

² Halimbawa, tehhod a tolay a maniwala a atanan a pagkain ay maare a kanán. Tehhod be a mahina ti pánnampalataya sakay para nikuna, atong la u dapat a kanán.

³ Awan dapat a sestiyán nu tolay a kuman ti maskin ánya, u tolay a atong la u kanán na. Sakay dyan hatulan nu kuman la ti atong u kuman ti maskin ánya. Dipo hide a duwwa ay pareho la a tanggapán nu Diyos.

⁴ Ti deya ka a manghatul tu utusan nu iba? U amo na la u makapanghatul nikuna ni tama u gággimitán na oni awan. Sakay magimet na u tama, dipo u Panginoon u mangtulung nikuna.

⁵ Tehhod a tolay a mángisip a mas mahalaga u essa a aldew kasera tu iba. Te tolay be a pare-pareho la u atanan a aldew para nikuna. U balang essa ay magdisisiyon tu sadile tungkul ti bagayan ina.

⁶ U tolay a tehhod a pahalagaan a aldew ay pinahalagaan na iye para tu Panginoon. Sakay u tolay be a kuman ti maski ni ánya ay gimitán na iye para tu Panginoon, dipo pasalamatan na u Diyos para tu kanán na. U awan be kuman tu iba a kalase nu pagkain ay gimitán na iye para tu Panginoon sakay magpasalamat be siya tu Diyos.

⁷ Awan ti essa nikitam a mabiyag oni matay tu sadile na la.

⁸ Ni hikitam ay mabiyag ay mabiyag kitam para tu Panginoon, sakay ni matay kitam, matay kitam para tu Panginoon. Kanya mabiyag kitam man oni matay ay he kitam tu Panginoon.

⁹ Iye u dahilan ni bakin natay sakay nabiyag a huway ti Cristo, tánni magin Panginoon siya nu biyag hide sakay nu patay hide.

¹⁰ Kanya dyan mo hatulan oni sestiyán u kapatkákka mo ni Cristo. Dipo hikitam a atanan ay umatubang tu Diyos, sakay siya u manghatul ni u ginimet tam ay maganda oni madukás.

¹¹ Dipo nesulat a, “Hikán u Diyos a biyag magpakahanggan, sakay iye u kagiyán ko: U atanan ay lumuhud tu atubang ko, sakay u atanan a tolay ay magpure nikán.”

¹² Kanya atanan tam ay managut tu Diyos tu atanan a ginimet tam.

¹³ Kanya dyan kitamon humatul tu balang essa. Ni awan iwasan tam a maggimet ti ányaman a bagay a magin dahilan nu págkakasala nu kapatkákka tam.

¹⁴ Dipo tu pákpágkaessa ko tu Panginoon Jesus, siguraduwák a talaga a awan ti bawal a makan. Pero ni tu akala nu essa a tolay ay bawal u essa a makan, dapat dyan na kanán.

¹⁵ Ni masakitan u kapatkákka mo dipo tu kákkanán mo, awan dán ayun tu págmahal u gággimitán mo. Dyan mo ipahamak u kapatkákka mo ni Cristo dipo la tu pagkain, dipo natay ti Cristo para be nikuna.

¹⁶ Dyan mo gimitán u ányaman a bagay a imbilang nu iba a madukás maskin para niko ay maganda.

¹⁷ Dipo u kahariyan nu Diyos ay awan tungkul tu pagkain oni áinumán, ni awan tungkul tu matuwid a kákkabiyag, maganda a rilasyon tu balang essa, sakay kasayaan a gábwat tu Banal a Ispirito.

¹⁸ U magserbi ni Cristo tu konna he a paraan ay makasaya tu Diyos sakay igalang siya nu kapareho na.

¹⁹ Kanya pilitán tam a gimitán a palagi u bagay hide a makapangatád ti kapayapaan sakay makapángpatibay tu balang essa.

²⁰ Dyan mo sidaán u pánnampalataya nu agum a inligtas nu Diyos dipo la tu pagkain. Atanan a pagkain ay maare a kanán, pero iye ay madukás ni magkasala u iba dipo tu kákkanán mo.

²¹ Mas maganda pa u dyan kuman ti karne oni uminom ti alak oni maggimet tu bagay hide a makapangatád ti págkakasala nu kapatkákka mo.

²² Kanya ányaman u pánniwala mo ti bagayan iye hide, hiko dálla sakay u Diyos u dapat a makatukoy. Mapalad u tolay a awan gágguluwán nu konsensiya na dipo tu pággimet na tu bagay hide a tukoy na a tama.

²³ Pero u deyaman a kuman a te págduwwa-duwwa ay nagkasala dipo awan ayun tu pánnalig na u gággimitán na. Dipo kasalanan u ányaman a bagay a gimitán tam a awan ayun tu pánniwala tam.