Roma 10 - U Maganda A Baheta Ni Jesu-Cristo

¹ Kákkapatkákka ko hide, u gugusto ko a mangyare sakay u dasal ko tu Diyos ay u kaligtasan nu kalahe ko hide a Judio.

² Hikán dán u makapangpatunay a magsumikap hide para kasayaan hide nu Diyos, pero male u pángngintendi de.

³ Dipo awan de tukoy ni kodya u pángbilang nu Diyos a awan ti kasalanan u essa a tolay. Nagsikap hide a maggimet ti sadile de a pamamaraan, nan sumunud tu pamamaraan nu Diyos.

⁴ Dipo awan de tukoy a ti Cristo u katupaden nu Kautusan. Dipo tu ginimet na, u atanan a manampalataya nikuna ay imbilang nu Diyos a awan ti kasalanan.

U Kaligtasan ay Para tu Atanan

⁵ Konna he u insulat ni Moises tungkul tu pángturing nu Diyos a matuwid u essa a tolay ayun tu Kautusan: “U tolay a mangtupad tu atanan nu Kautusan sakay awan magkasala magpakahanggan ay siya u tumanggap ti biyag a gábwat tu Diyos.”

⁶ Pero bakán a konna hod u gusto a kagiyán nu pángturing nu Diyos tu tolay a matuwid tu pamamag-itan nu pánnampalataya na ni Cristo. Kaya te nesulat a konna he, “Diyan mo kagiyán ti sadile muwe, ‘Ti deya u umangay ti langet?’” (u gusto a kagiyán ni iye ay awan kailangan a te umangay ti langet dipo immogsad dán ti Cristo.)

⁷ Diyan mo be kagiyán a, “Deya beman u umogsad tu lugar nu patay hide. Tánni pasangkayán ti Cristo gábwat tu patay hide.”

⁸ Pero kinagi nu Kasulatan, “U upos nu Diyos ay adene niko, sakay mágyan dán ti puso moye sakay impahayag dán nu labi-labi moy.” (U gusto na a kagiyán ay u upos a impangaral me tungkul tu pánnampalataya.)

⁹ Ni ipahayag mo a ti Jesus ay Panginoon sakay sumampalataya ka ti buo a puso a biniyag siya a huway nu Diyos, ay maligtas ka.

¹⁰ Dipo imbilang nu Diyos a awan ti kasalanan u tolay a sumampalataya nikuna ti buo a puso. Sakay ni ipahayag na a siya ay sumampalataya, maligtas siya.

¹¹ Dipo kinagi na tu Kasulatan, “Ni deyaman u sumampalataya nikuna ay awan mepasanike.”

¹² Awan ti pagkakaiba u Judio hide sakay u Hentil hide. Eessa la u Panginoon nu atanan sakay siya u mangatád tu makpal a pagpapala tu atanan a dumulaw nikuna.

¹³ Dipo kinagi na tu Kasulatan a, “U atanan a umaged tu Diyos ti habag ay hide u kahabagen sakay iligtas na.”

¹⁴ Pero kodya hide a dumulaw ni awan be hide sumampalataya nikuna? Sakay kodya hide a sumampalataya ni awan palla hide nakasaneg tungkul nikuna? Sakay kodya hide a makasaneg ni awan ti mangaral?

¹⁵ Sakay kodya a makapangaral u deyaman ni awan siya inutusan? Ayun tu Kasulatan, “Anya dámben ti ganda a áelingán u pademát hide a magtoldu tu Maganda a Baheta.”

¹⁶ Pero awan atanan ay tummanggap tu Maganda a Baheta. Kinagi ngane ni Isaias, “Panginoon, sasangan la u naniwala tu itáttoldu me hide.”

¹⁷ Kanya sumampalataya la u tolay ni masaneg na u mensahe tungkul ni Cristo. Sakay makasaneg la siya ni tehhod a mangaral tungkul ni Cristo.

¹⁸ Pero u tanung ko, awan palla beman nakasaneg u Israelita hide? Nakasaneg ngane hide! Dipo, te nesulat a konna he, “nasaneg tu atanan a suluk ni munduway u boses de sakay u atanan a kinagi de ay nasaneg tu buo a mundu.”

¹⁹ Iye pa u essa ko a tanung: awan beman nakaintendi u bansa a Israel? Tu itod pa ay tinábbeg dán iye ni Moises: “Paseniyán takam tu bakán hide a Israelita. Paiyamután takam dipo ipeta ko u kagbi ko tu tolay hide a awan makatengge nikán.”

²⁰ Sakay buo a tapang a kinagi ni Isaias: “Netanák nu awan hide mangehyok nikán. Nagpakilalaák tu tolay hide a awan magtanung nikán.”

²¹ Pero tungkul dámman tu Israel, iye u kinagi nu Diyos: “Tu buo a maghapun ay palagiyák a mágdadulawán sakay maguhay tu essa a banuwan a maigát ti pággisipan sakay masássuwayán.”