Pahayag 7 - U Maganda A Baheta Ni Jesu-Cristo

U 144,000 a Tinatakan ti Israel

¹ Káttapos ni iye ay netan ko u áppat a anghel a mágtaknág tu áppat a suluk ni munduway. Pugáddán de u pahás, tánni awan ti bumugso ti lutaáy, tu diget, oni tu ánya man a kayo.

² Sakay naketaák ti essa pa a anghel a naggábwat ti sikatan, tawed na u págmarka nu Diyos a biyag. Pinákhawan na u áppat a anghel a inatádden nu Diyos ti kapangyariyan a mangsida tu luta ay tu diget.

³ Kinagi na, “Dyan moy palla sidaán u luta, u diget, sakay u kakayowan. Mentaras awan tam palla namarkaan u kidáp nu tagapagserbi hide nu Diyos.”

⁴ Sakay nasaneg ko u bilang nu namarkaan-144,000 a gábwat tu sapulo ay ti duwwa a lahe ni Israel:

⁵ tu lahe ni Juda ay 12,000, tu lahe ni Ruben ay 12,000, tu lahe ni Gad ay 12,000,

⁶ tu lahe ni Aser ay 12,000, tu lahe ni Neftali ay 12,000, tu lahe ni Manases ay 12,000,

⁷ tu lahe ni Simeon ay 12,000, tu lahe ni Levi ay 12,000, tu lahe ni Isacar ay 12,000,

⁸ tu lahe ni Zabulon ay 12,000, tu lahe ni Jose ay 12,000, tu lahe ni Benjamin ay 12,000.

U Nagtagumpay hide tu Atanan nu Bansa

⁹ Káttapos ni iye ay netan ko u tunay ti kakpal a tolay a maskin deya ay awan ti makabilang! Gábwat hide tu bawat bansa, lahe, banuwan, sakay bawat upos. Mágtaknág hide tu atubang nu trono sakay nu Tupa, a nakabadu ti mapudew sakay te táttawed a palaspas.

¹⁰ Sakay kinagi de ti mabegsák, “U kaligtasan ay gábwat tu Diyos tam a mággetnod ti trono we, sakay konna bi hod tu Tupa!”

¹¹ Timmaknág u atanan a anghel tu palebut nu trono sakay u tagapangasiwa hide pate u áppat a linalang a biyag. Dummapa hide tu atubang nu trono sakay summamba tu Diyos.

¹² Kinagi de, “Amen! U Diyos tam ay karapat-dapat a puriyán, sambaán, pasalamatan sakay parangalan. Hod nikuna u kadakilaan, karunungan, kapangyariyan, sakay begsák. Puriyán siya hanggan-hanggan! Amen!”

¹³ Tinanungák nu essa tu tagapangasiwa hide, “Deya i nakabaduwe hide ti mapudew, sakay hádya hide a naggábwat?”

¹⁴ Timmábbegák, “Awan ku ben tukoy. Hiko i makatukuyay.” Kaya kinagi na nikán, “Hide u nagtagumpay tu mahigpit a hirap. Mapudew dán nadid u badu de kumán a linabaan tu dige nu Tupa.

¹⁵ Kaya ina i dahilanay ni bakin katoy hide tu atubang nu trono nu Diyos, para magserbi nikuna aldew ay ti gibi tu templo. Sakay u mággetnod tu trono u magalaga nide.

¹⁶ Awan dán hide magala-aláp oni mauwa-uwaw; awan dán hide makagkag tu aldew oni mapase tu ánya man a matindi a init.

¹⁷ Dipo u Tupa a katoy tu bállog nu trono u magin tagapag-alaga de. Iyangay na hide tu bukal a makapangatád ti biyag; sakay pahidán nu Diyos u luwa tu mata de, dipo awan dán ti dahilan para malungkut hide.”