Mateo 9 - U Maganda A Baheta Ni Jesu-Cristo

Te Kapangyariyan ti Jesus a Mangatád ti Kapatawaden tu Kasalanan

¹ Kanya sinumakay ti Jesus tu abang de sakay inumahabes hide a tulos tu banuwan a Capernaum.

² Káddemát di hod ay intugán nu sasangan a tolay u essa a tolay a awan makaahikad ni Jesus. U tolay ay nágkatdug tu essa a ayod. Nikuna netan ni Jesus a te pánnampalataya hide nikuna ay kinagi na tu tolay a awan makaahikad “Anak, magsaya ka dipo pinatawad ta ka dán tu kasalanan mo.”

³ Nikuna nasaneg iye nu Maisto hide nu Kautusan ni Moises ay inisip de a “Awan ti galang tu Diyos iye a tolay, kumán siya a Diyos.”

⁴ Pero natukuyan ni Jesus u inisip de kanya tinanung na hide “Bakin a magisip kam ti madukás tungkul nikán?

⁵ Anya beman u alisto a gimitán ti tolayáy, kagiyán ku nikuna a ‘Pinatawad taka dán tu kasalanan mo,’ oni ‘Tumaknág ka sakay lumakad ka dán.’?

⁶ Patunayan ku nikam a hikán a Anak nu Tolay ay te kapangyariyan a magpatawad ti kasalanan he ti munduwáy.” Kaya kinagi na tu tolay a awan makaahikad “Umágkat ka dán anak, báklayán mudán i ayude sakay soli ka tu bilay moy dipo nagpiyya ka dán.”

⁷ Pagdaka a inumágkat u tolay sakay nagsole tu bilay de.

⁸ Nikuna netan iye nu tolay hide ay nagtaka hide sakay pinuri de u Diyos a nangatád ti konna hina a kapangyariyan tu tolay hide.

Dinulawan ni Jesus u Makasalanan hide a Sumunud Nikuna

⁹ Nadid nikuna linumakad ti Jesus hod ay tinaleban na u essa a tolay a mággetnod tu lugar a págkulektaan ti buwes. Ti Mateo u ngahan nu tolay a tagakulekta ti buwes. Kinagi ni Jesus nikuna “Mákkuyog ka nikán para magin disepulus ko.” Kanya tinumaknág ti Mateo, linakaden na u tarabaho na. Sakay nákkuyog siya ni Jesus.

¹⁰ Nadid nikuna kimman di Jesus tu essa a handaan tu bilay ni Mateo ay hod be hod u makpal a tagakolekta ti buwes sakay u iba hide a makasalanan a tolay. Nákkan hide ni Jesus sakay tu disepulus na hide.

¹¹ Nikuna netan iye nu Pariseo hide ay tinanung de u disepulus ni Jesus, “Bakin a pumisan a kuman u tagapagtoldu moy tu tagakolekta tu buwes sakay tu makasalanan hide?”

¹² Pero nasaneg ni Jesus u tanung de kanya tinábbeg na hide “U awan ti saket ay awan mangangailangan ti doktor, u te saket la.

¹³ Angay moy intendiyán u kinagi nu Panginoon tu kasulatan na ‘Gusto ko a kagbiyan moy u tolay hide, bakán a u alay moy.’ Dipo awanák ummangay ti munduwáy para kagiyan u malinis hide a tolay a magsisi nan u makasalanan hide.”

Awan Maari a Ipisan U Bigu a Toldu ni Jesus tu Dati a Toldu nu Tolay Hide

¹⁴ Nadid immangay u disepulus ni Juan a Mágbautismo ni Jesus sakay nagtanung, “Bakin hikame sakay u Pariseo hide ay magkulasyon pero u disepulus mo hide ay awan?”

¹⁵ Timmábbeg ti Jesus “Maari beman a magdalamhate u nákpagkasal hide ni kaguman di palla u lállake a ikasal? Siyempre awan. Pero dumemát u aldew a alapán de u lállake a ikasal, hod dán hide a magkulasyon.

¹⁶ Sakay awan ti mangdihop ti bigu a tela para áppolan u ábbut tu dati a badu. Dipo ni labaan de u badu ay bumadit u bigu a tela a inyáppol de. Batakán nu bigu a tela u dati a badu sakay pisadán na. Mas dumakál dán nadid u sida nu badu.

¹⁷ Pareho labi tu pággasákkan ti alak a gimet tu koblet nu hayup. Awan ti tolay a mangasák ti bigu a alak tu dati a pággasákkan dipo mapisad u pággasákkan sakay mebulak u alak. U bigu a alak ay dapat iyasák tu bigu a pággasákkan para pareho hide a awan masayang.”

Biniyag ni Jesus u Anak a Bábbey nu Essa a Puno nu Judio Hide Sakay Pinagpiyya Na U Essa a Mágdadigiyán a Babbey

¹⁸ Alay a nákpágguhon ti Jesus nide ay te dummemát a essa a puno nu Judio hide. Limmuhud tu atubang na sakay kinagi na, “Kákkatay la nu anak ko a bábbey, pero kaya mu siya a biyagán a huway ni angay mo itupo u kamát mo nikuna.”

¹⁹ Kanya tinumaknág ti Jesus sakay u disepulus na hide sakay nákkuyog tu puno.

²⁰ Tu páglakad de ay te essa a bábbey a umunonod nide. Iye a bábbey ay duwwa pulo dán a taon a te saket a mágdadigiyan. Sakay kinahap nu bábbey u garayan nu badu ni Jesus.

²¹ Dipo naisipan na a “Ni makahap ku la u badu na ay magpiyyaák.”

²² Kanya linumingat ti Jesus sakay pákketa na tu babbey ay kinagi na “Magsaya ka, dipo tu pánnampalataya mo ay nagpiyya ka.” Ti itona be a odas ay nagpiyya u bábbey.

²³ Káttapos ay timmulos di Jesus a naglakad tu bilay nu puno nu Judio. Kássáddáp de tu bilay na ay netan ni Jesus u magtogtog hide ti pangpatay sakay u mahehaw a katolayan.

²⁴ Kinagiyan na hide, “Lumuwas kam a atanan, awan natay u anak, nátdug la.” Pero awan naniwala u tolay hide nikuna, pinagtawaan di pa siya.

²⁵ Nikuna a napaluwas di dán u tolay hide ay sinumáddáp ti Jesus tu kuwarto nu anak a bábbey. Inalap na u kamát nu patay a anak sakay inumikat u anak.

²⁶ U baheta tungkul ti iye a pangyayari ay kinumalat tu buo a Galilea.

Pinagpiyya ni Jesus u Duwwa a Buhák

²⁷ Kállakad ni Jesus tu bilay nu puno ay inunonod siya nu duwwa a lállake a buhák. Sakay dinulaw di siya “Anak ni David kagbiyan mo kami.”

²⁸ Nikuna sinumáddáp dán ti Jesus tu bilay ay inumadene nikuna u buhák hide. Sakay tinanung na hide “Maniwala kam beman a mapagpiyya takam?” Tinumábbeg hide “On Panginoon, maniwala kame.”

²⁹ Sakay kinahap ni Jesus u mata de sakay kinagi na “Dipo tu pániwala moy ay magpiyya kam.”

³⁰ Tapos ay bigla hide a naketa. Sakay mahigpit hide a pinagbilinan ni Jesus a “Dyan moy ikákkagi iye maski ni ti deya man.”

³¹ Pero imbábbaheta de tu atanan a taga Galilea u tungkul ni Jesus.

Pinagpiyya ni Jesus U Bulol

³² Nadid tu káhhektat nu duwwa ay te inyangay hide ni Jesus a hinayup a bulol.

³³ Kanya pinalayas ni Jesus u demonyo sakay pagdaka a nakaupos u tolay. Minagtaka u tolay hide sakay kinagi de “Sapul tu itod ay awan padla iye nangyare ti Israel.”

³⁴ Pero kinagi nu Pariseo hide “Makapalayas siya ti demonyo dipo inatádden siya ti kapangyariyan ni Satanas u hare nu demonyo hide.”

Makpal U Aniyán

³⁵ Immangay ni Jesus tu atanan a banuwan sakay babaryo. Nagtoldu siya tu sinagoga di hide. Nagtoldu siya tungkul tu Maganda a Baheta tungkul tu pághare nu Diyos. Sakay maski hádya siya a umangay ay pinagpiyya na u tolay hide tu sakisaket de.

³⁶ Nikuna a netan na u tolay hide ay kinagbiyan na hide. Dipo mabalisa hide sakay awan de tukoy ni hádya hide magaged ti tulung. Kumán hide a tupa a awan ti pastol.

³⁷ Kanya kinagi na tu disepulus na hide, “Makpal u aniyán pero sasangan la u maggapas.

³⁸ Ipagdasal moy tu Panginoon a makákkao tu ani a magpatawed ti maggapas hide tu ani.”