Mateo 5 - U Maganda A Baheta Ni Jesu-Cristo

U Tolay Hide a Pagpalaán nu Diyos

¹ Nadid tu pákketa ni Jesus tu makpal a tolay ay simmangkay siya tu badit a buked. Sakay inumetnod siya hod para magtoldu. Immunonod nikuna u disepulus na hide sakay inumetnod hide tu harapan na.

² Sakay sinapulan na hide a tinolduwan. Kinagi na,

³ “Pinagpala nu Diyos u tolay hide a umasa nikuna tu atanan a pangangailangan de, dipu u Diyos u hare de. Siya u mangpospos nide.

⁴ Pinagpala nu Diyos u malungkut hide, dipu hide u pahapahaán nu Diyos.

⁵ Pinagpala nu Diyos u awan hide mapagmataas, dipu hide u makaalap tu atanan a inpanantu nu Diyos.

⁶ Pinagpala nu Diyos u tolay hide a masoh a tahod a manggimet tu kaluuben nu Diyos, dipo hide u tulungan nu Diyos tánni magimet de u kaluuben na.

⁷ Pinagpala nu Diyos u makákkagbiyán tu agum, dipo hide u kagbiyan nu Diyos.

⁸ Pinagpala nu Diyos u tolay hide a awan dán ti agum a pagserbiyán nan u Diyos la, dipo hide u maketa nikuna.

⁹ Pinagpala nu Diyos u tagaayus tu magdima hide, dipo hide u madulawan a anak nu Diyos.

¹⁰ Pinagpala nu Diyos u dáddustaán hide a tolay dipo gimitán de u kaluuben nu Diyos, hide u katolayan tu kahareyan na.

¹¹ Pinagpala kam nu Diyos ni insultuwán di kam sakay dustaán sakay bintangán di kam ti sare-sare dipo disepulus takam.

¹² Konna labi hod u ginággimet nu tolay hide tu propeta ko hide tu itod. Magkasayaan kam a tahod dipo dakál u gantimpala moy ti langet.”

U Disepulus ni Jesus ay Kumán a Asen sakay Demlag

¹³ Kinagi pa ni Jesus nide “Hikam ay kumán a asen ti munduway. Ni mawan u lasa nu asen, awan dán ti paraan a mesoli pa u lasa na. Awan dán ti serbi u asen kaya ibut dálla sakay gággemmakan dálla nu katolayan.

¹⁴ Hikam be ay kumán a demlag ti munduway. Awan ti makapángtagu tu essa a banuwan a hod tu toktok nu buked.

¹⁵ Sakay awan ti tolay a mangtab ti simbuwan sakay takáppan na ti baldi. Nan itupo na iye tu lamisaan tánni mademlagan u he tu disalad nu bilay.

¹⁶ Konna la be hod u gimitán moy, ipeta moy u demlag moy tu tolay hide tánni ketan de u mágkaganda moy a gimet. Tán para puriyán de u Ama moy ti langet.”

U Toldu ni Jesus Tungkul tu Kautusan nu Diyos a Intád ni Moises

¹⁷ Kinagi pa ni Jesus nide “Dyan moy isipán a immangayák he para ibutan u Kautusan ni Moises oni u intáttoldu nu Propeta hide a upos nu Diyos. Awanák immangay he para ibutan hide nan ipaliwanag sakay tupadán iye hide.

¹⁸ Pakatandaan moy iye, hanggan atoy pa u langet sakay u luta ay matupad u atanan a nesulat tu Kautusan.

¹⁹ Kanya ni ti deya man u awan sumunud tu maski essa tu kautusan dipo isipán na a awan iye pinakamahalaga sakay mangtoldu ti konna hina ay magin pinakababa tu kahariyan nu Diyos. Pero ni ti deya man u sumunud sakay mángtoldu tu katolayan tu kautusan ay magin mataas a tolay tu kahariyan nu Diyos.

²⁰ Kanya ikagi ku nikam a paghariyan kam la nu Diyos ni tatahoden moy a sunudán u kautusan nu Diyos. U kássunud moy tu kautusan ay dapat mas humigit pa tu págsunud nu Pariseo hide sakay tu maistu hide nu Kautusan ni Moises.”

Nagtoldu Ti Jesus Tungkul tu Iyamut

²¹ Kinagi pa ni Jesus, “Nasaneg moy a intoldu de tu nunu moy hide a ‘Dyan ka mamuno sakay u makabuno ay parusaan nu Diyos’

²² Pero nadid ay ikagi ko nikam a ni deya u mágngál tu kákkapatkákka na ay parusaan nu Diyos. Sakay ni ti deya u manginsulto ay hatulan nu Sanedrin. Sakay ni ti deya man u magkagi tu kákkapatkákka na a ‘Awan ka ti serbi a tolay’ ay parusaan nu Diyos ti impiyerno.

²³ Kanya ni magalay ka tu lugar nu pággalayan sakay naalaala mo a te kasalanan ka tu kapatkákka mo ay

²⁴ iwahak mu padla u alay mo tu atubang nu pággalayan sakay angay ka pa mákpagkasundu nikuna. Káttapos ay maari ka dán a sole a magalay.

²⁵ Ni te mángkaso niko ay ayusán mu dán u problema bagu kam a humarap tu huwes. Dipo ni hod ka dán hod sakay natalo ka tu kaso ay ipepireso ka nu huwes tu pulis.

²⁶ Talaga a awan ka makaluwas tu piresuwan hanggan awan mo mabayaden u atanan a utang mo.”

Nagtoldu ti Jesus Tungkul tu Kasalanan a Pángngibábbey

²⁷ Kinagi pa ni Jesus “Nasaneg moy a intoldu de tu nunu moy hide a ‘Dyan ka mangalunya.’

²⁸ Pero nadid itoldu ko nikam a ni ti deya man u umileng la tu bábbey a te soh a dumuhog ay nagkasala dán ti pángngibábbey tu isip na.

²⁹ Kanya ni u kawanan mo a mata ay u dahilan nu págkasala mo ay lábwetán mo sakay ibut mo. Mas maganda pa a mawanan ka ti essa a parte nu bággi mo kasera ni meimpiyerno u atanan a bággi mo.

³⁰ Sakay ni u kawanan mo a kamát u dahilan nu págkasala mo ay káttolán mo sakay ibut mo. Mas maganda pa a mawanan ka ti essa a parte nu bággi mo kasera ni me impiyerno u atanan a bággi mo.”

U Toldu ni Jesus Tungkul tu Pághiwalay tu Kabanga

³¹ Kinagi pa ni Jesus “Nasaneg moy a intoldu de tu nunu moy hide a ‘Ni hiwalayan nu lállake u kabanga na ay kailangan a atádden u kabanga na ti katibayan nu pághiwalay de.’

³² Pero nadid ay itoldu ko nikam a ni ti deya man u humiwalay tu kabanga na a bábbey maski awan nangilállake ay nagkasala siya dipo siya u te dahilan ni mákkabanga a huway u bábbey. U lállake a kumabanga be nikuna sakay u bábbey ay nagkasala ti pángngalunya.”

U Toldu ni Jesus Tungkul tu Pánnumpa.

³³ Kinagi pa ni Jesus “Nasaneg moy a intoldu de tu nunu moy hide a ‘Dyan mo sidaán u pinanumpaan mo a pananto nan tupadán mo u pinanumpaan mo tu Panginoon.’

³⁴ Pero nadid ay itoldu ko nikam a dyan kam manumpa ni magpanantu kam. Dyan moy kagiyán a sistigu moy u langet dipo hod u trono nu Diyos.

³⁵ Sakay dyan moy kagiyán a sistigu moy u mundu dipo u Diyos be u tagapamahala he. Sakay dyan moy be kagiyán a sistigu moy u Jerusalem dipo itod u banuwan nu Diyos a pinakamataas a hari.

³⁶ Sakay dyan ka manumpa a ‘Maski ni matayák nadid,’ dipo awan mo kaya a baguwán u kurol nu maski essa tu buuk mo.

³⁷ Mas maganda a kagiyán mu dálla a ‘O’ ni kaya mo o ni ‘Awan’ ni awan mo kaya a gimitán. Dipo u págsumpa ay gábwat ni Satanas.”

U Toldu ni Jesus Tungkul tu Pággante

³⁸ Kinagi pa ni Jesus “Nasaneg moy a intoldu de tu nunu moy hide a ‘Ni ti deya u makasida ti mata ay bayaden na la be ti mata sakay u makasida ti ngipán ay bayaden na la be ti ngipán.’

³⁹ Pero kagiyán ku nikam nadid a dyan kam gumante tu tolay a nanggimet nikam ti madukás. Nan ni te mangdapang niko ay ipadapang mu pa u dilupot.

⁴⁰ Ni ikaso di ka para la maalap de u badu mo ay iyatád mu dálla pate u dyaket mo.

⁴¹ Ni ipilit a ipasakbet nu essa a tolay u karga na niko ti essa a kilometro ay sakbitán mo u karga na ti duwwa a kilometro.

⁴² Atádden mo u mangaged niko sakay paáddiman mo u mangáddem niko.”

Mahalán Mo U Kadima Mo Dyan La U Kaibigan Mo

⁴³ Kinagi pa ni Jesus “Nasaneg moy a intoldu de tu nunu moy hide a ‘Mahalán mo u kaibigan mo sakay kaiyamutan mo u kadima mo.’

⁴⁴ Pero iye u ikagi ko nikam, mahalán moy u kadima moy sakay ipagdasal moy u mangdusta nikam.

⁴⁵ Tánni magin tunay kam a anak nu Ama moy a atoy ti langet. Dipo atádden na a parehas ti sinag sakay uden u mabait sakay u madukás a tolay.

⁴⁶ Ni u mahalán moy la ay u magmahal la nikam ay bakin gantimpalaan kam pa nu Diyos? Awan beman a gággimitán moy labe u gággimitán nu tagakolekta ti buwes hide a mágdaya?

⁴⁷ Sakay ni u áuhunán moy ay u kaibigan moy la, ánya u nagimet moy a mas maganda kasera tu awan ko hide disepulus. Konna labe hina u gággimitán nu tolay a awan maniwala tu Diyos.

⁴⁸ Kanya dapat a awan kam ti kapintasan konna tu Ama moy a hod ti langet a awan ti kapintasan.”