Mateo 4 - U Maganda A Baheta Ni Jesu-Cristo

Pinayagen nu Diyos a Purbaán a Toksuwan ni Satanas ti Jesus

¹ Káttapos ay inyangay nu Ispiritu nu Diyos ti Jesus hod tu kaparangan para purbaan a toksuwán ni Satanas.

² Hod ay nagkulasyon ti Jesus ti áppat a pulo a aldew ay ti gibi. Sakay nagaláp siya.

³ Sakay immangay nikuna ti Satanas sakay kinagi na “Ni tatahoden a hiko u Anak nu Diyos ay ipeta mo. Gimitán mo a makan i bitowe hide.”

⁴ Pero timmábbeg ti Jesus “Umádko, dipo nesulat tu Upos nu Diyos a ‘Bakán la a tu makan a mabiyag i tolayay pero kailangan na pa u atanan a upos nu Diyos.’ ”

⁵ Káttapos ay inyangay siya ni Satanas tu atáp nu Templo ti Jerusalem.

⁶ Sakay kinagi ni Satanas ni Jesus “Ni hiko u Anak nu Diyos ay tumápduk ka dipo nesulat tu Upos nu Diyos a ‘Utusan nu Diyos u anghel na hide a mangbantay niko. Kanya sangbután di ka tánni awan ka maánya.’ ”

⁷ Pero timmábbeg ti Jesus “Nesulat be a ‘Dyan ka maggimet ti essa a bagay para la purbaan mo ni talaga a gimitán nu Panginoon a Diyos u panantu na hide.’ ”

⁸ Káttapos ay inyangay dámman siya ni Satanas tu toktok nu essa a malangkaw a buked sakay impeta na nikuna u atanan a babansa ti munduway sakay u kayamanan de.

⁹ Sakay kinagi ni Satanas ni Jesus “Iyatád ku niko iye a atanan ni lumuhud ka sakay sumamba nikán.”

¹⁰ Pero inutusan ni Jesus ti Satanas “Umadeyo ka nikán Satanas. Dipo nakasulat be a ‘Sambaán mo u Panginoon a Diyos sakay siya la u sunudán mo awan dán ti agum.’”

¹¹ Kanya nilakaden siya ni Satanas. Sakay dimmemát u anghel hide sakay sinerbiyan di siya.

Sinapulan ni Jesus u Tarabaho Na ti Galilea

¹² Nadid essa a aldew ay nabaheta ni Jesus a nepireso ti Juan kanya nagsoli ti Jesus ti Galilea.

¹³ Sakay awan dán siya nágyan ti Nazaret, inumagton siya ti Capernaum. Iye a banuwan ay adeni tu minalno a hod tu pag-itan nu págyanan nu lahi hide ni Zabulon sakay Neftali.

¹⁴ Nangyari iye para matupad u kinagi ni Propeta Isaias tu itod pa a

¹⁵ “Hikam a mágyan ti Zabulon sakay Neftali a sakup ni Galilea a kadibilew ni Jordan a págyanan nu makpal a tolay a awan maniwala tu Diyos.

¹⁶ Hikam a mágyan tu kadiklámman nu kasalanan ay maketa ti dakál a demlag. U demlag u mángpeta tu dilan nu kaligtasan tu mágyan hide tu lugar nu kamatayan.”

¹⁷ Hod ti Capernaum ay nagsapul ti Jesus a magtoldu. Kinagi na “Adággen moy u kasalanan moy dipo adeni dán a maghare u Diyos nikitam.”

Inakit ni Jesus u Appat a Mángngikan a Magin Disepulus Na

¹⁸ Nadid tu páglakad ni Jesus tu digdig nu minalno nu Galilea, ay netan na u duwwa a lállake a magsabud dipo mángngikan hide. Matkaka u duwwa, u ngahan nu essa ay ti Simon, u palayaw na ay Pedro sakay u essa ay ti Andres.

¹⁹ Sakay kinagi na nide “Kumuyog kam nikán dipo tolduwan takam ni kodya a magakit ti tolay para sumunud hide nikán.”

²⁰ Págdaka de a inwahak u gilagila de sakay kimmuyog dán hide ni Jesus.

²¹ Tulos hide a naglakad tu digdig nu minalno sakay netan di Jesus u matkaka a lállake a di Santiago sakay ti Juan a anak ni Zebedeo. Hod hide sakay tu ama de tu abang de a magayuma tu gila de. Inakit be hide ni Jesus a magin disepulus na.

²² Págdaka di be a linakaden u ama de sakay u abang de sakay kimmuyog hide ni Jesus.

Nagtoldu ti Jesus Tungkul tu Pághare nu Diyos sakay Nagpapiyya Siya tu Te Saket Hide.

²³ Nadid immangay ti Jesus tu atanan a banuwan ti Galilea sakay nagtoldu tu sinagoga de hide. Intáttoldu na u Maganda a Baheta tungkol tu pághare nu Diyos. Sakay pinagpiyya na be u atanan a sakisaket nu tolay hide.

²⁴ Kanya nasaneg nu totolay hide tu buo a lugar a Siria u ginimet ni Jesus a makataka-taka hide. Inyangay de nikuna atanan nu te saket hide, u hinayup hide, u mágpatay hide sakay u awan dán hide makaahikad. Pinagpiyya hide a atanan ni Jesus.

²⁵ Sakay immunonod nikuna u makpal a tahod a tolay a taga Galilea, taga Decapolis, taga Jerusalem, taga iba-iba a banuwan ni Judea sakay u mágyan hide tu banuwan a dibilew nu Jordan.