Mateo 27 - U Maganda A Baheta Ni Jesu-Cristo

Inyangay De ti Jesus ni Pilato

¹ Tu dimadimang, namagguhon u pupuno hide nu saserdote sakay u pinuno hide nu banuwan ni kodya de a ipabuno ti Jesus.

² Káttapos ay pinungo de siya sakay inyangay de ni Gobernador Pilato.

U Kákkatay ni Judas

³ Nikuna netan ni Judas a ti Jesus ay hinatulan ti kamatayan ay nagsisi siya sakay insoli na tu pupuno hide nu saserdote sakay tu pinuno hide nu banuwan u tállo a pulo a silber a pilak.

⁴ Kinagi na, “Nagkasalaák! Intokyon ko u tolay a awan ti kasalanan.” “Anya u pákalam mi? Bahala ka hina!” tábbeg de.

⁵ Imbudas ni Judas u pilak a silber tu disalad nu templo sakay limmakad sakay káttapos ay nagbitte.

⁶ Inalap nu pupuno hide nu saserdote u pilak a silber sakay kinagi de, “Bawal tu Kautusan a iyatád u pilak a iye tu pagdáttonan tu handog nu templo. Dipo iye ay bayad tu biyag nu essa a tolay.”

⁷ Nagkaessa hide a u pilak ay ibali de ti luta nu mággimet ti páglutuwan ti banga para magin páglábbangan tu taga iba hide a bansa.

⁸ Kaya i lutaan a itod ay nginahanan a “Luta nu Dige” maski hanggan nadid.

⁹ Ti konna he a paraan natupad u kinagi ni Propeta Jeremias tu itod “Inalap de u tállo a pulo a silber a pilak u inhalaga nikuna nu Israelita hide

¹⁰ sakay imbayad ko tu luta nu maggimet ti páglutuwan a banga ayon tu inyutos nikán nu Panginoon.”

Ti Jesus tu Atubang ni Pilato

¹¹ Káttapos ay inyangay de ti Jesus tu gubernador. “Hiko beman u Hari nu Judio hide?” tanong nikuna nu gobernador. Timmábbeg ti Jesus, “Hiko dán u nagkagi.”

¹² Pero nikuna bintangan siya nu pupuno hide nu saserdote sakay nu pinuno nu banuwan ay awan dán siya timmábbeg.

¹³ Kaya kinagi nikuna ni Pilato, “Awan mo beman nasaneg u inbintang de niko?”

¹⁴ Pero awan timmábbeg ti Jesus kanya nagtaka a tahod u gobernador.

Hinatulan Ti Kamatayan ti Jesus

¹⁵ Nadid kada Kasayaan nu Aldew nu Págtaleb, gággimitán dán nu gobernador u magpalaya ti essa a pireso. Mapalaya ni ti deya man u kagiyán nu tolay hide.

¹⁶ Tu itod ay te essa a tanyag a pireso a nginahanan a [Jesus] Barrabas.

¹⁷ Kaya nikuna naipun dán u tolay hide ay tinanong hide ni Pilato, “Deya u gusto moy a palayaán ko, ti [Jesus] Barrabas o ti Jesus a nadulawan a Cristo?”

¹⁸ Dipo tukoy ni Pilato a seni u dahilan de ni bakin a inyangay de nikuna ti Jesus.

¹⁹ Bakán la a ina. Alay na a nakaetnud tu pághukoman, impekagi nikuna nu kabanga na, “Dyan ka mák-alam ti tolayan ina a awan ti kasalanan dipo tu gibi he ay pinahirapanák nu tagináp ko a patungkol nikuna.”

²⁰ Pero bago nangyare u págpapili ni Pilato ay sinulsulan dán nu pupuno hide nu saserdote sakay nu pinuno nu banuwan u tolay hide a kagiyán de ni Pilato a ti Barrabas u palayaán sakay ti Jesus ay bunuwan.

²¹ Huway a tinanong nu gobernador u tolay hide, “Deya tu duwwa u gusto moy palayaán ko?” “Ti Barrabas!” tábbeg de.

²² Tinanong hide ni Pilato, “Ni konna hod, anya u gimitán ko ni Jesus a nadulawan a Cristo?” Timmábbeg u atanan, “Ipako siya tu kudus!”

²³ “Bakin, anya beman a madukás u ginimet na?” tanong ni Pilato. Pero lalo pa hide a pimmákhaw, “Ipako siya tu kudus!”

²⁴ Nikuna a netan iye ni Pilato a awan siya ti magimet sakay makay magkagulo pa u tolay hide ay nagpaalap siya ti dinom sakay nagguges tu kamát na tu atubang nu tolay hide. “Awanák ti pananagutan ti kákkatay ni tolayan iye. Bahala kamon!” kagi ni Pilato.

²⁵ Timmábbeg u tolay hide, “Pananagutan mi sakay tu anak mi hide u kákkatay na!”

²⁶ Sakay pinalaya na ti Barrabas pero pinalatigo na ti Jesus sakay intád nide para ipako tu kudus.

Dinusta nu Sundalo Hide ti Jesus

²⁷ Káttapos, ti Jesus ay inyangay nu sundalo hide tu kampo de. Sakay naipun u makpal a sundalo tu palebut na.

²⁸ Sakay inubaan de siya sakay sinulutan ti essa a damit a madideg.

²⁹ Nangkawekaw hide ti lanot a masaet sakay indátton de tu ulo na sakay pinagtawed de ti essa a sahukod tu kawanan a kamát. Sakay sinesti de siya a niluhud-luhudan sakay kinagi de “U Hari nu Judio hide!”

³⁰ Káttapos de siya a linalluktabben ay inalap de u sahukod na sakay ingahote tu ulo na.

³¹ Sakay káttapos de siya a pinahirapan ay inubaan de siya. Sinulutan de siya tu sadili na a damit sakay inyangay tu luwas nu banuwan para ipako tu kudus.

Impako de ti Jesus tu Kudus

³² Kálluwas de tu banuwan, netan de u essa a lállake a nginahanan a Simon, essa a taga-Cirene. Pinilit de ipabaklay nikuna u kudus ni Jesus.

³³ Káddemmát de tu lugar a nadulawan a Golgota (u gusto a kagiyan ay Lugar nu Bungo) ay

³⁴ inatádden de ti Jesus ti alak a hinaluwan ti apdo. Pero nikuna naenámman na iye ay awan na ininom.

³⁵ Nikuna a nepako de dán siya tu kudus, hinati-hati de u damit na hide káttapos de a nagbunutan.

³⁶ Sakay immetnud hide para bantayan siya.

³⁷ Nesulat tu ontok nu kudus u nagin kasalanan na: “Ti Jesus, u Hare nu Judio hide.”

³⁸ Duwwa be a tulisan u kasabay na a nepako tu kudus, essa a kudus tu kawanan na sakay essa be a kudus tu kawihe.

³⁹ Dinusta siya nu nagtaleb hide sakay nagwalingiwang pa a

⁴⁰ nagkagi, “Awan beman hiko u mángsida tu templo sakay kagi mo a huway mo gimetan itod tu loob nu tállo a aldew? Kaya iligtas mo nadid u sadili mo! Ni hiko talaga u Anak nu Diyos, umogsad ka hina tu kudus!”

⁴¹ Sinesti be siya nu pupuno hide nu saserdote, nu maisto hide nu Kautusan ni Moises sakay nu pinuno nu banuwan. Kinagi de,

⁴² “Inligtas na u agum pero u sadili na ay awan na meligtas! Awan beman siya u Hari ti Israel? Ni umogsad la siya nadid tu kudus ay maniwala kami nikuna!

⁴³ Nanalig siya tu Diyos sakay kinagi na a siya u Anak nu Diyos. Iligtas siya nu Diyos ni talaga a tatahoden u kinagi na!”

⁴⁴ Sakay sinesti be siya nu duwwa a tulisan a nepako a kasabay na.

U Kákkatay ni Jesus

⁴⁵ Sapul tu tanghali hanggan tu alas tres ti apon ay nagdiham u buo a lugar.

⁴⁶ Nikuna a magalas tres ti apon, pimmakhaw ti Jesus, “Eli, Eli, lama sabaktani?” U gusto na a kagiyan ay “Diyos ko, Diyos ko, bakinák mo a pinabayan?”

⁴⁷ Nasaneg iye nu sangan a ketaknág hod sakay kinagi de, “Dádduluwan na ti Elias!”

⁴⁸ Pagdaka gimminan u essa nide sakay nangalap ti damit. Binisa na ti maapsot a alak sakay inyegut na tu ontok nu essa a kayo sakay impasápsáp na ni Jesus.

⁴⁹ Pero kinagi be nu agum, “Maguhay ka pa, ilengán tam ni dumemát ti Elias para iligtas siya!”

⁵⁰ Sakay huway a pimmakhaw ti Jesus sakay natay.

⁵¹ Bigla a napisad tu bállog u kortina nu templo, sapul ti ontok hanggan ti sidung. Naglinog tu luta sakay nabisag u dadangli hide.

⁵² Nabukasan u lábbang hide sakay nabiyag a huway u makpal a naniwala tu Diyos a nágkatay dán.

⁵³ Lumuwas hide tu lábbang sakay nikuna a huway a nabiyag ti Jesus, simmáddap hide ti Jerusalem sakay netan hide hod nu makpal a tolay.

⁵⁴ Nanteng a tahod u kapitan sakay u sundalo hide a nagbantay ni Jesus nikuna nabati de u linog sakay netan de u atanan a nangyare. “Tahod ngane a siya ay Anak nu Diyos!” kinagi de.

⁵⁵ Atoy be hod u makpal a bábbey a mágtanaw hod tu adeyo. Hide itod u sapul pa ti Galilea ay ummunonod dán hide ni Jesus sakay nagserbi nikuna.

⁵⁶ Kaguman nide ti Maria Magdalena, ti Maria a ina ni Santiago sakay ni Jose, a kabanga ni Zebedeo.

U Páglábbang ni Jesus

⁵⁷ Bagu a nagdiham, dimmemát u essa a mayaman a taga Arimatea, u ngahan na ay ti Jose. Siya ay disepulus be ni Jesus.

⁵⁸ Ummadeni siya ni Pilato sakay inaged na u bangkay ni Jesus. Inyutos be ni Pilato a iyatád u bangkay nikuna.

⁵⁹ Kaya inalap ni Jose u bangkay sakay binalutan ti bigu a damit a lino.

⁶⁰ Inyangay na iye tu sadili na a páglábbangan a awan palla nalay a impagimet na tu pader a bito. Káttapos, ingulong na tu pintuan u essa a dakal a bito sakay limmakad.

⁶¹ Atoy be hod ti Maria Magdalena sakay u essa pa a Maria a nággetnud tu luwas nu lábbang.

U Bantay Hide tu Lábbang

⁶² Tu kadima-dimangan, káttapos nu aldew nu pághanda tu Aldew nu Págtaleb ay sabay a immangay ni Pilato u pupuno hide nu saserdote sakay u Pariseo hide.

⁶³ Kinagi de nikuna, “Mahal mi a gobernador, naalala mi a kinagi nu mapagkunware an itod nikuna a biyag padla siya a huway siya mabiyag kállipas nu tállo a aldew.

⁶⁴ Pabantayan mo ped ti husto u lábbang hanggan tu katállo a aldew. Makay umangay u disepulus na hide sakay takawan de u bangkay. Sakay kagiyan de tu tolay hide a siya ay huway a nabiyag. Mahirap dán makay u panlinlang an iye ay magin mas madukás pa nan tu dipalongo.”

⁶⁵ Kinagi nide ni Pilato “Magkuyog kam tu sundalo ko hide sakay pabantay moy ti husto u lábbang ni Jesus.”

⁶⁶ Kaya immangay hide sakay dináttonan de ti senyal u pintuwan a bito sakay pinabantay de u lábbang tánni masigudo de a awan iye maahikad ni ti deya man.