Mateo 26 - U Maganda A Baheta Ni Jesu-Cristo

U Plano Laban Ni Jesus

¹ Nikuna a natapos dán a itoldo ni Jesus u atanan a iye ay kinagi na tu disepulus na hide,

² “Tukoy moy a duwwa a aldew dálla ay Kasayaan dán nu Aldew nu Pagtaleb Sakay itokyon u Anak nu Tolay para ipako tu kudus.”

³ Nadid u pupuno hide nu saserdote sakay u pinuno hide nu banuwan ay nagpisanpisan hod tu dakal a bilay nu pinakapuno a saserdote a ti Caifas.

⁴ Nagplano hide a sekreto de a ipadakáp ti Jesus sakay ipabuno.

⁵ Sakay kinagi di pa, “Dyan tam gimitán ti aldew nu Kasayaan makay magkagulo u tolay hide.”

Dináttonan ti Passappot ti Jesus

⁶ Nadid atoy ti Betania ti Jesus tu bilay ni Simon a dati a te ketong.

⁷ Alay na a kuman, immadeni nikuna u essa a bábbey a te tawed a pággasákkan a alabastro a putat ti mamahalin a passáppot. Dináttonan na u ulo ni Jesus tu passáppot.

⁸ Naiyamut u disepulus na hide nikuna netan de iye. “Bakin sinayang na u passáppot?” tanong de.

⁹ Kinagi di pa, “Nelako nakwa itod ti mahal sakay neatád tu pobre hide u nánglakuwan!”

¹⁰ Awan netago ni Jesus u kinagi de kanya kinagi na, “Bakin gágguluwan moy u bábbey? Maganda u ginimet na nikán.

¹¹ Tu atanan a panahon ay kakaguman moy u pobre hide pero hikán ay awan moy makaguman ti habang panahon.

¹² Awan beman dináttonanák na ti passáppot bilang pághanda tu páglábbang nikán.

¹³ Pakatandaan moy: hadya man itoldo u Maganda a Baheta ay kagiyan di be u ginimet na bilang págalaala nikuna.”

Nakpágguhon ti Judas tu Kadima Hide ni Jesus

¹⁴ Ti Judas Iscariote, essa tu sapulo ay ti duwwa ay nákpágguhon tu pupuno nu saserdote hide.

¹⁵ “Anya u iyatád moy nikán ni tulungan ta kam a madakáp ti Jesus?” tanong na. Tu itod bela ay inattáden di siya ti tállo a pulo a silber a pilak.

¹⁶ Sapul hod, nagehyok dán ti Judas ti pagkakataon para metokyon na ti Jesus.

U Pangngapon nu Aldew nu Págtaleb ni Jesus sakay tu Disipulos Na Hide

¹⁷ Dumemát u dipalongo a aldew nu Kasayaan nu Tinapay a Awan ti Págpaalsa Ummadeni ni Jesus u disepulus hide sakay nagtanong, “Panginoon, hadya mo gusto a ipaghanda mi ka ti pangapon tu Aldew nu Págtaleb?”

¹⁸ Timmábbeg siya, “Angay kam ti dibanuwan sakay ehyokan moy u essa a tolay. Kagiyán moy nikuna a kona he u ipekagi nu Maistu mi ‘Adeni dán u panahon ko. Hikán sakay u disepulus ko hide ay tu bilay mo a kuman tu pangngapon nu Aldew nu Págtaleb.’ ”

¹⁹ Sinunud nu disepulus na hide u utos ni Jesus sakay inhanda de u pangapon nu Aldew nu Págtaleb.

²⁰ Ti gibiyan itod, kuman tu lamesaan ti Jesus a kaguman na u sapulo ay ti duwwa a disepulus na.

²¹ Alay de a kuman, kinagi ni Jesus “Kagiyan ko nikam: essa nikam u mángtokyon nikán.”

²² Minalungkot a tahod u disepulus na hide sakay balang essa ay nagtanong nikuna, “Hikán beman Panginoon?”

²³ Timmábbeg siya, “U kasabay ko a sumawsaw tu baso ay siya u mángtokyon nikán.

²⁴ Matay u Anak nu Tolay ayun tu Kasulatan pero kakagbi a tahod u mángtokyon nikuna! Mapiyya pa a awan inyenak i tolay an itod.”

²⁵ Ti Judas a mángtokyon nikuna ay nagtanung be, “Maistu, hikán beman?” Timmábbeg ti Jesus, “Hiko dán u nagkagi.”

U Katapusan a Pangngapon ni Jesus

²⁶ Alay de a kuman, nangalap ti tinapay ti Jesus. Sakay matapos magpasalamat tu Diyos ay hinatihati na u tinapay sakay intád tu disepulus na hide. “Alapan moy iye sakay kanán. Iye u bággi ko,” kinagi na.

²⁷ Káttapos ay inalap na u baso, nagpasalamat tu Diyos sakay intád nide. “Uminom kam a atanan ti iye,” kagi na

²⁸ “dipo iye u digi ko a mangpatibay tu uhunan nu Diyos, u digi ko a mebuhos para mapatawad u kasalanan nu tolay hide.

²⁹ Kagiyan ko nikam a awannák dán uminom ti alak a gábwat ti ubas hanggan ti aldew a u bigo dán a alak u inuman ko a kaguman kam tu kahariyan nu Ama ko.”

³⁰ Sakay káttapos di a magkansiyon ti essa a pasalamat, immangay hide tu Buked nu Olibo.

Dinipalongo a Kinagi ni Jesus u Págpamen ni Pedro

³¹ Kinagi ni Jesus nide, “Ti gibiyan iye, hikán ay ginanan moy a atanan konna tu kinagi tu Kasulatan, ‘Bunuwan ko u pastol sakay magkawatakwatak u tupa hide.’

³² Pero káttapos ko a mabiyag a huway ay mágdipalongowák nikam ti Galilea.”

³³ Timmábbeg ti Pedro, “Maski ginanan ka nu atanan ay awan ta ka ginanan.”

³⁴ “Pakatandaan mo,” kagi ni Jesus, “ti gibi biyan iye, bagu a magtarakket u manok ay pentállowák mo a ipamen.”

³⁵ Pero kinagi ni Pedro, “Maski ni bunuwanák de ay awan ta ka ipamen.” Sakay kona labe hod u kinagi nu agum a disepulus na hide.

Nagdasal ti Jesus ti Getsemani

³⁶ Sakay kinuyog hide ni Jesus tu essa a lugar a nadulawan a Getsemani. Kinagi na tu disepulus na hide, “He kam pala he ta magdasallák ti danágge hod.”

³⁷ Pero kinuyog na ti Pedro sakay u duwwa a anak ni Zebedeo. Sakay nabalisa siya sakay nalungkot a tahod.

³⁸ Kinagi na nide, “U puso ko ay maglungkot a tahod halos a ikatay ko! He kam pala he sakay mákpagpuyat nikán!”

³⁹ Immadeyo ti Jesus ti sabadit, dinumapa siya sakay nagdasal a, “Ama ko, ni maaari ay ibutan mo nikán i pághirapan iye. Pero bakan a u gusto ko ni awan u gusto mo u mangyare.”

⁴⁰ Nagsoli siya sakay dinemáttan na a tidug u tállo a disepulus. Kinagi na ni Pedro, “Talaga beman a awan kam maari a mákpagpuyat nikán maski ni essa la a odas?

⁴¹ Magpuyat kam sakay manalangin tánni awan kam matalo nu tukso. U espiritu ay nakahanda pero mahina u bággi.”

⁴² Huway siya a ummadeyo sakay nagdasal “Ama ko, ni awan maari ibutan i pághirapan iye ni awan ko magimet ay sunudán ko u kagustuwan mo.”

⁴³ Huway siya a nagsoli sakay dinemáttan na dámman hide a tidug dipo grabe u tongka de.

⁴⁴ Nilakaden na dámman u tállo a disepulus sakay huway siya a nagdasal, itod labe u kinagi na.

⁴⁵ Nagsoli dámman siya tu disepulus na hide sakay kinagi na nide, “Tidug kam padla beman sakay umimang? Dumemát dán u odas a itokyon u Anak nu Tolay tu makasalanan hide.

⁴⁶ Kadta mon! Atoy dán u mángtokyon nikán.”

U Pángdakáp ni Jesus

⁴⁷ Magupos padla ti Jesus nikuna dimmemát ti Judas, essa tu sapulo ay ti duwwa. Te kaguman siya a makpal a tolay a te tawed a attak sakay batuta. Gábwat hide tu pupuno nu saserdote hide sakay tu pinuno nu banuwan.

⁴⁸ Bago pa hide dimmemát hod ay kinagi dán nu mángtokyon u konna he a senyal: “U ámmuwan ko ay siya u ehyokan moy. Dakáppán moy a pagdaka!”

⁴⁹ Kanya inadeniyan ni Judas ti Jesus sakay binati, “Mapiyya a gibi Maistu!” sakay inammuwan na.

⁵⁰ Kinagi nikuna ni Jesus, “Barkada, gimetan mo dán u sadya mo.” Sakay inadeniyan siya nu tolay hide sakay dinakáp.

⁵¹ Bigla a nagbagot ti attak u essa tu kaguman ni Jesus. Tinegpas na u utusan nu pinakapuno a saserdote sakay nahipang u talinga na.

⁵² Kinagi ni Jesus, “Isahungan mo i attak mowe! U mabiyag ti attak ay tu attak a matay.

⁵³ Awan mo beman tukoy a makaagedák tu Ama ko ti libo libo a anghel hide sakay paangayan na hide a pagdaka?

⁵⁴ Pero kodya a matupad u nesulat tu Kasulatan a dapat iye a mangyare?”

⁵⁵ Sakay inatubang na u tolay hide sakay kinagi, “Hikán beman ay tulisan a immangay kam he a te tawed a attak sakay batuta hide para dakápannák moy? Aldew aldew, hikán ay nagtoldo tu templo pero awannák moy dinakáp.

⁵⁶ Pero nangyari iye a atanan tánni matupad u insulat nu propeta hide tu Kasulatan.” Káttapos ay ginuminan u disepulus na hide sakay inwahak di siya a maggeessa.

Ti Jesus tu Atubang nu Sanedrin

⁵⁷ Inyangay de ti Jesus tu bilay ni Caifas, u pinakapuno a saserdote hide. Hod hod a nagpisanpisan u maisto hide nu Kautusan ni Moises sakay u pinuno nu banuwan.

⁵⁸ Tummagubet nikuna ti Pedro pero adeyo u agwat de. Káddemát na tu bilay ni Caifas ay simmáddap siya tu sural sakay naggetnud a kaguman u guwardiya hide tánni metan na ni anya u mangyari.

⁵⁹ Nagehyok u pupuno nu saserdote hide sakay u buo a Sanedrin ti tistigo a magbulibuli laban ni Jesus para mepabuno de siya.

⁶⁰ Pero awan hide ti nasaneg a istorya de a maari a gamitan para mepabuno de siya, maski makpal a ummatubang sakay nagkagi ti kakabuliyan tungkol nikuna. Tu katapusan, te duwwa a ummatubang

⁶¹ sakay nagkagi, “Kinagi ni tolayan ina a sidaán na u templo sakay ayusán na tu katállo a aldew.”

⁶² Tummaknag u pinakapuno a saserdote sakay kinagi na ni Jesus, “Awan ka beman ti metábbeg tu imbintang de niko?”

⁶³ Pero awan ti kákkagi ti Jesus. Sakay kinagi nikuna nu pinakapuno a saserdote, “Iyutos ko niko: kagiyan mo nikami, tu ngahan nu Diyos a biyag, ni hiko beman u Mesias, u Anak nu Diyos?”

⁶⁴ Timmábbeg ti Jesus, “Hiko dán u nagkagi. Pero kagiyan ko niko: Sapul nadid ay ketan mo u Anak nu Tolay a nakaetnud tu kawanan nu Makapangyariyan a Diyos sakay dumemát siya a gábwat ti langit!”

⁶⁵ Nikuna a nasaneg iye nu pinakapuno a saserdote, pinisad na u damit na sakay kinagi na, “I inupos na atod ay awan ti galang tu Diyos! Awan tamon kailangan u magsestigo pa. Nasaneg moy u páglapastangan na tu Diyos!

⁶⁶ Anya ti palagay moye?” Timmábbeg hide, “Te kasalanan siya, dapat siya a matay!”

⁶⁷ Sakay niluktaben de siya tu hupa na sakay sinasuntok. Dinapang be siya nu agum

⁶⁸ sakay kinagi de, “Cristo, hulaan mo ni ti deya u nangdapang niko?”

Impamen ni Pedro ti Jesus

⁶⁹ Alay ni Pedro a naggetnud tu sural, inadeniyan siya nu essa a utusan a bábbey sakay kinagi na, “Kaguman ka be ni Jesus a taga-Galilea, awan beman?”

⁷⁰ Pero impamen na iye tu atubang nu kakpalan. “Awannák ti tukoy ti kákkagikagiyan mowe,” tábbeg na.

⁷¹ Sakay limmuwas ti Pedro. Netan siya nu essa pa a utusan a bábbey sakay kinagi na tu atoy hod, “I lállakeyan iye ay kaguman ni Jesus a taga Nazaret.”

⁷² Nagpamen a huway ti Pedro “Magpanantowák a awan ko matengge i tolayan ina.”

⁷³ Awan malay ay ummadeni ni Pedro u lállake hide a atoy hod. Kinagi de, “Essa ka ngane nide. Matenggi tu paggupos mo.”

⁷⁴ “Maski matayyák pa ay talaga a awan ko matengge i tolayan ina,” tábbeg ni Pedro. Siya be u pagtarakket nu manok.

⁷⁵ Sakay naalala ni Pedro u kinagi ni Jesus, “Bago a magtarakket u manok, pentállowák mo a ipamen.” Sakay lumuwas ti Pedro sakay nagsanget ti husto.