Mateo 25 - U Maganda A Baheta Ni Jesu-Cristo

U Talinghaga Tungkol tu Sapulo a Mámmadiket

¹ Kinagi pa ni Jesus “Kona he a talinghaga a mepareho u kahariyan nu Diyos: Te sapulo a mámmadiket a amigo nu ikasal hide. Ayon tu kaugalian de, tu aldew nu kasal ay tagbuwan de u lállake a ikasal a te tawed u bawat essa nide a simbuwan.

² U limma nide ay mágkalalaki sakay u limma ay awan ti tukoy.

³ Dipo u awan hide ti tukoy ay nagtawed hide ti simbuwan de pero awan nagtawed ti reserba a gas.

⁴ Pero u mágkalalaki ay nagtawed ti gaas bukod pa tu atoy tu simbuwan de.

⁵ Nalay a dimmemát u lállake a ikasal, kanya nágtonka dán hide a atanan sakay netidug.”

⁶ “Pero nikuna hatinggabi dán ay te pimmakhaw ‘Atoy dán u lállake a ikasal! Tumagbu kamon!’

⁷ Pagdaka ummikat u sapulo a mámmadiket sakay inayos de u bawat simbuwan de.

⁸ Kinagi nu awan hide ti tukoy tu magkalalaki hide, ‘Atádden moy kami ped ti gaas. Mággadáp-adáp dán u simbuwan mi hide.’

⁹ ‘Makay awan magkasiya i gaas miyáy nikitam a atanan,’ tábbeg nu magkalalaki hide. ‘Mapiyya pa ay umangay kam pa tu tindaan sakay mamali ti kao moy.’

¹⁰ Kaya lummakad u limma a awan ti tukoy a mámmadiket. Alay de a namali, dimmemát u lállake a ikasal. U limma a nakahanda ay kaguman nu lállake a ikasal a nakasáddáp tu kasalan. Sakay insirado de u pintuwan nu bilay.”

¹¹ “Káttapos, dinumemát be u limma a awan ti tukoy a mámmadiket. ‘Panginoon, pasáddáppán moy kami ped!’ nagdulaw hide.

¹² Pero timmábbeg siya, ‘Talaga kagiyan ko nikam: awan ta kam matetenggi.’”

¹³ Kinagi ni Jesus “Kaya magbantay kam, dipo awan moy tukoy u aldew oni u panahon.”

U Talinghaga Tungkol tu Alipin Hide a Pinagkatiwalaan ti Pilak

¹⁴ Kinagi pa ni Jesus “U pághare nu Diyos ay mepareho be ti iye a talinghaga: Te essa a tolay a te plano a magbiyahe kanya dinulaw na u utusan na hide sakay impagkatiwala na nide u ari-arian na.

¹⁵ Inatádden na ti pilak u kada essa ayon tu kanya-kanya na a kakayahan: inatádden na u essa ti limma a libo a piso, u essa be ay duwwa a libo sakay u essa be ay essa a libo Káttapos ay hinumektat siya.

¹⁶ Lummakad a pagdaka u nakaalap ti limma a libo a piso sakay nagnegosyo siya. Sakay timmubo u pilak na ti limma a libo a piso be.

¹⁷ Kona labe tu nakaalap ti duwwa a libo ay tummubo be u pilak na ti duwwa a libo.

¹⁸ Pero u nakaalap ti essa a libo ay nagkali tu luta sakay intago na u pilak nu amo na.

¹⁹ Kállipas nu malay a panahon, sinumoli u amo nu utusan hide sakay nagkuwenta hide.

²⁰ Ummadeni u nakaalap ti limma a libo a piso sakay kinagi na, ‘Panginoon, sa iye u limma a libo a piso a intád mo nikán. Sakay sa iye be u limma a libo a piso a tinubo ko.’

²¹ Kinagi nikuna nu amo na, ‘Malalaki! Tapat sakay mabait a utusan! Dipo nagin matapat ka tu badit a halaga, mamahala ka tu dakal a halaga. Sumáddáp ka sakay mákpagkasayaan ka nikán!’

²² Ummadeni be u nakaalap ti duwwa a libo sakay kinagi na, ‘Panginoon, sa iye u intád mo nikán a duwwa a libo. Sakay sa be iye u duwwa a libo a tinubo ko.’

²³ Kinagi nu amo na, ‘Malalaki! Tapat sakay mabait a utusan! Nagin matapat ka tu badit a halaga kanya mamahala ka tu dakal a halaga. Sumáddáp ka sakay mákpagkasayaan ka nikán!’

²⁴ Sakay ummadeni be u nakaalap ti essa a libo. Kinagi na ‘Tukoy ko a hiko ay mahigpit. Maggapas ka tu awan mo immula sakay maggani ka tu awan mo intalok.

²⁵ Nantengák kanya inkali ko dálla tu luta u pilak mo. Atoy la u essa mo a libo.’

²⁶ ‘Madukás sakay tamad a utusan!’ tábbeg nu amo na. ‘Tukoy mo bál a maggapasák tu awan ko inmula sakay maggani tu awan ko intalok!

²⁷ Bakin awan mo ina indiposito tu bilay a págdipositowán ti pilak, nakwa te naalapák a tubo nadid?

²⁸ Alapan moy nikuna u essa a libo sakay iyatád tu te 10,000.

²⁹ Dipo u tehhod ay atádden pa sakay magsosobra pa. Pero u awan, maski u badit a atoy nikuna ay alapán pa.

³⁰ Iyangay moy tu kadihámman tu luwas u utusan a awan ti kabuluhan. Hod siya a magsanget sakay magaadoyan.’”

U Pághukom

³¹ Sakay kinagi pa ni Jesus “Dumemát u Anak nu Tolay bilang Hari, kaguman na u atanan a anghel. Sakay maghare siya tu atanan.

³² Ti panahon an itod, maipon tu atubang na u atanan a tolay. Hide ay paghiwahiwalayan na. Kapareho nu gággimitán nu pastol hide tu tupa sakay kambing hide.

³³ Idátton na tu kawanan na u tupa hide sakay tu kawihi na u kambing hide.

³⁴ Sakay kagiyan ko tu atoy hide tu kawanan ko, ‘Kamon he, hikam a pinagpala nu Ama ko! Mágyan kam tu kaharian a inhanda para nikam sapul pa nikuna ginimet u mundo.

³⁵ Dipo hikán ay nagaláp pero pinakan moy, nauwaw pero pinainom moy. Hikán ay nagin dayo tu banuwan moy tapos pinatulosák moy ti maganda.

³⁶ Hikán ay awan ti mesulot pero ináttadden moy ti damit. Nagkasakiták tapos inasikasoák moy. Hikán ay nepiriso tapos binisita moy.’

³⁷ Tummábbeg u malinis hide, ‘Panginoon, nikan mi ka a netan a nagaláp sakay pinakan mi? Oni nauwaw sakay pinainom mi?

³⁸ Nikan ka nagin dayo sakay pinatulos mi? Oni kaya awan ti mesulot sakay ináttadden mi ti damit?

³⁹ Sakay nikan mi ka a netan a te sakit o atoy tu piresuwan sakay inasikaso mi?’

⁴⁰ Sakay tábbegan ko hide, ‘Talaga a kagiyan ko nikam: nikuna ginimet moy iye tu pinakamababa hide a kákkapatkákka ko ay bilang hikán u kinagbiyan moy.’

⁴¹ Sakay kagiyan ko be tu atoy hide tu kawihi, ‘Umadeyo kam nikán a binusong nu Diyos! Hikam ay meangay tu apoy a awan maadápadáp a inhanda para ni Satanas sakay tu demonyo na hide.

⁴² Dipo hikán ay nagaláp pero awannák moy pinakan, nauwaw pero awannák moy pinainom.

⁴³ Hikán ay nagin dayo tu banuwan moy pero awannák moy pinatulos ti maganda. Hikán ay awan ti mesulot pero awannák moy ináttadden ti damit. Nagkasakiták pero awanák moy inasikaso. Hikán ay nepiriso pero awannák moy binisita.’

⁴⁴ Sakay tummábbeg be hide, ‘Panginoon, nikan mi ka a netan a nagaláp oni nauwaw oni nagin dayo oni nawanan ti mesulot oni te sakit oni atoy tu piresuwan sakay awan mi ka pinagserbiyán?’

⁴⁵ Sakay kagiyan ko nide, ‘Talaga a kagiyan ko nikam: nikuna awan moy kinagbiyan a tulungan u pinakamababa hide a kapatkákka ko ay bilang hikán u awan moy kinagbiyan.’”

⁴⁶ Kinagi pa ni Jesus “Iyangay hide tu kaparusaan a awan ti katapusan pero u malinis hide ay makatanggap ti biyag a awan ti katapusan.”