Mateo 23 - U Maganda A Baheta Ni Jesu-Cristo

Magingat tu Maisto nu Kautusan sakay tu Pariseo Hide

¹ Nadid káttapos ay kinagi ni Jesus tu tolay hide sakay tu disepulus na hide,

² “U maisto hide nu Kautusan ni Moises sakay u Pariseo hide u tinenggi a tagapaliwanag nu Kautusan

³ Kaya gimetan moy u itáttoldo de sakay sunudán moy u inyutos de. Pero dyan moy ahigán u gimet de dipo awan de gimetán u itáttoldo de.

⁴ Naghanda hide ti madágge a karga sakay pinabaklay de tu tolay hide pero maski ni toldo man ay umád de iyahikad para tumulong.

⁵ Puro a pagpakunware u gimet de hide. Pinalabang de u págdattonan de ti bersikulo de sakay pinaatakdug de u garayan nu damit de hide para mapansin hide nu tolay a mágserbi hide tu Diyos.

⁶ U gugusto di ay hide u paetnudán tu págetnudan a para tu mataas a tolay tu handaan sakay u pinakanimportante a lugar tu sinagoga hide.

⁷ U gusto di pa ay igalang hide tu kakarsada sakay dulawan hide a maisto nu tolay hide.

⁸ Pero hikam ay dyan kam padulaw a maisto dipo essa la u Maisto moy sakay hikam a atanan ay matkaka.

⁹ Sakay dyan moy dulawan a ama u deya man a tolay tu luta dipo essa la u Ama moy, u Ama a atoy ti langit.

¹⁰ Dyan kam padulaw a amo dipo essa la u amo moy, u Mesias.

¹¹ U pinakamataas nikam ay dapat u magin utusan moy.

¹² U nagpakataas ay medibbe sakay u nagpakababa ay melangkaw.”

Pinagkagiyan ni Jesus U Maisto Hide Nu Kautusan sakay U Pariseo Hide

¹³ Nadid pinagkagiyan ni Jesus u maisto hide nu Kautusan ni Moises sakay u Pariseo hide, “Kakagbi kam! Mapagkunware kam! Hadlangán moy u tolay hide para awan hide mapaghariyán nu Diyos. Umád moy a magpasakop tu pághare nu Diyos ay hadlangan moy pa u masoh a magpasakop!

¹⁴ Kakagbi kam sakay mapagkunware kam! Inalap moy u ariarian nu bábbey a bilo sakay u págdasal moy ay pinaatakdug moy para awan de mahalata u págkunware moy! Dipo tu gimet moy a iye ay lalo pa a dumagge u parusa moy!

¹⁵ Kakagbi kam a talaga, maisto hide nu Kautusan ni Moises sakay Pariseo hide! Mapagkunware kam! Ahabisan moy u diget sakay angayan u iba a bansa, makaakit kam la ti essa a awan maniwala tu relihiyon moy. Sakay ni maakit moy dán ay ginimet moy pa a mas madukás nan nikam. Kanya nagin doble u dahilan para siya ay parusaan ti impiyerno.

¹⁶ Kakagbi kam, buhák a tagagiyya! Itáttoldo moy a ni manumpa ka tu ngahan nu Templo ay maari mo a awan tupadán u panantu mo. Pero ni manumpa ka tu ginto nu Templo ay dapat mo a tupadán u panantu mo.

¹⁷ Loko kam a buhák! Awan kam talaga ti tukoy! Anya u mas mahalaga, u ginto oni u Templo a nángpalinis tu ginto?

¹⁸ Kagiyan moy pa be a ni ti deya man u manumpa tu págalayan ay maari a awan tupadán u panantu na. Pero ni manumpa ka tu alay a atoy tu pággalayan, dapat mo a tupadán u panantu mo.

¹⁹ Awan moy talaga naintendiyán! Anya beman u mas mahalaga, u alay oni u pággalayan a nángpalinis tu alay?

²⁰ Kaya ni nanumpa ka tu págalayan ay bilang nanumpa ka dán be tu atanan nu alay a hod hod.

²¹ Ni nanumpa ka tu ngahan nu Templo ay bilang nanumpa ka dán be tu ngahan nu Diyos a mágyan hod.

²² Sakay ni ipinanumpa ni ti deya man u langit, ipinanumpa na u págyanan nu Diyos sakay u Diyos a mismo.

²³ Kakagbi kam, maisto hide nu Kautusan ni Moises sakay Pariseo hide! Mapagkunware kam! Inyatád moy u ikapo maski u págrekado a awan ti halaga pero kinalimunan moy a igimet u mas lalo a mahalaga a adal tu Kautusan: Hikam ay magin pantay tu atanan a bagay, u magin makakagbiyan sakay u katapatan. Tama ngane a mag-ikapo kam pero dyan moy be kalimunan a gimetan u mas mahalaga tu Kautusan.

²⁴ Buhák kam a tagagiyya! Ibut moy u langaw tu ainuman moy pero itallán moy u maski u dakal a hayop konna tu kamelyo!

²⁵ Kakagbi kam, maisto hide nu Kautusan ni Moises sakay Pariseo hide! Mapagkunware kam! Lalinisán moy u luwas nu tasa sakay nu penggan moy pero u disalad nu puso moy ay putat ti daya, dámmot sakay págsamantala.

²⁶ Buhák kam Pariseo hide! Linisán moy pa u atoy disalad nu tasa sakay nu penggan moy sakay magin malinis labe u luwas!

²⁷ Kakagbi kam, maisto hide nu Kautusan ni Moises sakay Pariseo hide! Mapagkunware kam! U kapareho moy hide ay u pantiyong a pinaganda, maganda ngane tu luwas pero ti disalad ay putat ti buyok sakay tulang.

²⁸ Talaga konna kam tu páglábbángan! Tu pangeleng nu tolay ay magkabait kam pero u tatahoden, tunay kam a mapagkunware sakay madukás.”

Kinagi ni Jesus u Magin Parusa De

²⁹ Kinagi pa ni Jesus nide, “Kakagbi kam, maisto hide nu Kautusan ni Moises sakay Pariseo hide! Mapagkunware kam! Nagpagimet kam ti páglábbángan nu propeta hide a binuno nu nuno moy hide. Sakay dinikorasyonan moy u lábbáng de.

³⁰ Sakay kagiyan moy nadid, ‘Ni hikame nakwa u biyag tu kapanahonan nu nuno mi hide ay awan mi impabuno u propeta hide.’

³¹ Dipo ti kinagi moyan iye ay inamin moy a hikam u aapo hide nu nangpabuno tu propeta hide tu itod!

³² Sige! Tapusán moy u sinapulan nu nuno moy hide!

³³ Malinlang kam konna tu biklat! Awan kam talaga makaiwas, maparusaan kam ti impiyerno!

³⁴ Magpaangayyák nikam ti propeta hide, mágkalalaki a tolay sakay u maisto hide nu Kautusan ni Moises! Bunuwán moy u sangan nide sakay u agum ay ipako moy tu kudus. U agum ay haplitán moy tu sinagoga sakay u agum ay ehyokán moy tu banubanuwan tán madakáp moy.

³⁵ Dipo tu gimitán moy, dumemát nikam u parusa tu págbuno tu atanan nu tolay a matuwid tu buo a mundo. Magsapul tu págbuno tu awan ti kasalanan a ti Abel hanggan tu págbuno ni Zacarias a anak ni Baraquias. Binuno moy siya tu bállog nu págalayan sakay tu templo.

³⁶ Kagiyan ko nikam: u parusa nu atanan an iye ay meangay tu tolay hide tu kasalukuyan.”

U Págmahal ni Jesus ti Jerusalem

³⁷ Kinagi pa ni Jesus, “Jerusalem, Jerusalem! Pinabuno mo u propeta hide sakay bábbudasán moy u pinaangay nu Diyos nikam! Sangan a beses ko a sinikap a alagaan u mágyan niko, konna tu paglákáp nu essa a inahin tu sepsep na hide pero inadiyán mo.

³⁸ Kaya nadid ay pabayan nu Diyos u Templo moy sakay awan dán ti mágyan.

³⁹ Kagiyan ko nikam: Awannák moy ketan hanggan awan dumemát u odas a kagiyan moy, ‘Pagpalaán u dumemát tu ngahan nu Panginoon!’ ”