Mateo 22 - U Maganda A Baheta Ni Jesu-Cristo

U Talinghaga Tungkol tu Kasalan

¹ Nadid nagtoldo dámman ti Jesus tu pupuno nu Judio hide tu pamamagitan nu talinghaga. Kinagi na,

² “U pághare nu Diyos ay kapareho ni iye: Naghanda ti essa a handaan u essa a hare para tu kasal nu anak na a lállake.

³ Inutusan na u utusan na hide para akitan u naimbitaan hide pero umád de a mákpágkasayaan.

⁴ Huway siya nangutos ti iba a utusan hide sakay pinagbilinan a, ‘Kagiyan moy tu inimbitaan hide “Nehanda ko dán u handaan. Nabuno ko dán u baka ko hide, u pinatabe hide a bul-o sakay handa dán be u atanan a bagay. Kamon dán tu handaan!” ’

⁵ Pero awan iye pinansin nu naimbitaan hide. Immangay hide tu sadi-sadili de a angayan, u essa ay tu luta na sakay u essa ay tu negosyo na.

⁶ U agum ay ginábbu de u utusan hide, pinahirapan sakay binunu.

⁷ Naiyamut a tahod u hare. Pinaangay na u sundalo na hide, impabuno na u nangbuno hide sakay impatutod na u banuwan de.

⁸ Kinagi na tu utusan na hide, ‘Nakahanda dán u handaan, pero awan karapat-dapat u inimbitaan hide.

⁹ Kaya umangay kam tu kakarsada a makpal a tolay sakay imbitaan moy tu kasalan u atanan a ketan moy.’

¹⁰ Lummuwas ngane hide tu matolay a kakarsada u utusan hide sakay kinuyog u atanan a netan de, mágkadukás sakay mágkabait. Kanya naputat nu bisita hide u lugar a pagkasalan.

¹¹ Nikuna ilingán nu hare u bisita hide ay netan na hod u essa a tolay a awan nakadamit para tu handaan.

¹² ‘Barkada, bakin nakasaddap ka he a awan nakadamit ti maganda?’ tanong na. Awan ti nakagi u tolay.

¹³ Kaya kinagi nu hare tu utusan na hide ‘Gilotán moy u kamát na sakay tikád sakay itapduk siya tu pinakamadihám a lugar a hod tu luwas. Hod ay mághirap siya ti grabe sakay mággaadoyan’ ”.

¹⁴ Kaya kinagi ni Jesus “Dipo makpal u nadulawan pero sasangan u mapili.”

U Pagbayad tu Buwis

¹⁵ Nadid linumakad u Pariseo hide sakay pinágguhunan ni pakodya de madakáp ti Jesus tu tábbeg na hide.

¹⁶ Kaya pinaangay de nikuna u sangan tu disepulus de hide a kaguman u sangan a sakop ni hare Herodes. Kinagi de, “Maistu, tukoy mi a hiko ay matapat sakay itáttoldo mo u buo a tatahoden a gusto nu Diyos a gimetan nu tolay hide. Awan ka ti piliyán dipo pareho u pangileng mo tu atanan a tolay.

¹⁷ Anya wád tu palagay mo? Neayon beman tu Kautusan a magbuwes tu Hari a Cesar oni awan?”

¹⁸ Pero tukoy ni Jesus u plano de a madukás kanya kinagi na, “Mapagkunware kam! Bakin gustowák moy a linlangán?

¹⁹ Dah iyatád moy he nikán u pilak a págbuwes.” Sakay inatádden de siya.

²⁰ “Kandeya a hupa sakay ngahan u ketan he?” tanung ni Jesus.

²¹ “Kan hare a Cesar,” tábbeg de. Sakay kinagi na nide, “Ni konna hod, iyatád moy ni hare a Cesar u para ni hare a Cesar sakay tu Diyos u para tu Diyos.”

²² Nagtaka hide nikuna nasaneg de iye sakay linumakad hide.

Kákkabiyag a Huway

²³ Ti aldew labeyan itod ay immadeni ni Jesus u sangan a Saduseo hide. Hide u tolay a naniwala a awan biyagán a huway u natay hide. Kinagi de,

²⁴ “Maisto, intoldo ni Moises a ni matay a awan ti anak u essa a lállake, u kapatkaka na u dapat mangkabanga tu bilo para magkaanak hide para tu natay.

²⁵ Tu itod ay te pitto a matkaka a lállake he nikami. Nakkabanga u panganay sakay natay a awan ti anak kanya kinabanga u kabanga na nu kasunod a kapatkakka na.

²⁶ Kona labe u nangyari tu kaduwwa, tu kátallo hanggan tu kápitto. Natay hide a atanan.

²⁷ Káttapos ay natay be u bábbey.

²⁸ Deya tu pitto u magin kabanga na tu huway a kákkabiyag dipo siya ay nakabanga de a atanan?”

²⁹ Timmábbeg ti Jesus, “Liwat kam a tahod, dipo awan moy tukoy u Kasulatan hide oni u kapangyariyan nu Diyos.

³⁰ Dipo tu huway a kákkabiyag, u tolay hide ay awan mákkabanga; hide ay magin kapareho nu anghel hide ti langit.

³¹ Tungkol be tu huway a kákkabiyag, awan moy padla beman nabasa tu Kasulatan u kinagi nikam nu Diyos? Kinagi na,

³² ‘Hikán u Diyos ni Abraham, Diyos ni Isaac sakay Diyos ni Jacob.’ U Diyos ay bakán a Diyos nu patay, ni awan nu biyag hide.”

³³ Sakay nikuna nasaneg iye nu tolay hide ay nagtaka hide tu toldo na.

U Pinakamahalaga a Utos

³⁴ Nagipun-ipon u Pariseo hide nikuna nabaheta de a napatahimik ni Jesus u Saduseo hide. Sakay nagisip hide ti itanong de ni Jesus.

³⁵ Sakay essa nide a malalaki tu Kautusan, u nagtanung ni Jesus para purbaan siya.

³⁶ “Maisto, anya u pinakamahalaga a utos tu Kautusan?”

³⁷ Timmábbeg ti Jesus, “Mahalán mo u Panginoon mo a Diyos ti buo a puso, ti buo a kaliduwa sakay ti buo a isip.

³⁸ Sa iye u pinakamahalaga a utos.

³⁹ Sa be iye u kaduwwa: Mahalán mo u kapareho mo konna tu pagmahal mo tu sadili mo.

⁴⁰ U duwwa a utos a iye u ginábwatan nu buo a Kautusan ni Moises sakay u toldo nu propeta hide.”

U Tanong ni Jesus Tungkol tu “Anak ni David”

⁴¹ Tinanung ni Jesus u napisan hide a Pariseo:

⁴² “Anya u pákkatukoy moy tungkol tu Mesias? Kan deya siya a lahi?” “Ni Hari David,” tábbeg de.

⁴³ “Ni konna hod,” kagi ni Jesus, “bakin dimmulaw nikuna a Panginoon ti David nikuna inggiyya siya nu Ispiritu? U kinagi na,

⁴⁴ Kinagi nu Panginoon ko tu Panginoon, ‘Umetnud ka tu kawanan ko, hanggan a mapasuko ko niko u atanan a kadima mo hide.’

⁴⁵ Ti David mismo u dimmulaw nikuna a Panginoon; kodya a makagi a lahi ni David u Mesias?”

⁴⁶ Ni essa man nide ay awan ti makatábbeg nikuna. Sakay sapul hod awan dán ti nangahas a magtanung nikuna.