Mateo 21 - U Maganda A Baheta Ni Jesu-Cristo

U Matagumpay a Kasáddap ti Jerusalem

¹ Nadid nikuna adeni dán ti Jesus sakay u disepulus na hide ti Jerusalem ay umimang hide ti Betfage, tu Buked nu Olibo hide. Pinadipalongo ni Jesus u duwwa a disepulus.

² Kinagi na nide, “Angay kam tu sumunud a banuwan. Metan moy hod u essa a inahin a asno a nakaegut, kaguman u bul-o na. Lukasán moy sakay iyangay moy he.

³ Ni te magtanong nikam, kagiyan moy la a kailangan nu Panginoon me. Sakay pagdaka na itod a ipatawed nikam.”

⁴ Nangyari iye tánni matupad u kinagi nu propeta tu itod:

⁵ “Kagiyán moy tu taga banuwan nu Sion, ‘Ilengan moy, pademát dán u hare moy. Siya ay mapagpakumbaba; nakasakay la tu essa a bul-o nu asno.’ ”

⁶ Immangay ngane u duwwa a disepulus sakay ginimet u inyutos ni Jesus.

⁷ Inyangay de u inahin a asno sakay u bul-o ni Jesus. Sakay insapin de tu adag nu asno hide u alikáb-káb de sakay simmakay ti Jesus.

⁸ Bilang paggalang ay makpal a naglatag tu alikáb-kab de tu dilan; u agum be ay nangkáttol hide ti babbadit a pinget nu kayo sakay inlatag di be tu dilan.

⁹ Nagpakhaw u tolay hide tu dipalongo sakay u umunonod nikuna: “Puriyan u Anak ni David! Pagpalaán u dumemát bilang tagapágserbi nu Panginoon! Puriyan u Diyos!”

¹⁰ Kássáddap ni Jesus ti Jerusalem, nagulo u buo a banuwan. “Deya wád iye?” namágtanungan hide.

¹¹ “Ti Jesus, u propeta a taga Nazaret a Galilea,” tábbeg be nu kakpalan.

Nilinis u Templo

¹² Sakay simmáddap ti Jesus tu templo. Pinaluwas na u naglako hide sakay u namali hod. Impasakab na u lamesaan hide nu tagapalit ti pilak sakay u pagetnudan nu naglako hide ti kalapate.

¹³ Kinagi na, “Nesulat tu Kasulatan: U bilay nu Diyos ay madulaw a lugar nu págdasalan. Pero ginimet moy a lugar nu mágtakaw hide.”

¹⁴ Te buhák sakay pilay hide a inyangay de ni Jesus tu templo sakay pinagpiyya na hide.

¹⁵ Naiyamut u pupuno hide nu saserdote hide sakay u maisto hide nu Kautusan ni Moises nikuna netan de u kababalaghan a ginimet na, sakay u anak hide a magpákhaw tu disalad nu templo, “Pagpalaán nu Diyos u Anak ni David!”

¹⁶ Sakay tinanong de ti Jesus, “Nasaneg mo beman u kagiyan de?” “Nasaneg ko,” tábbeg ni Jesus. “Awan moy beman nabasa u nesulat tu Kasulatan ‘Tinolduwan mo u anak hide sakay u sumuso palla hide a magpuri niko.’ ”

¹⁷ Hinumektat ti Jesus tu banuwan sakay nanamo ti Betania. Hod siya a nagpalipas ti gibi.

Binusung u Kayo nu Igos

¹⁸ Tu dimadimang, nikuna a pasoli ti Jesus tu banuwan ay nagaláp siya.

¹⁹ Netan na u essa a kayo nu igos tu degdig nu dilan sakay inadeniyan na iye. Pero awan siya ti netan a bunga ni awan u duuduun na la. Kaya kinagi na tu kayo nu igos, “Awan ka dán magbunga magpakahanggan!” Sakay pagdaka a nalanás iye.

²⁰ Nikuna netan iye nu disepulus na hide ay naluktut hide. “Kodya a nalanás a pagdaka u kayo nu igos?” tanong de.

²¹ Timmábbeg ti Jesus, “Pakatandaan moy iye: ni te pánnampalataya kam tu Diyos sakay awan kam magalinlangan ay magimet moy be u ginimet ko tu kayo nu igos a iye. Bakán la a iye u magimet moy! Ni kagiyan moy tu buked a iye, ‘Lumakad ka hina; lumukso ka tu diget,’ ay mangyari u kinagi moy.

²² Sakay anya man u agidan moy tu panalangin ay maalap moy, ni naniwala kam.”

Pagalinlangan tu Kapanyariyan ni Jesus

²³ Nadid simmádap dámman ti Jesus tu templo. Alay na a nagtoldo, immadeni nikuna u pupuno nu saserdote hide sakay u pinuno nu banuwan sakay tinanong di siya, “Anya u karapatan mo a maggimet ti hide iye a bagay? Deya u nangatad niko ti kapangyariyan?”

²⁴ Timmábbeg ti Jesus, “Tanongán takam be. Ni tábbegánnák moy ay kagiyan ko be nikam ni deya u nangatád nikán ti kapangyariyan a maggimet ti iye hide a bagay.

²⁵ Deya u nangatád ti kapangyariyan ni Juan para magbawtismo, u Diyos beman oni u tolay?” Sakay namágguhon hide “Ni kagiyan tam a gábwat tu Diyos, ay kagiyan na bi nikitam, ‘Bakin awan moy siya pinaniwalaan?’

²⁶ Pero ni kagiyan tam be a gábwat tu tolay, makay be ni anya u gimetan nikitam nu totolay tu banuwan. Dipo tenggiyan de a ti Juan ay essa a propeta.”

²⁷ Kaya tinábbeg de ti Jesus, “Awan mi tukoy!” Kinagi be ni Jesus, “Ni konna hod ay awan ko be tábbegan u tanong moy.”

U Talinghaga Tungkol tu Duwwa a Anak

²⁸ Nadid kinagi ni Jesus “Anya u palagay moy he? Te essa a tolay a te duwwa a anak a lállake. Ummadeni siya tu panganay sakay kinagi na, ‘Anak, angay ka magtrabaho tu ubasan nadid a aldew.’

²⁹ ‘Umad ko,’ tábbeg na. Pero nagbago u isip na sakay umangay labe.

³⁰ Ummadeni labe u ama tu kaduwwa sakay konna labe hod u kinagi na. ‘On,’ tábbeg na, pero awan be inumangay.

³¹ Deya tu duwwa u summunod tu gusto nu ama na?” “U panganay,” tábbeg de. Sakay kinagi nide ni Jesus, “Kagiyan ko nikam: u madukás hide a tagakolekta ti buwes sakay belyas hide ay mágdipalongo pa nan nikam a magpasakop tu pághare nu Diyos.

³² Dipo immangay nikam ti Juan sakay intoldo na u matuwid a biyag sakay awan moy siya pinaniwalaan. Pero pinaniwalaan siya nu madukás hide a tagakolekta ti buwes sakay tu belyas hide. Netan moy iye, pero awan kam padi nagsisi sakay naniwala nikuna.”

U Talinghaga nu Ubasan sakay U Mágmula Hide

³³ Nadid intulos ni Jesus u págtoldo na. “Sanigan moy u essa pa a talinghaga. Te essa a tolay a nagmula ti ubas tu luta na sakay kinudalan na. Naggimet siya hod ti pagpáspásan ti ubas. Sakay naggimet be siya ti essa a malangkaw a pagbantayan. Káttapos, inwahak na tu mágtarabaho u ubasan na sakay immangay siya tu iba a lugar.

³⁴ Nikuna a dimmemát u panahon nu sákbudas, pinaangay na u utusan na hide para alapán di u kabunong na.

³⁵ Pero ginábbu hide nu mágtarabaho hide; binálbág de u essa, binunu u kaduwwa, sakay binábbudas di be ti bito u katállo.

³⁶ Pinaangay dámman nu te kao u mas makpal a utusan, pero konna labe hod u ginimet nu mágtarabaho hide.

³⁷ Tu katapusan ay pinaangay na u anak a lállake. ‘Sigurado a igalang de u anak ko,’ inisip na.

³⁸ Pero nikuna netan nu magtrabaho hide u anak ay namagguhon hide, ‘Iye u tagapagmana. Kamon dán! Bunuwán tamon tán makao tam u mana na.’

³⁹ Kaya ginábbu di siya, inyangay tu luwas nu ubasan sakay binunu.”

⁴⁰ Káttapos nu talinghaga ay tinanung hide ni Jesus, “Kássoli nu te kao tu ubasan, anya wád u gimitán na tu mágtarabaho hide?”

⁴¹ Timmábbeg u pupuno hide, “Pahirapan sakay bunuwán na u mágkadukás a itod hide sakay ipatarabaho u ubasan tu iba a mangatád nikuna tu kabunong na tu panahon ni sákbudas.”

⁴² Tinanong hide ni Jesus, “Awan moy beman nabasa u nesulat tu Kasulatan? ‘U bito a inadeyan nu karpentero hide nu bilay, siya u nagin bito a pinakaposte nu bilay. Iye ay ginimet nu Panginoon sakay iye ay makataka-taka!’

⁴³ Kaya ngane kagiyan ko nikam: Bakán dán a hikam u pághariyan nu Diyos ni awan u bansa a magserbi nikuna ti matapat.

⁴⁴ U mesangdul ti bitowan iye ay mamogmog sakay mapassit u mehagnakan ni iye.”

⁴⁵ Nasaneg nu pupuno nu saserdote hide sakay nu Pariseo hide a u talinghaga hide ni Jesus sakay nabati de a hide u patamaan na.

⁴⁶ Dakáppan de nakwa siya, pero nanteng hide tu tolay, dipo tinenggi de a propeta ti Jesus.