Mateo 2 - U Maganda A Baheta Ni Jesu-Cristo

U Págdalaw nu Mágkalalaki Hide a Tolay ni Jesus

¹ Nadid tu panahun ni Hari Herodes, káttapos a neenak ti Jesus tu banuwan a Betlehem a sakup nu Judea ay te dummemát a sasangan a mágkalalaki a tolay ti Jerusalem a gábwat ti Sikatan.

² Nágtatanungán hide tu tolay hide a mágyan hod “Hádya a neenak u anak a magin Hari nu Judio hide? Netan me hod ti Sikatan a lummitaw u biton a tanda nu kákkaenak na. Kanya inumangay kami he para ipeta mi u págsamba me nikuna.”

³ Nikuna a nabaheta iye ni Hari Herodes ay naligalig siya pati be u katolayan ti Jerusalem.

⁴ Kanya pinisan na u atanan a pupuno nu saserdote hide sakay u maistu hide nu Kautusan ni Moises. Sakay tinanung na hide “Hádya beman a meenak u Cristo a inpanatu nu Diyos a magin hare nu tolay na hide?”

⁵ Tinábbeg de siya “Tu lugar a Betlehem a sakup ni Judea. Dipo konna he u kinagi nu Diyos tu itod a insulat nu essa a propeta,

⁶ ‘U lugar a Betlehem a sakup ti Juda ay mas tanyag nan tu agum a banuwan ti Juda, dipo hod a meenak u puno a mamahala sakay magpospos tu tolay ko hide a Israelita.’ ”

⁷ Káttapos a natukuyan iye ni Hari Herodes ay lihim na a pinadulaw u mágkalalaki hide a tolay a gábwat ti Sikatan. Tinukoy na nide ni nikan a lummitaw u biton tánni matukuyan na ni nikan a neenak u anak.

⁸ Sakay pinaangay na hide ti Betlehem sakay imbilin na nide “Kad moy dán, ehyukán moy ti hustu u anak. Pákketa moy nikuna ay ipakapospos moy nikán a pagdaka tánni angay ku be siya bisitaán sakay ipeta ko u págsamba ko nikuna.”

⁹ Káttapos ay limmakad hide. U biton a netan de ti hod tu Sikatan ay netan de dámman. Dimmipalongo u biton nide hanggan immimang tu tapat nu págyanan nu anak.

¹⁰ Tunay ti saya u mágkalalaki hide a tolay a gábwat ti Sikatan nikuna netan de a immimang u biton.

¹¹ Kássáddáp de tu bilay ay netan de u anak a kaguman nu ina na a ti Maria. Limmuhud hide sakay dinumapa bilang pággalang de nikuna. Káttapos ay inluwas de u regaregaro de sakay inyatád de nikuna u regaregaro de a ginto, pasáppot a suub sakay mira.

¹² Nadid linakad de u iba a dilan a soli tu bansa de dipo binawalan hide nu Diyos tu pamamagitan nu tagináp a dyan dán hide soli ni Herodes.

Gimminan ti Jose ti Egipto a Kaguman u Pamilya Na

¹³ Nadid nikuna nakahektat dán u Mágkalalaki hide a tolay ay pinumeta u essa a anghel nu Panginoon ni Jose tu tagináp na. Sakay kinagi na “Umikát ka dán Jose. Iyangay mo ti Egipto u matina mo sakay dyan kam lumakad hod hanggan awan ko kagiyán niko. Dipo ehyukán ni Herodes u anak para bunuwán.”

¹⁴ Kanya inumikat ti Jose sakay linumakad hide ti itona a gibi sakay inyangay na u matina na ti Egipto.

¹⁵ Sakay nágyan hide hod hanggan natay ti Herodes. Nangyari iye para matupad u impekagi nu Panginoon tu propeta na tu itod pa a “Dinulawan ko u anak ko a lumakad ti Egipto”.

Impabuno ni Herodes U Bábbadit Hide a Anak a Lállake

¹⁶ Nadid nikuna biyag padla ti Herodes sakay nakalakad dán di Jose ti Betlehem, natukuyan ni Herodes a naessaan siya nu bisita hide a gábwat ti Sikatan. Naiyamut siya a tahod. Kanya inutusan na u sundalo na hide a bunuwán de u atanan a anak a lállake a te idad a duwwa a taon sakay pababa a mágyan ti Betlehem sakay tu palebut na hide a lugar. U nagin giya na tu idad nu anak hide a bunuwán ay ayun tu natukuyan na a kinagi nu mágkalalake hide a tolay tu panahun nu kállitaw nu biton.

¹⁷ Kanya natupad u kinagi ni propeta Jeremias tu itod a

¹⁸ “Masaneg tu banuwan a Rama u mabegsák a sangetan. Sangitan nu apo hide ni Raquel u aanak de. Sala de a pahapahaán hide dipo nágkatay dán u anak de hide.”

Nagsoli di Jose ti Israel

¹⁹ Nadid nikuna a natay ti Herodes, ay te essa a anghel nu Panginoon a pinumeta tu tagináp ni Jose hod ti Egipto.

²⁰ Kinagi na “Jose umikat ka dán. Angay mu dán isole u páttena mo ti Israel dipo natay dán u gusto a mangbuno tu anak.”

²¹ Kanya inumikat ti Jose sakay nagsoli hide a máttama ti Israel.

²² Pero nikuna nabaheta ni Jose a u pinumalit ni Herodes bilang hare ti Judea ay u anak na a ti Arquelao ay nanteng siya a sumoli hod. Sakay binawalan siya nu Panginoon tu pamamagitan nu tagináp kanya immangay siya ti Galilea.

²³ Sakay nágyan hide ti Nazaret a sakup ni Galilea tánni matupad u kinagi nu propeta tu itod pa a “Mangahanan siya a taga Nazaret.”