Mateo 17 - U Maganda A Baheta Ni Jesu-Cristo

Nag-iba u Hupa ni Jesus

¹ Nadid kállipas nu annám a aldew, kinuyog ni Jesus ti Pedro sakay u matkaka a di Santiago sakay ti Juan. Tinohbuk de u essa a malangkaw a buked.

² Alay de a he hod ay netan de a nag-iba u hupa ni Jesus: dummemlag a kumán a aldew u hupa na sakay pimmudew a makasili u damit na.

³ Bigla a netan nu tállo a disepulus di Moises sakay Elias a nákpagguhon ni Jesus.

⁴ Kanya kinagi ni Pedro ni Jesus, “Panginoon, maganda a atoy kami. Ni gusto moy ay maggimet kami ti tállo a tolda: essa para niko, essa para ni Moises sakay essa para ni Elias.”

⁵ Nagupos padi siya nikuna a bigla a liniduman hide nu essa a makasili a diklam. Sakay gábwat hod ay te nagkagi, “Siya u pinakamahal ko a Anak a kinasayaan ko a tahod. Sanigan moy siya!”

⁶ Nikuna nasaneg nu disepulus na hide u boses ay nanteng hide sakay dinumapa hide.

⁷ Pero inadeniyan hide ni Jesus sakay kinahap, “Tumaknág kam,” kagi na, “dyan kam manteng!”

⁸ Nikuna inumileng hide ay awan hide ti iba a netan ni awan ti Jesus.

⁹ Alay de a dumegson tu buked, inyutos ni Jesus nide, “Dyan moy kagiyán ni ti deya man u pangitain hanggan a awan huway a mabiyag u Anak nu Tolay.”

¹⁰ Tinanung siya nu disepulus na hide, “Bakin a kagiyan nu maisto hide nu Kautusan ni Moises a kailangan pa a sumoli ti Elias?”

¹¹ Timmábbeg ti Jesus, “Tahod ngane a sumoli pa ti Elias para ihanda u atanan a bagay.

¹² Kagiyan ko nikam a immangay dán ti Elias, pero awan siya natenggi nu tolay hide. Sakay pinahirapan de siya. Konna labe hina a pahirapan de u Anak nu Tolay.”

¹³ Sakay naintendiyan dán nu disepulus na hide a ti Juan a Magbawtismo bál u gusto na kagiyan.

Pinagpiyya ni Jesus u Anak a Hinayop

¹⁴ Nadid kássoli di ay te dinemáttan hide a makpal a tolay. Ummadeni u essa a lállake sakay limmuhod tu atubang na sakay kinagi na,

¹⁵ “Panginoon, mahabag ka tu anak ko a lállake! Siya ay magpatay sakay mahirapan a tahod ni sumpongán. Dipo palagi siya a meangay tu apoy oni tu dinom.

¹⁶ Inyangay ko dán siya tu disepulus mo hide, pero awan de mapagpiyya.”

¹⁷ Timmábbeg ti Jesus, “Lahi kam a awan ti paniwala sakay maigát ti ulo! Hanggan nikanák moy dapat palagi a kakaguman? Hanggan nikan ta kam a pagtiisan? Iyangay moy he u anak!”

¹⁸ Pinagkagiyan ni Jesus u demonyo sakay lummuwas iye. Nagpiyya a pagdaka u anak.

¹⁹ Káttapos ay immadeni u disepulus na hide ni Jesus sakay nagtanong a awan ti agum a makasaneg, “Bakin awan mi mapalakad u demonyo?”

²⁰ Timmábbeg siya, “Dipo awan sapat u paniwala moy. Kagiyán ko nikam: ni magin kapareho la tu kadakál nu bukál nu mustasa u paniwala moy tu Diyos ay makagi moy tu buked a iye, ‘Umagton ka hod!’ sakay umagton iye. Awan ti bagay a awan moy magimet.

²¹ Pero u konna hod a kalase a demonyo ay awan mapalakad ni awan tu pamamagitan nu págdasal sakay págkulasyon.”

Huway a Kinagi ni Jesus u Tungkol tu Kákkatay Na

²² Nadid nikuna a napisan ti Galilea u disepulus na hide, kinagi nide ni Jesus, “U Anak nu Tolay ay itokyon

²³ sakay bunuwán de pero huway a mabiyag tu katállo a aldew.” Nikuna nasaneg di iye ay nalungkot hide a tahod.

Pagbayad Tu Buwis Para tu Templo

²⁴ Nadid kádemmát de ti Capernaum, immadeni ni Pedro u tagasingeh hide ti buwes para tu templo. Tinanong de siya, “Magbayad beman ti buwes para tu templo u maistu moy?”

²⁵ “On” tábbeg ni Pedro. Sakay nikuna dimmemát siya tu bilay ay nadipalonguwan siya ni Jesus a tinanong: “Anya beman u palagay mo Simon, kan deya magsingeh ti buwes u hare hide ti munduway? Tu sakup na hide oni tu taga iba hide a bansa?”

²⁶ “Tu taga iba hide a bansa,” tábbeg na. Kinagi ni Jesus, “Ni konna hod, awan dapat a magbayad u nasakupan na hide.

²⁷ Pero, para awan la hide ti makagi nikitam, angay ka tu minalno sakay magbahuwan ka. Sakay alapán mo u dipalongo a ikan a maalap mo. Pangángngakán mo u labi na sakay te ketan ka a pilak. Alapán mo sakay angay mu ibuwes para nikita.”