Mateo 16 - U Maganda A Baheta Ni Jesu-Cristo

Nangaged U Pariseo Hide Sakay U Saduseo Hide Ti Tanda

¹ Essa aldew immadeni ni Jesus u sasangan a Pariseo sakay Saduseo hide. Gusto de a purbaan ti Jesus kanya kinagi de a mángpeta siya ti essa a tanda a gábwat ti langet.

² Pero timmábbeg ti Jesus, “Ni adeni dán a sumahám u aldew ay kagiyán moy a ‘Magin maganda u panahun ni ilaw dipo dumideg u langet.’

³ Sakay ni ti dimadimang a tahod ay kagiyán moy a ‘Maguden nadid dipo madiklám u langet.’ Matukuyan moy u palatandaan ti langet pero awan moy natukuyan u palatandaan hide tu kasalukuyan a panahun.

⁴ Madukás kam a lahi sakay awan matapat tu Diyos! Nagehyok kam ti tanda pero awan ti ipeta nikam liban tu palatandaan a nangyari ni Jonas!” Sakay linakaden na hide.

U Mali a Adal nu Pariseo hide sakay Saduseo

⁵ Nadid nikuna a nakaahabes dán hide tu dilupot nu minalno ay nalimunan nu disepulus hide a magtawed ti tinapay.

⁶ Kinagi ni Jesus nide, “Mag-ingat kam tu págpaalsa nu Pariseo hide sakay Saduseo.”

⁷ Namágguhon u disepulus hide. Kinagi de, “Dipo wád a awan kitam ti tawed a tinapay kanya nakagi na itod.”

⁸ Natukuyan iye ni Jesus kanya tinanung na hide, “Bakin pinágguhunan moy a awan kam ti bilon a tinapay? Tunay ti kabadit u pánniwala moy!

⁹ Awan moy pa beman maintendiyan? Nalimunan moy dán beman nikuna hinati-hati ko u limma a tinapay para tu limma a libu a tolay? Sangan a balulang u tinapay a subra?

¹⁰ Kona labe tu pitto a tinapay para tu áppat a libu, sangan a dáddakkál a balulang a tinapay u sobra?

¹¹ Bakin awan moy padi maintendiyan a bakán a tungkul tu tinapay u kinagi ko? Mag-ingat kam tu págpaalsa nu Pariseo hide sakay Saduseo.”

¹² Sakay naintendiyan di dán a magingat bál hide tu adal nu Pariseo hide sakay Saduseo bakán a págpaalsa.

U Pahayag ni Pedro Tungkul ni Jesus

¹³ Nadid nikuna a dimmemát ti Jesus tu lugar ni Cesarea ti Filipos ay tinanung na u disepulus na hide, “Deya kan u Anak nu Tolay ayun tu tolay hide?”

¹⁴ Sakay timmábbeg hide, “U kagi nu agum ay ti Juan a Mágbawtismo ka kan. Kinagi be nu agum, ti Elias ka kan. Sakay te magkagi pa be a ti Jeremias ka kan oni essa tu propeta hide.”

¹⁵ “Ay hikam, ánya u makagi moy? Deya ák beman?” tanung na nide.

¹⁶ Timmábbeg ti Simon Pedro, “Hiko u Cristo, u Anak nu Diyos a biyag.”

¹⁷ Kinagi nikuna ni Jesus, “Pinagpala ka Simon a anak ni Jonas! Dipo iye a karunungan ay awan intoldu niko ni ti deya man a tolay nan impakapospos iye niko nu Ama ko a atoy ti langet.

¹⁸ Sakay kagiyán ku be niko a hiko ti Pedro sakay ti iye a bito u magin pundasyon nu pinili ko hide a tolay. Sakay awan ti makapangtalo maski u kapangyariyan ni Satanas.

¹⁹ Iyatád ku niko u susi hide tu kaharian ti langet: u ipagbawal mo ti lutaáy ay ipagbawal ti langet sakay u payagen mo ti lutaáy ay payagen bi ti langet”

²⁰ Sakay mahigpit na a binilinan u disepulus na hide a dyan kagiyán ni deya man a siya u Cristo.

Dipalongo a Págkagi ni Jesus Tungkul tu Kákkatay Na

²¹ Sapul hod ay impakapospos dán ni Jesus tu disepulus na hide a kailangan siya a umangay ti Jerusalem. Magdanas siya hod ti makpal a hirap tu kamát nu pinuno nu banuwan, pupuno nu saserdote hide sakay tu maisto hide nu Kautusan ni Moises. Sakay ipabuno de pa siya pero tu katállo a aldew ay huway siya a mabiyag.

²² Inakit siya ni Pedro tu essa a suluk sakay pinagkagiyan ti konna he: “Panginoon, dyan nakwa payagen nu Diyos a mangyari ina! Awan dapat a mangyare iye niko.”

²³ Pero kinagiyan siya ni Jesus, “Umadeyo ka Satanas! Essa ka a hadlang nikán. U isip mo ay bakán a tu Diyos nan kao nu tolay.”

²⁴ Kinagi ni Jesus tu disepulus na hide, “Ni deya u masoh a sumunod nikán ay limunán na u sadili na, báklayán na u kudus na sakay sumunud nikán.

²⁵ U mángkemot tu biyag na ay siya u mawanan pero u mag-alay tu biyag na para nikán ay siya u magkahod ti tunay a biyag.

²⁶ Anya u maalap nu essa a tolay ni makao na u buo a mundu pero ni u kapalit be ni iye ay u biyag na? Anya u maari a mebayad nu essa tolay para mesoli nikuna u biyag na?

²⁷ Dipo pademát u Anak nu Tolay a te kapangyariyan a gábwat tu Ama na sakay kaguman na u anghel hide. Ti panahunan itona ay hatulan na u kada tolay ayun tu ginimet na.

²⁸ Kagiyán ku nikam: te sangan he nikam a awan matay hanggan a awan de ketan u Anak nu Tolay a dumemát bilang Hari.”