Mateo 15 - U Maganda A Baheta Ni Jesu-Cristo

Mas Mahalaga U Utus Nu Diyos Nan Tu Utos Nu Nunu Hide

¹ Essa aldew te immangay ni Jesus a Pariseo hide sakay u Maisto hide nu Kautusan. Gábwat hide ti Jerusalem.

² Tinanung de ti Jesus “Bakin a labagán nu disepulus mo hide u kautusan nu nunu tam hide? Awan di ugisan u kamakamát de bagu a kuman ayun tu paraan a intoldu nu nunu tam hide.”

³ Tinábbeg hide ni Jesus “Bakin hikam, nilabag moy u kautusan nu Diyos para la masunud u utus nu nunu hide?

⁴ Halimbawa la, inyutus nu Diyos a ‘Igalang mo tama mo sakay tena mo,’ sakay inyutus na be a ‘Ni ti deya u magupos ti madukás laban nama na sakay tena na ay dapat ipabuno siya.’

⁵ Pero intoldu moy a ‘Awan dán kailangan a tulungan ti pilak u dáddakál ni u pilak ay iyatád dálla tu Diyos.’

⁶ Kanya dipo tu kautusan nu nunu ay awan nasunud u kautusan nu Diyos.

⁷ Mapagkunware kam. Tama u hula ni propeta Isaias tungkul nikam. Kinagi nu Diyos tu pamamag-itan na tu itod pa a

⁸ ‘Hide iye a tolay ay gumalang nikán tu labi di la pero tu isip de ay awan.

⁹ U págsamba de nikán ay awan ti kabuluhan dipo pinalitan de u kautusan ko tu kautusan de.’”

Intoldu ni Jesus Ni anya Talaga U Makapangpadangát tu Tolay

¹⁰ Sakay pinaadeni ni Jesus u tolay hide nikuna sakay kinagi na nide “Pakaintendiyán moy u kagiyán ku nikam.

¹¹ Bakán a tu isubu nu tolay u makapangpadangát nikuna tu Diyos nan u madukás a kagiyán na.”

¹² Mamayamaya ay immadene u disepulus hide ni Jesus nikuna sakay kinagi de “Nasakitan u Pariseo hide tu kinagi mo.”

¹³ Tinábbeg hide ni Jesus “Bagután nama ko a atoy ti langet u halaman hide a awan na inmula.

¹⁴ Pabayan moy hide, buhák hide a tagagiyya. Ni u buhák u maggiyya tu buhák ay pareho hide a matápduk tu ábbut.”

¹⁵ Sakay nagtanung ti Pedro “Ipaliwang ped nikame u kinagi mo a awan makapangpadangát tu Diyos u kanán nu essa a tolay.”

¹⁶ Timmábeg ti Jesus “Pati bál hikam ay awan moy naintendiyan u kinagi ko?

¹⁷ Atanan a kanán nu essa a tolay ay angay tu tiyan na sakay iyattay na.

¹⁸ Pero u madukás a upos ay gábwat tu makasalanan a puso ay itod u makapangpadangát tu tolay tu Diyos.

¹⁹ Dipo u gábwat tu puso u madukás a isip tu agum, pámmuno, pángngalunya, págtakaw, págsistigo ti kakabuliyan tu agum a tolay sakay págmetmet.

²⁰ Sa itod hide u makapangpadangát tu tolay, bakán a u kuman a awan nagguges ti kamát.”

U Dakál a Pánnampalataya nu Essa a Bábbey a Taga Canaan

²¹ Nadid hinumektat hod ti Jesus sakay immangay tu luta a adeni tu banuwan hide a Tiro sakay Sidon.

²² Hod ay te immadeni nikuna a bábbey a taga Canaan a mabegsák a magpakhaw a nákkekagbi nikuna “Panginoon a Anak ni David, kagbiyanák mu ped. U anak ko a bábbey ay hinayup. Pahirapan siya a tahod nu madukás a ispirito.”

²³ Pero awan la siya tinábbeg ni Jesus. Sakay inumadene ni Jesus u disepulus na hide sakay kinagi de “Palakadán mo siya, mahehaw a umunonod nikitam.”

²⁴ Kanya kinagiyan na u bábbey “Inutusanák nu ama ko para la tu netawtaw a tupa a Israelita hide, bakán a tu awan Israelita.”

²⁵ Pero inumadene u bábbey sakay limmuhud tu atubang na sakay kinagi na “Tulunganák mu ped Panginoon.”

²⁶ Timmábbeg ti Jesus “Awan karapatdapat a iyatád tu aso u dapat a kanán nu anak hide.”

²⁷ “Tahod ngane Panginoon, pero maski u aso hide ay maari a kuman tu mumo a netápduk tu lamisaan nu amo de,” tábbeg be nu bábbey.

²⁸ Kanya kinagi ni Jesus tu bábbey “Dakál u pánnampalataya mo. Tábbegán ko u inyohon mo nikán” Sakay ti itod be a panahun ay nagpiyya u anak na a bábbey.

Makpal a Pinagpiyya Ti Jesus

²⁹ Káttapos ay nagsole ti Jesus tu minalno nu Galilea. Tinohbuk na u essa a buked sakay inumetnod hod.

³⁰ Sakay inumangay nikuna u makpal a tahod a tolay a te tawed a pilay, buhák, bulol, sakay iba-iba pa a tolay a te sari-sare a saket. Iyadeni de hide ni Jesus sakay pinagpiyya hide ni Jesus a atanan.

³¹ Kanya nagtaka u tolay hide nikuna a netan de a makaupos dán u bulol, makalakad dán u pilay, sakay maketa dán u buhák. Sakay pinuri de u Diyos nu Israel dipo tu nangyare.

U Himala tu Págpakan ni Jesus tu Appat a Libu a Tolay

³² Nadid dinulawan ni Jesus u disepulus na hide sakay kinagi na nide “Kakagbi u tolay hide. Tállo dán hide a aldew a kakaguman tam, awan dán hide ti makan. Awan ko gusto a palakadán ku hide a magaláp makay pumatay hide tu dilan.”

³³ Nagtanung u disepulus na “Anya be ipakan tamay nide? Atoy kitam tu parang, makpal pa be hide.”

³⁴ Tinanung hide ni Jesus “Sangan a tinapay u tawed moy?” “Pitto a tinapay, sakay sasangan a bábbadit a ikan,” tábbeg nu disepulus na.

³⁵ Kanya inutusan na u tolay hide a umetnod.

³⁶ Sakay inalap na u pitto a tinapay sakay u ikan hide. Káttapos na a nagpasalamat tu Diyos ay tináppeng-táppeng na u tinapay hide sakay intád na tu disepulus na hide. Intagtag be nu disepulus na hide tu katolayan.

³⁷ Kimman u atanan sakay nabássog hide. Káttapos ay inhempás nu disepulus na u pitto a balulang a subra a tinapay.

³⁸ Atanan a kimman ay áppat a libu a lállake bukod pa tu bábbey sakay anak hide.

³⁹ Sakay káttapos ay pinasole ni Jesus u tolay hide tu bilabilay de. Sakay sinumakay siya tu abang a ummangay tu lugar nu Magadan.