Mateo 14 - U Maganda A Baheta Ni Jesu-Cristo

Akala ni Herodes Antipas a ti Jesus ay ti Juan a Mágbautismo a Nabiyag a Huway

¹ Nadid, tu panahun a itona ay nabaheta ni Hari Herodes Antipas a puno nu lugar a Galilea u ginimet ni Jesus.

² Kinagi na tu tagapayo na hide “Siya ti Juan a mágbawtismo a nabiyag a huway kanya makagimet siya ti ibaiba a himala.”

³ Dipo ti Herodes u nángpepireso sakay nangpabuno ni Juan bilang pabor na tu kabanga na a ti Herodias. Ti Herodias ay dati a kabanga nu kapatkákka ni Herodes a ti Felipe.

⁴ Bagu ti Juan a nepireso ay palagi na a pagkagiyan ti hare Herodes a “Awan ayun tu kautusan nu Diyos a kinabanga mo u kabanga nu kapatkákka mo.”

⁵ Maski gusto ni Herodes a ipabuno ti Juan ay awan na itod magimet dipo manteng siya tu katolayan. Dipo propeta u pangileng nu katolayan ni Juan. Kanya impepireso dálla ni Herodes ti Juan.

⁶ Pero nikuna nagkasayaan hide tu kákkeenak ni Herodes ay nagpalabas ti sayaw u anak a madiket ni Herodias. Nasayaan a tahod ti Herodes tu palabas.

⁷ Kanya nagpananto ti Herodes tu madiket a iyatád ni Herodes maski ánya man u agidán na.

⁸ Dipo tu utus nu ina na ay kinagi nu madiket ni Herodes a “Mahal a hare, gustu ko a iyatád mo nikán u ulo ni Juan a mágbawtismo a nakadátton tu dakál a penggan.”

⁹ Nikuna a nasaneg iye ni Herodes ay nalungkut siya pero awan siya ti magimet dipo nakapananto siya tu atubang nu makpal a bisita. Kanya inyutus na tu sundalo na a iyatád u inaged nu madiket.

¹⁰ Kanya naputulan ti Juan tu piresuwan.

¹¹ Sakay indátton de tu dakál a penggan u ulo na sakay inyatád de tu madiket. Káttapos ay inyatád nu madiket tu ina na.

¹² Sakay dummemát u disepulus hide ni Juan, inalap de u bangkay na sakay inlábbang de. Káttapos ay angay de inbaheta ni Jesus u nangyari ni Juan.

U Himala tu Págpakan ni Jesus tu Limma a Libu a Tolay

¹³ Nadid nikuna nasaneg iye ni Jesus ay sinumakay siya sakay u disepulus na hide tu essa a dakál a abang sakay inumangay tu essa a tahimik a lugar. Pero nikuna natukuyan iye nu tolay hide ay tinagubet de ti Jesus. Namaybay hide.

¹⁴ Nikuna inumawas ti Jesus ay hod dán hod u makpal a tolay a naguhay nikuna. Nikuna netan na u makpal a tolay ay kinagbiyan na hide. Sakay pinagpiyya na u te saket nide.

¹⁵ Nikuna pággapon dán ay immadene ni Jesus u disepulus na hide. Kinagi de nikuna “Panginoon, madiham dán sakay atoy kitam tu tahimik a lugar a adeyo. Palakadán mu dán i tolayáy hide para mamali hide ti kanán de tu adene a babaryo.”

¹⁶ Timmábbeg ti Jesus “Awan hide kailangan a lumakad. Hikam u mangatád nide ti makan.”

¹⁷ Pero timmábbeg hide “Kodya mi hide a pakanán? Te limma kami la a tinapay sakay duwwa a ikan a sinahab.”

¹⁸ “Dah, iyatád moy nikán,” tábbeg ni Jesus.

¹⁹ Káttapos ay pinaetnod ni Jesus u katolayan hide tu kalamonan. Inalap na u limma a tinapay sakay duwwa a ikan sakay tummangngad ti langet. Nagpasalamat siya tu Diyos sakay tináppeng-táppeng na u tinapay. Kimmakpal u makan. Sakay intád na tu disepulus na hide sakay intagtag be nu disepulus na hide tu katolayan.

²⁰ Kimman u atanan sakay nabássog. Sakay inipun nu disepulus ni Jesus u nabuhay a pagkain a duwwa pulo a balulang.

²¹ U atanan a kimman ay limma a libo a lállake bukod pa tu bábbey hide sakay tu anak hide.

Naglakad ti Jesus tu dibbew nu Dinom

²² Káttapos ay pagdaka a pinasakay ni Jesus u disepulus na hide tu abang. Pinadipalongo na hide tu lugar a hod tu dibilew nu minalno alay na a pasoliyán u tolay hide tu bilabilay de.

²³ Káttapos na iye a ginimet ay inumangay siya tu essa a buked para manalangin. Inabut hod siya ni gibi.

²⁴ Alay a hod ni Jesus tu buked ay hod dán ti ditaw nu minalno u disepulus na hide. Nagkaproblema hide dipo dinemáttan hide ni mabegsák a dahugase sakay dummáddakkál u tagmák a tamo nide.

²⁵ Nikuna tamu dán a magamulaldew ay inumangay ti Jesus tu disepulus na hide. Linakad na u dibbew nu dinum tu minalno.

²⁶ Pero nikuna netan siya nu disepulus na hide a naglakad tu dibbew nu dinom ay nanteng hide a tahod. Pinumákhaw hide dipo tu ánteng de a “Multuwád ina.”

²⁷ Pero kinagi ni Jesus nide a pagdaka “Dyan kam manteng, hikán iye ti Jesus.”

²⁸ Sakay tinumábbeg ti Pedro, “Ni hiko ina Panginoon ay paangayánnák mo hina a maglakad tu dibbew nu dinom.”

²⁹ Timmábbeg ti Jesus “Sigi, angay ka he.” Kanya inumogsad ti Pedro sakay naglakad tu dibbew nu dinum a patamo ni Jesus.

³⁰ Pero nikuna a netan na u tagmák ay nanteng siya a tahod sakay utay-utay siya a ummállád. Pinumákhaw ti Pedro “Iligtasák mo Panginoon.”

³¹ Pagdaka a ginewat ni Jesus u kamát na sakay kinagi na nikuna “Bakin a nagalangan ka Pedro? Badit a tahod u pánniwala mu nikán.”

³² Nikuna sinumakay dán hide a duwwa tu abang ay immimang be u dahugase.

³³ Sinamba siya nu disepulus na hide, kinagi de “Talaga a hiko ngane u Anak nu Diyos.”

Pinagpiyya ni Jesus u Makpal a Tolay

³⁴ Nadid nikuna naahabes di dán u minalno ay dimmung hide tu lugar a Genesaret.

³⁵ Pákkatengge nu tolay hide ni Jesus ay imbaheta de tu atanan a banubanuwan hod a dummemát ti Jesus. Kanya iyangay nu tolay hide u atanan a te saket nikuna.

³⁶ Nákkekagbi u te saket hide a ni maari de a kahapán maski u garayan la nu damit na. U atanan a kumahap ay nagpiyya.