Mateo 12 - U Maganda A Baheta Ni Jesu-Cristo

Ti Jesus U Panginoon nu Aldew nu Káimang

¹ Essa Aldew nu Káimang nu Judio hide ay nagtaleb di Jesus tu bállog nu essa a katriguwan. Nagaláp u disepulus ni Jesus kaya nangalap hide tu bunga nu trigu sakay kinan de.

² Nikuna netan hide nu Pariseo hide ay kinagi de ni Jesus “Ilingán mo u gággimitán nu disepulus mo hide. Bawal ina tu Aldew nu Káimang.”

³ Tinábbeg hide ni Jesus “Awan moy beman nabasa u ginimet ni David sakay tu kaguman na hide nikuna a nagaláp hide?

⁴ Sináddáp na u Tabernakulo sakay kinan de u tinapay a inyalay tu Diyos. Bawal itod a kanán de ayun tu kautusun dipo u maari la a kuman hod ay u saserdote la hide.

⁵ O awan moy beman a nabasa be tu Kasulatan a u saserdote ay magtarabaho tu Aldew nu Káimang pero awan hide nagkasala?

⁶ Ikagi ku nikam a mas mataasák nan tu Templo.

⁷ Awan moy nakwa hinatulan u awan ti kasalanan ni naintendiyan moy la u kinagi nu Diyos a ‘Gusto ko a kagbiyan moy u tolay hide, bakán a u alay moy nikán.’

⁸ Dipo hikán a Anak nu Tolay ay u Panginoon nu Aldew nu Káimang.”

Pinagpiyya Ni Jesus U Kamát Nu Tolay Tu Aldew Nu Káimang

⁹ Nadid linakaden ni Jesus u katriguwan sakay immangay siya tu sinagoga di hod.

¹⁰ Hod ay naketa siya ti tolay a te essa a kamát a awan dán magahikad. Tinanung siya nu Pariseo hide tánni mabintang de siya “Maari wád tu Kautusan a magpapiyya tu te saket tu Aldew nu Káimang?”

¹¹ Tinábbeg na hide “Ni mara hikam ay neábbut u essa a tupa moy tu Aldew nu Káimang, awan moy beman iyawas u tupa moy tu ábbut?

¹² Mas mahalaga pa u tolay nan tu tupa. Kanya maari tu Kautusan a maggimet ti maganda tu Aldew nu Káimang.”

¹³ Sakay kinagi na tu tolay “Iyolnat mo i kamát mowe.” Inyolnat ngane nu tolay u kamát na sakay nagpiyya, nagin kapareho nu essa na a kamát.

¹⁴ Linumakad u Pariseo hide sakay namágguhonan de ni kodya de ti Jesus a bunuwán.

¹⁵ Pero tukoy ni Jesus u pinalano de kanya linakaden na itod a lugar. Makpal a tolay u umunonod nikuna sakay pinagpiyya na u atanan a te saket nide.

¹⁶ Inutusan na hide a dyan de siya ibábbaheta.

¹⁷ Atananan iye ay nangyare para matupad u kinagi nu Panginoon tu tolay tu itod tu pamamag-itan nu propeta na a ti Isaias.

¹⁸ U kinagi na ay “Sa iye u Utusan ko a napili ko. Mahal ko siya sakay siya u kinasayaan ko a tahod. Iyatád ko nikuna u Ispiritu ko sakay ibaheta na tu atanan a katolayan u hatul ko.

¹⁹ Awan siya mákpagdima, awan be siya maghangtet. Awan siya magpalalo tu kakarsada.

²⁰ Awan na pahirapan u mágkahina hide sakay tulungan na u pinakabadit ti pag-asa, hanggan a magtagumpay u katarungan.

²¹ Siya u pag-asa nu atanan a tolay.”

Binintang Ti Jesus nu Pariseo a Gábwat ni Satanas u Kapangyariyan Na

²² Nadid, te essa a tolay a hinayup a buhák sakay bulol pa be a inyangay de ni Jesus. Pinagpiyya ni Jesus u tolay kanya nakaupos sakay naketa dán.

²³ Nagtaka u atanan a tolay sakay kinagi de “Sa dáwwád iye u Anak ni David?”

²⁴ Pero nikuna nasaneg iye nu Pariseo hide ay kinagi de “Kanya mapalayas na u demonyo hide dipo inatádden siya ti kapangyariyan ni Satanas.”

²⁵ Dipo tukoy ni Jesus u inisip de ay kinagi na nide “Ni u totolay tu essa a kahariyan ay maggurugurupo sakay mamáglaban hide ay sigurado a masida u kahariyan. Sakay ni u totolay tu essa a banuwan oni bilay ay mamáglaban ay siguradu be a awan hide magkaessa. Awan hide ti abután.

²⁶ Kanya ni palayasán ni Satanas ti Satanas ay kalabanán na u sadili na. Masida u kahariyan na.

²⁷ Kagi moy a nagpalayasák ti demonyo dipo inatáddinák ti kapangyariyan ni Satanas. Kodya nadid u disepulus moy hide? Nagpalayas be hide ti demonyo. Kaya hide u magpatunay ni tama u kinagi moy patungkul nikán.

²⁸ Pero ni nagpalayasák ti demonyo tu kapangyariyan nu Ispiritu nu Diyos ay nagpatunay ina a dumemát dán nikam u pághari nu Diyos.

²⁹ Awan mo masáddáp sakay mapagtakawan u bilay nu essa a makapangyariyan a tolay ni hanggan awan mo siya mapungo. Ni mapungu mu dán siya ay maari mu dán a mapagtakawan u bilay na.

³⁰ Ni deya u awan tumulung nikán ay kontra nikán sakay ni deya u awan tumulung nikán a magpaipun ti tolay ay magpaadeyo nide.

³¹ Atanan a kasalanan oni pággupos ti madukás laban tu Diyos ay mapatawad pero u pággupos laban tu Banal a Ispiritu ay awan ti kapatawaden.

³² Sakay ni ti deya man u magupos laban nikán a Anak nu Tolay ay mapatawad nu Diyos pero u magupos laban tu Banal a Ispiritu ay awan mapatawad, magin nadid a panahun oni tu demodyan a aldew.”

³³ Kinagi pa ni Jesus “U kayu ay matukuyan tu bunga na. Ni alagaan mo u kayu ay magin maganda u bunga na hide peru ni awan mu siya alagaan ay magin madukás u bunga na hide.

³⁴ Hikam ay kumán a makamandag a biklat. Kodya u mágkadukás a tolay a konna nikam maari a magupos ti maganda? Dipo ni ánya u pirmi hod tu puso moy ay itod labe u lumuwas tu labi moy.

³⁵ U mabait a tolay ay magupos ti maganda dipo maganda u he tu isip na. Sakay u makasalanan a tolay ay magupos ti madukás dipo madukás u he tu isip na.

³⁶ Ikagi ko nikam a panagutan moy u bawat upos moy a madukás tu Aldew nu Pághukom.

³⁷ U iyupos moy nadid ay siya u gamitán a panghatul nikam ni maligtas kam oni awan.”

Magaged ti Himala U Pariseo Hide

³⁸ Tapos ay kinagi nu sasangan a Pariseo sakay Maisto nu Kautusan ni Jesus “Maistu, maari mo kami beman a petaan ti himala bilang purweba?”

³⁹ Timmábbeg ti Jesus “Hikam ay madukás sakay mapangalunya a katolayan ay magaged ti himala. U meatád ko la nikam ay u nangyari a himala ni Jonas tu itod.

⁴⁰ Konna ni Jonas a tállo a aldew sakay gibi a hod tu disalad nu tiyan nu dakál a tahod a ikan, ay hikán a Anak nu Tolay ay tállo be a aldew sakay gibi tu disalad nu luta.

⁴¹ Káddemát nu aldew nu pághatul nu Diyos ay tumaknág u taga Ninive sakay hatulan di kam. Dipo nagsisi hide nikuna tinolduwan hide ni Jonas. Sakay nadid mas mahigiták pa ni Jonas tapus awan kam pa magsisi.

⁴² Káddemát nu aldew nu pághatul nu Diyos ay tumaknág be u Reyna nu banuwan a Sheba sakay hatulan na kam. Dipo adeyo a lugar u ginábwatan na para la mágsaneg tu karunungan ni Solomon. Sakay nadid mas higiták pa ni Solomon tapos awanák moy sanigán.”

U Talinghaga Tungkul tu Madukás a Ispirito a Nagsole

⁴³ Kinagi pa ni Jesus tu Pariseo hide “Ni lumakad u essa a madukás a ispiritu tu essa a tolay ay umangay siya tu kaparangan sakay magehyok ti imangan. Ni awan siya maketa ay

⁴⁴ isipán na a ‘Magsoliyák dálla tu tolay a nilakaden ko.’ Káddemát na hod ay ketan na u dati na a páppágyanan a awan ti lasán, malinis sakay maayus dán.

⁴⁵ Kanya magehyok siya ti pitto a mas madukás pa nikuna sakay angay hide a atanan sumáddáp tu dati na a págyanan sakay mágyan hide hod. Kanya mas lalo a dumukás u kalagayan nu tolay nan tu date. Konna labe hina u magin karanasan moy dipo madukás kam a katolayan.”

Deya U Magin Pamilya ni Jesus?

⁴⁶ Nadid alay nu pággupos ni Jesus tu katolayan ay dummemát u ina sakay kapatkákka na hide a lállake. Nágtaknág hide tu luwas nu bilay sakay gusto de siya a uhunán.

⁴⁷ Kanya te nangkagi ni Jesus a atoy hide tu luwas sakay gusto de siya a uhunán.

⁴⁸ Pero timmábbeg ti Jesus “Deya u ina ko sakay kapatkákka ko hide a lállake?”

⁴⁹ Intoldu na u disepulus na hide sakay kinagi na “Hide iye u ina sakay kapatkákka ko hide.

⁵⁰ Dipo ni ti deya u tumupad tu kaluuben nu Ama ko ti langet ay siya u ina sakay kapatkákka ko hide.”