Mateo 10 - U Maganda A Baheta Ni Jesu-Cristo

Nagpili ti Jesus ti Sapulo ay ti Duwwa a Apostol

¹ Pinauwet ni Jesus u sapulo ay ti duwwa a disepulus na sakay inatádden na hide ti kapangyariyan a magpalayas ti madukás a ispirito. Inatádden na be hide ti kapangyariyan a magpapiyya tu atanan a sakisaket.

² Sa iye u ngahangahan nu sapulo ay ti duwwa a disepulus a nginahanan na be hide a apostol na: U purumero ay ti Simon, u palayaw na ay Pedro, ti Andres a kapatkákka ni Pedro, ti Santiago sakay ti Juan a anak ni Zebedeo,

³ ti Felipe sakay ti Bartolome, ti Tomas sakay ti Mateo a taga kolekta ti buwes, ti Santiago a anak ni Alfeo sakay ti Tadeo,

⁴ ti Simon a miyembro nu essa a grupo a gusto a mapalaya u Israelita hide tu taga Roma. Sakay ti Judas Iscariote a nángtokyon ni Jesus.

⁵ Inutusan sakay pinagbilinan hide ni Jesus a “Dyan kam umangay tu lugar nu awan hide Judio oni tu banuwan nu Samaritano hide.

⁶ Angay moy tolduwan u Israelita la hide, u netawtaw a tupa hide nu Diyos.

⁷ Itoldu moy nide a ‘Adeni dán a maghare u Diyos nikitam.’

⁸ Pagpiyyaán moy u te saket hide sakay biyagán moy u patay hide. Pagpiyyaán moy be u te ketong hide sakay palayasán moy u demonyo hide tu hinayup. Nakaalap kam a awan ti bayad kanya iyatád moy be a awan ti bayad.

⁹ Tu lakad moy ay dyan kam magtawed ti pilak,

¹⁰ págasákkan ti badu, pagbihisan, reserba a sinelas sakay sahukod dipo u manggagawa ay dapat la a pakanán nu pinagserbiyan na hide.”

¹¹ Sakay kinagi pa ni Jesus “Maski hádya man a banuwan o baryo u angayan moy ay magehyok kam ti tolay a karapatdapat a tulusan sakay hod kam a tumulos nikuna hanggan awan kam lumakad.

¹² Tu kassáddáp moy tu bilay na ay batiyán moy u makábbilay ti ‘Pagpalaán kam nu Diyos ti kapayapaan.’

¹³ Ni awan karapatdapat u mágyan hod ay bawiyán moy u bati moy pero ni karapatdapat hide ay dyan moy bawiyán.

¹⁴ Ni u tolay hide tu essa a bilay oni banuwan ay awan mágsaneg nikam ay ipagpag moy u alikabuk tu tikatikád moy sakay lakaden moy hide.

¹⁵ Pakatandaan moy iye: Tu Aldew nu Pághukom ay mas maparusaan nu Diyos u tolay hide a napagpagan moy ti alikabuk nan tu mágkadukás hide a tolay a mágyan tu itod a panahun tu banuwan a Sodoma sakay Gomorra.”

Dustaán nu Tolay Hide U Disepulus Hide ni Jesus

¹⁶ Kinagi pa ni Jesus tu sapulo ay ti duwwa a apostol na “Pakatandaan moy, paangayán takam tu tolay hide a umád nikán. Kumán kam a tupa a indátton tu bállog nu mágkatapang hide a hayup. Kanya ilagen moy hide konna tu biklat a alisto umilag dipo tukoy na a mepadukás siya. Pero magin mabait kam nide konna tu kalapate.

¹⁷ Magingat kam dipo ikasu di kam sakay haplitán di kam tu sinagoga de hide.

¹⁸ Dipo disepulus takam ay ikaso di kam be tu gubernador sakay tu hare hide. Siya dán itod u odas moy a magbahagi nide sakay tu awan hide Judio tungkul nikán.

¹⁹ Dyan kam mabalisa ni kodya kam a magupos oni ánya i ikagi moyay, dipo káddemát nu odas ay ipaisip nu Diyos u ikagi moy.

²⁰ Bakán a hikam u maggupos nan u Ispirito nu Ama tu pamamagitan moy.”

²¹ Sakay kinagi pa ni Jesus nide “Ipabuno nu kapatkákka na u kapatkákka na a mannámpalataya, konna labe u gimitán nu ama hide tu anak de hide. Magrebelde u anak hide tu dáddakál de sakay ipabuno de be.

²² Kaiyamutan di kam dipo tu pániwala moy nikán. Pero u matapat nikán hanggan matay ay siya la u maligtas.

²³ Ni dustaán di kam tu essa banuwan ay guminan kam tu iba. Kagiyán ku nikam a awan moy pa maangayan u atanan a banuwan ti Israel ay makademáták dán a Anak nu Tolay.”

²⁴ Kinagi pa ni Jesus nide “Awan ti disepulus a humigit pa tu tagapagtuldu na. U utusan be ay awan mataas tu amu na

²⁵ U madanas nu tagapagtoldu ay madanas labe nu disepulus na. Madanas labe nu utusan u madanas nu amo. Ni hikán a tagapagtoldu moy ay nginahanan de a Satanas mas grabe u ingahan de nikam a disepulus ko hide.”

Dyan Manteng ti Tolay, Manalig tu Diyos

²⁶ Kinagi pa ni Jesus nide “Kanya dyan kam manteng tu tolay hide. Awan ti netagu a awan meluwas sakay atanan a sekreto ay matukuyan.

²⁷ U atanan a kinagi ko nikam tu diham ay ikagi moy a atanan tu demlag sakay u nasaneg moy a inyanasas ko nikam ay ipákhaw moy para masaneg nu atanan.

²⁸ Sakay dyan moy kantingan u makabuno tu bággi moy pero awan makabuno tu kaliduwa nan dapat kantingan moy u Diyos a makabuno tu bággi sakay kaliduwa moy ti impiyerno.

²⁹ Awan beman mura la ni ilako u dignás hide? Maski mura la hide ay awan hide matay ni awan kaluuban nu Ama moy.

³⁰ Mas lalo u pangalaga na nikam, tukoy na u bilang nu buuk moy.

³¹ Kanya dyan kam manteng mas mahalaga kam tu Diyos kasera tu dignás hide.”

³² Kinagi pa ni Jesus tu disepulus na hide “Ni ti deya man u magtapat tu tolay hide a disepulus ko siya ay itapat ku be nama ko ti langet a disepulus ko siya.

³³ Pero ni ti deya u tumanggi a disepulus ko siya tu agum ay itanggi ku be siya nama ko.”

Mas Higit a Mahalán ti Jesus Nan tu Pamilya

³⁴ Kinagi pa ni Jesus tu disepulus na hide “Dyan moy isipán a immangayák he para mangpayapa ti munduwáy. Nan immangayák he para mamáglaban u tolay hide.

³⁵ Kalabanán nu awan maniwala nikán u naniwala. Mamáglaban u anak a lállake sakay u ama na, u ina sakay tu anak na a bábbey. Sakay mamáglaban be u magkatugngan a bábbey.

³⁶ U magin kalaban nu essa a tolay a naniwala ay u kasabilay na labe.

³⁷ Ni ti deya u mas magmahal tu ama na sakay tu ina na nan nikán ay awan karapatdapat a magin disepulus ko. Sakay ni ti deya be u mas magmahal tu anak na hide nan nikán ay awan karapatdapat a magin disepulus ko.

³⁸ Sakay ni ti deya be u awan makatággád tu kahirapan tu kássunud nikán ay awan karapatdapat a magin disepulus ko.

³⁹ Ni ti deya man u umád a maniwala nikán dipo kakengan na u biyag na ay mawanan, pero ni ti deya man u mawanan ti biyag dipo tu pániwala na nikán ay magkahod ti biyag a awan ti katapusan.”

Gantimpalaan nu Diyos U Tolay Na Hide

⁴⁰ Kinagi pa ni Jesus nide “Ni ti deya u mangtanggap nikam ay tinanggapák di be. Sakay u mangtanggap nikán ay tinanggap de u Ama a nangutus nikán.

⁴¹ Ni ti deya u mangtanggap tu essa a propeta dipo siya ay propeta nu Diyos ay makatanggap be gábwat tu Diyos ti gantimpala a nelaan para tu essa propeta. Sakay ni ti deya u mangtanggap tu essa a malinis a tolay dipo tu kabaitan na ay makatanggap be ti gantimpala a nelaan para tu malinis a tolay.

⁴² Sakay ni ti deya u mangatád maski essa baso a dinom tu pinakababa a disepulus ko ay kagiyán ko nikam a talaga makatanggap siya ti gantimpala a gábwat tu Diyos.”