Markos 6 - U Maganda A Baheta Ni Jesu-Cristo

Awan Tinanggap ti Jesus ti Nazaret

¹ Limmakad ti Jesus ti Capernaum sakay simmole siya tu sadile na a banuwan kaguman u disepulus na hide.

² Káddemát nu Aldew nu Káimang ay immangay ti Jesus tu sinagoga sakay nagtoldu hod. Kakpalan tu nágsaneg nikuna ay nagtaka hide sakay nagtanungan hide, “Hádya na wád a inalap i karunungan na e? Sakay ánya iye a karunungan a neatád nikuna? Kodya siya a makagimet ti makataka-taka a bagay?

³ Awan beman siya u karapintero a anak ni Maria, sakay wadi na di Santiago, Jose, Judas sakay ti Simon? Awan beman u wáwwadi na a bábbey ay hod he a mágyan?” Dipo ti itod ay umád de a maniwala nikuna sakay binadit-badit de siya.

⁴ Dipo ti iye ay kinagi nide ni Jesus, “U essa a prupeta ay igalang maskin hádya, liban la tu kabanuwan na hide, u kapartidu na hide, sakay u kabilay na hide.”

⁵ Itod u dahilan ni bakin awan siya nakagimet tu makataka-taka a bagay ti itod, liban la tu sasangan a te saket a pinatungan na tu kamát na sakay pinagpiyya.

⁶ Nagtaka siya dipo umád de a maniwala nikuna. Linebut ni Jesus u babaryo tu palebut sakay tinolduwan na u tagahod hide.

Inutusan ni Jesus u Sapulo ay ti Duwwa a Disepulus

⁷ Dinulaw na u disepulus na hide a sapulo ay ti duwwa sakay inutusan na hide ti tágdaduwwa. Inatádden na hide ti kapangyariyan a magpalayas ti mágkadukás a ispirito,

⁸ sakay binilinan na hide a, “Dyan kam magtawed ti maskin ánya man, liban la tu sahukod. Diyan kam magbilon, maski ni pággasákkan oni pilak.

⁹ Maare kam a magsulot ti sinelas, pero diyan kam magtawed ti paglewasan moy.”

¹⁰ Kinagi na be nide, “Ni pinatulos dikam tu essa a bilay ay mágyan kam hod mentras awan kam lumakad ti itod a banuwan.

¹¹ Ni umád dikam a tanggapán oni awan kam sanigán nu tolay hide tu essa a lugar ay lumakad kam hod sakay ipagpag moy u alikabuk tu tikád moy, tanda itod a parusaan hide nu Diyos tu awan de pánniwala nikam.”

¹² Kanya naglakad ngani u sapulo ay ti duwwa a disepulus sakay nagtoldu hide tu tolay hide, a dapat de a pagsisiyan u kasalanan de.

¹³ Pinalakad de u mágkadukás hide a ispirito tu tolay hide a sináddáp ni mágkadukás a ispirito; pinahidan de be ti langis u makpal a te saket sakay nagpiyya hide.

U Kákkatay ni Juan a Mágbautismo

¹⁴ Nadid ay nabaheta ni Hare a Herodes u tungkul ni Jesus, dipo kilala dán siya nu makpal a tolay. Tehhod be a magkagi a ti Juan a Mágbautismo ay nabiyag a huway kaya makagimet ti Jesus ti makataka-taka a bagay.

¹⁵ U akala nu agum ay ti Elias siya. Sakay kinagi be nu iba, “Prupeta siya, a konna tu prupeta hide tu itod.”

¹⁶ Nikuna masaneg iye ni Herodes ay kinagi na, “Siya ti Juan a pinaputol ko ti ulo. Nabiyag siya a huway.”

¹⁷ Mismo a ti Herodes u nangpadakáp sakay nángpekulung ni Juan dipo tu kagustuwan ni Herodias. (I bábbiyan iye ay inagew ni Herodes sakay pinakasalan na maski kabanga siya nu kapatkákka na a ti Felipe)

¹⁸ Dipo palagi a kákkagiyan tu itod ni Juan ti Herodes a, “Labag tu batas a kagumanán mo u kabanga nu kapatkákka mo!”

¹⁹ Sakay dipo ti iye, nagkim-kim ti iyamut ti Herodias ni Juan sakay gusto na siya a ipabuno. Pero awan na itod magimet

²⁰ dipo tukoy na a manteng ti Herodes ni Juan. Kilalanán nu hare a malinis a tolay ti Juan, sakay pilitán na a awan siya mepahamak. Gugustu na a mágsaneg ni Juan maski ni makabalisa nikuna u itáttoldu ni Juan.

²¹ Pero dimmemát labe u pagkakataun ni Herodias a pabuno ti Juan tu káddemát nu aldew nu kákkeenak ni Herodes. Naghanda ti Herodes ti makpal a makan sakay inimbitaan na u upisyales nu sundalo hide, sakay katoy bi hod u mágkayaman hide ti Galilea.

²² Nikuna simmáddáp u anak a bábbey ni Herodias sakay nagsayaw ay nasaya a tahod ti Herodes sakay u bisita hide, kanya kinagi nu hare tu madiket a, “Agidán mo nikán u maski ánya a gusto mo ta iyatád ko.”

²³ Impananto na pa tu madiket a iyatád na maski u kalahate pa nu kahariyan na ni sa itod u agidán na.

²⁴ Pákkasaneg hod nu madiket ay limmuwas siya sakay tinanung na u ina na ni ánya u agidán na. Kanya kinagiyan siya nu ina na a agidán na u ulo ni Juan a Mágbawtismo.

²⁵ Kanya nagalalisto a simmole u madiket tu kán Hare a Herodes sakay kinagi na, “U gustu ko ay iyatád mo nikán nadid be u ulo ni Juan a Mágbawtismo a keddátton tu essa a penggan.”

²⁶ Tu pákkasaneg hod nu hare ay tunay u lungkut na, pero dipo nagpananto siya tu atubang nu bisita na hide ay awan siya maka-adi tu madiket.

²⁷ Kanya pagdaka a inutusan ni Herodes u essa a sundalo a iyangay na nikuna u ulo ni Juan. Simmunud ngani u sundalo sakay pinutolan na ti Juan tu disalad nu piresuwan.

²⁸ Sakay indátton na tu penggan u ulo ni Juan sakay inyatád na tu madiket. Sakay inyatád bi iye nu madiket tu ina na.

²⁹ Nikuna a mabaheta nu alagad hide ni Juan u nangyare ay inalap de u bangkay na sakay inlábbáng de.

U Págpakan tu Limma a Libu

³⁰ Nadid, simmole u disepulus hide a inutusan ni Jesus a nagtoldu, sakay ingkagi de nikuna u atanan a ginimet de sakay u intoldu de.

³¹ Dipo tu kakpal nu tolay a magdemáttan sakay maglakaden ay awan dán hide ti panahun a kuman. Kanya kinagi ni Jesus tu disepulus na hide, “Umangay kitam tu tahimik a lugar para makaimang kam ti sabadit.”

³² Kanya simmakay hide tu abang, sakay immangay hide tu tahimik a lugar.

³³ Pero makpal a naketa tu kállakad de sakay makatukoy ni hádya hide angayan. Kanya u tolay hide a gábwat tu iba-iba a banuwan ay nagginanan a patamo ti lugaran itod sakay nadipalonguwan dipa di Jesus.

³⁴ Káawas ni Jesus tu abang ay netan na u tunay ti káppal a tolay. Nahabag siya nide dipo kumán hide a tupa a awan ti pastol, kanya tinolduwan na hide ti makpal a bagay.

³⁵ Nikuna a apon dán ay immadene ni Jesus u disepulus na hide sakay kinagi de, “Parang i lugaran iye sakay adene dán a sumahám i aldiwe.

³⁶ Palakadán mo dán i tolaye hide para makaangay hide tu babaryo sakay tu banuwan hide para makabale hide ti makan de.”

³⁷ Pero kinagi nide ni Jesus, “Hikam u mangpakan nide.” Timmábbeg u disepulus hide, “Kodya pangpakan miyay nide?” Awan kami ti sapat a pilak a pamale, duwadatos a dinaryu i kailanganay para mapakan hide a atanan.

³⁸ Tinanung hide ni Jesus, “Sangan u tawed moy a tinapay? Sigi ilingán moy ped.” Inileng de, sakay kinagi de ni Jesus, “Tehhod kitam he a limma a tinapay, sakay ti duwwa a ikan.”

³⁹ Sakay inyutus ni Jesus tu disepulus na hide a pággetnudán tu kalamonan ti guru-gurupo u katolayan.

⁴⁰ Kanya nággetnod u tolay hide ti tággi datos sakay ti tággi limma pulo tu kada gurupo.

⁴¹ Inalap ni Jesus u limma a tinapay sakay tu duwwa a ikan; tummangad siya ti langet sakay nagpasalamat tu Diyos. Káttapos ay hinati-hate na u tinapay sakay inyatád na tu disepulus na hide para iyatád di be tu tolay hide. Konna bi hod u ginimet na tu ikan sakay intagtag dibe.

⁴² Nakakan hide a atanan sakay nabássog,

⁴³ sakay nikuna ipunán nu disepulus na hide u nabuhay a tinapay ay ti ikan ay nakaputat pa hide ti sapulo ay ti duwwa a lákba.

⁴⁴ U bilang nu lállake a kinuman ay limma a libu.

Naglakad ti Jesus tu Dibbew nu Dinom

⁴⁵ Káttapos ay pinasakay a agad ni Jesus tu abang u disepulus na hide. Pinágdipalongo na hide tu banuwan ni Betsaida, tu dibilew nu minalno, mentaras a pasoliyán na be u tolay hide.

⁴⁶ Nikuna a makalakad dán u tolay hide ay simmangkay siya tu essa a bumábbuked para magdasal.

⁴⁷ Nikuna gibi dán ay hod dán ditaw u abang, sakay mággeessa be ti Jesus tu buked.

⁴⁸ Netan na a mahirapan dán u disepulus na hide tu págbusay, dipo tagbu nide u pahás. Nikuna a magamulaldew dán ay timmagubet nide ti Jesus a maglakad tu dibbew nu dinom. Nikuna a masalinan na u disepulus na hide,

⁴⁹ ay netan di siya a maglakad tu dibbew nu dinom. Tulos hide a pinumákhaw ta akala de ni multo siya,

⁵⁰ Atanan de ay neántingan a tahod, pero agad a kinagi ni Jesus nide, “Diyan kam manteng, Hikán iye! Pabegsákkán moy i isip moye!”

⁵¹ Simmakay siya tu abang sakay bigla a timmahan u mabegsák a pahás. Sakay nagtaka hide ti husto,

⁵² dipo awan di palla naintendiyan maskin netan di dán u makataka-taka a ginimet ni Jesus tu tinapay; Umád de a maniwala dipo maigát u pusu de.

Pinagpiyya ni Jesus u te Saket hide ti Genesaret

⁵³ Ummahabes hide ti dibilew sakay káddemát de ti Genesaret ay dummung hide.

⁵⁴ Tu káawas de ay agad a natengge nu taga-hod hide ti Jesus.

⁵⁵ Tunay hide ti bilis a nángbaheta ti iye tu kadatig na hide a banuwan. Inyangay nu tolay hide tu kán Jesus u atanan a te saket a hod tu abák, maskin hadya u páppágyanan na a pakabahetaan de.

⁵⁶ Maskin hádya siya a umangay, tu babaryo, tu banu-banuwan, oni tu buki-buked ay iyangay di nikuna u te saket hide, tu lugar a pagipun-ipunan nu tolay hide. Nákkekagbi hide ni Jesus ani maare ay pakahapán na u kessaket hide maskin u garayan nu damit na. Sakay u atanan nu makakahap ay magpiyya.