Markos 10 - U Maganda A Baheta Ni Jesu-Cristo

U Toldu ni Jesus Tungkul tu Magkabanga a Magsina

¹ Nadid ay limmakad di Jesus ti Capernaum, immangay hide tu lugar a Judea, sakay immahabes ti Jordan. Makpal dámman a tolay u inumangay hod nikuna, sakay konna tu date na gággimitán, tinolduwan na hide.

² Tu itod u Pariseo hide ay immangay hod nikuna para purbaan de siya. Kanya nagtanung hide, “Ayun beman tu Kautusan a hiwalayan nu lállake u kabanga na?”

³ Tinanung be hide ni Jesus, “Ánya beman u inyutus nikam ni Moises?”

⁴ Timmábbeg be hide, “Impakultad ni Moises a hiwalayan nu lállake u kabanga na ni atádden na ti Kasulatan ni pághiwalay.”

⁵ Pero kinagi nide ni Jesus, “Ginimet ni Moises i Kautusanan itod dipo tu kaigáttan ni ulo moye.

⁶ Dipo sapul pa nikuna a lalangán nu Diyos i munduwáy ay, linalang na u tolay a lállake sakay bábbey.

⁷ ‘Iye u dahilan ni bakin lakaden nu lállake u dáddikál na hide sakay mák-agum tu kabanga na,

⁸ sakay magin essa hide.’ Kaya dipo nagagum dán hide ay bakán dán hide a duwwa nan essa dán hide.

⁹ Kanya dapat awan paghiwalayán nu tolay u pinagagum nu Diyos.”

¹⁰ Káddemát de tu bilay ay u disepulus na be hide u nagtanung tungkul ti itod.

¹¹ Kinagi nide ni Jesus, “Ni hiwalayan nu lállake u kabanga na sakay mákkabanga siya ti iba ay nangibábbey siya tu atubang nu Diyos.

¹² Konna bi hod u bábbey a humiwalay tu kabanga na a lállake ni mákkabanga siya ti iba a lállake ay nangilállake siya tu atubang nu Diyos.”

Pinagpala ni Jesus u Bábbadit a Anak

¹³ Nadid, makpal a náng-angay tu anak de tu kán Jesus para kahapán na hide sakay pagpalaán; pero pinagkagiyan hide nu disepulus hide ni Jesus.

¹⁴ Nikuna a ketan ni Jesus u nangyare ay nagingál siya, sakay kinagi na tu disepulus na hide, “Pabayan moy a umadene nikán u anak hide, diyan moy hide bawalan, dipo maghare u Diyos tu anak hide.

¹⁵ Tandaan moy: u umád a tumanggap tu pághare nu Diyos a konna tu págtanggap nu anak ay awan siya makasáddáp tu kahariyan nu Diyos.”

¹⁶ Tu pákkakagi ni Jesus ti itod ay kinálkál na u anak, sakay intupo na u kamát na nide, sakay pinagpala na hide.

U Lállake a Mayaman

¹⁷ Nadid, nikuna a palakad dán di Jesus ay tehhod a lállake a nagginan a immadene nikuna, limmuhud siya sakay nagtanung, “Mahusay a maisto, kagiyán mu ped ni ánya i gimitán kuway para magkahodák ti biyag a awan ti kahád?”

¹⁸ Timmábbeg ti Jesus, “Bakin kagiyán mo a mahusayák? U Diyos la u mahusay.

¹⁹ Tungkul tu tanung mo, tukoy mo u utus nu Diyos, ‘Diyan ka mamuno; diyan ka mangibábbey; diyan ka magtakaw; diyan ka magpatunay ti kakabuliyan; diyan ka magdaya; sakay igalang mo tama mo sakay tena mo.’”

²⁰ Kinagi nu lállake, “Maisto, sinunud ku dán ina hide a atanan sapul pa nikuna anakák.”

²¹ Inileng siya ni Jesus, a tehhod a págmahal sakay kinagi na nikuna, “Essa pa a bagay u dapat mo a gimitán. Ilako mo u ari-ariyan mo sakay u pilak a naglakuwan mo ay iyatád mo tu mágkahirap hide tánni magkahod ka ti kayamanan ti langet. Káttapos ay soli ka sakay sumunud ka nikán.”

²² Pákkasaneg hod nu lállake ay nalungkut siya a limmakad dipo tunay siya ti yaman.

²³ Immileng ti Jesus tu palebut na sakay kinagi na tu disepulus na hide, “Tunay ti hirap para tu mágkayaman u makasáddáp tu kahariyan nu Diyos!”

²⁴ Nagtaka hide tu kinagi ni Jesus, kanya kinagi na a huway, “Talaga a tunay ti hirap a makasáddáp tu kahariyan nu Diyos!

²⁵ Mas alisto pa a makasáddáp u hayup a kamelyo tu ábbut nu digum kasera magpasakup u essa a mayaman tu pághare nu Diyos.”

²⁶ Lalo a nagtaka u disepulus na hide, kanya nagtanung hide, “Ni konna hod ti deya u maligtas?”

²⁷ Inileng hide ni Jesus sakay kinagi na, “Awan iye kaya a gimitán nu tolay, pero tu Diyos ay awan ti impusible. Dipo magimet na a atanan a bagay.”

²⁸ Kinagi nikuna ni Pedro, “Kodya kami be? Linakaden me u atanan para sumunud niko.”

²⁹ Timmábbeg ti Jesus, “Pakatandaan moy: atanan a nángwahak tu bilay, kákkapatkákka, dáddakál, anak, oni luta dipo nikán sakay tu Maganda a Baheta,

³⁰ ay siguradu a magkahod siya nadid a panahun ti dinatos-datos a bilay, kákkapatkákka, dáddikál, anak sakay ari-ariyan hide, peru te kaguman be a kahirapan. Sakay káttapos nu biyag ti lutaáy ay magkahod siya ti biyag a awan ti katapusan.

³¹ Pero makpal a mágdipalongo a medimodyan, sakay makpal be u medimodyan a medipalongo.”

U Katállo a Pángkagi ni Jesus tu Kákkatay sakay Kákkabiyag na a Huway

³² Mentaras a maglakad hide a patamo ti Jerusalem ay mágdidipalongo nide ti Jesus; u disepulus na hide ay págkábba-kábbaan sakay manteng u tolay hide a umusoseg nikuna. Inhiwalay ni Jesus u sapulo ay ti duwwa a disepulus na hide sakay kinagi na a huway ni ánya u mangyare nikuna.

³³ “Paangay kitamon ti Jerusalem, sakay hikán a Anak nu Tolay ay itokyon de tu mataas hide a Saserdote sakay tu tagapagtoldu hide ti Kautusan. Sakay hatulanák de ti kamatayan sakay iyatáddák de tu bakán hide a Judio.

³⁴ Insultuwánák de, loktaben, bálbággán, sakay bunuwán. Pero mabiyagák a huway kállipas nu tállo a aldew.”

U Pákpágguhon di Santiago ay ti Juan

³⁵ Nadid ay immadene ni Jesus di Santiagu sakay ti Juan a anak ni Zebedeo, sakay kinagi de, “Maisto, tehhod kami niko a agidán.”

³⁶ Tinanung hide ni Jesus, “Ánya agidán moyay?”

³⁷ Timmábbeg hide, “Ni maghare ka dán ay paetnudán mu kame nakwa tu adene mo; u essa ay tu kawanan sakay u essa ay tu kawihe.”

³⁸ Pero kinagi nide ni Jesus, “Awan moy tukoy ni ánya u agidán moy, kaya moy beman a tiisán u pághirap a tiisán ko? Maghirapák a hanggan matayák, kaya moy beman?”

³⁹ Timmábbeg hide “on, kaya me” kinagi ni Jesus. “Tahod ngane a madanas moy u kahirapan a madanas ko.

⁴⁰ Pero bakán a hikán u magpile ni ti deya u umetnod tu kawanan oni tu kawihe. Inlaan la itona hide para tu pinile nu Diyos.”

⁴¹ Nikuna a matukuyan nu sapulo a disepulus ni ánya u inaged di Santiagu ay ti Juan ay nagingál hide nide.

⁴² Kanya pinaadene hide a atanan ni Jesus sakay kinagi na nide, “Tukoy moy he ti lutaáy u inturing a puno ay tehhod a kapangyariyan tu tolay hide a nasakupan de, sakay maski ánya u gusto de ay masunud.

⁴³ Pero awan kam dapat konna hod. Nan, ni ti deya man nikam u masoh a magin mataas ay dapat magin tagapagserbi,

⁴⁴ sakay ni ti deya nikam u masoh a magin puno ay dapat magin tagapagserbi nu atanan.

⁴⁵ Dipo maski hikán a Anak nu Tolay ay immangay he ti munduwáy bakán a para pagserbiyan nan magserbi sakay máng-atád tu biyag na para maligtas u atanan nu tolay.”

Pinagpiyya ni Jesus u Buhák a ti Bartemeo

⁴⁶ Nadid, immangay di Jesus ti Jerico, tu kállakad na ti itod ay kaguman na u disepulus na hide, sakay makpal pa a agum a tolay. Te essa hod a lállake a mággetnod tu bihebi nu dilan a máklimus. U ngahan na ay ti Bartimeo, a anak ni Timeo.

⁴⁷ Nikuna a masaneg na ti Jesus a taga-Nazaret a magtaleb ay pimmákhaw siya: “Jesus, a gábwat tu lahe ni David, kagbiyanák mo!”

⁴⁸ Pinagkagiyan siya nu tolay hod hide a diyan siya mahehaw, pero lalo na pa a imbegsák u págpákhaw na, “Apo ni David, kagbiyanák mo!”

⁴⁹ Tu pákkasaneg ni Jesus nikuna ay kinagi na, “Iyangay moy he siya.” Kanya dinulawan de u buhák sakay kinagi de nikuna, “Begsákkan mo i isip muwe. Tumaknág ka dán, dipo impadulaw ka ni Jesus.”

⁵⁰ Imbudas ni Bartimeo u alikábkáb na, lummukso a timmáknág sakay immadene ni Jesus.

⁵¹ Tinanung siya ni Jesus, “Ánya i gusto muway a gimitán ko niko?” Timmábbeg u buhák, “Maisto, gusto ko a maketa a huway.”

⁵² Kinagi ni Jesus nikuna, “Sumoli ka dán pinagpiyya ka nu pánnampalataya mo.” Agad siya a naketa, sakay immunonod siya ni Jesus tu dilan.