Markos 1 - U Maganda A Baheta Ni Jesu-Cristo

U Págtoldu ni Juan a Mágbawtismo

¹ Nadid, iye u Maganda a Baheta tungkul ni Jesu-Cristo, u Anak nu Diyos.

² Nagsapul iye nikuna natupad u insulat ni prupeta Isaias, “Katoy he u inutusan ko a mágdipalongo niko; Ihanda na u lakadán mo.

³ Siya u magpákhaw tu kaparangan ti konna he: ‘Ihanda moy u lakadán nu Panginoon, sakay ayusán moy u paglakaden na.’”

⁴ Sakay dimmemát ngani ti Juan a Tagapagbautismo tu kaparangan. Nagtoldu siya tu tolay hide a dapat hide a magsise tu kasalanan de sakay magpabawtismo támpara patawadán nu Diyos u kasalanan de hide.

⁵ Makpal a tolay tu prubinsya a Judea sakay tu banuwan a Jerusalem, u immangay tu kán Juan sakay intapat de u atanan a kasalanan de, sakay binawtismuwan hide ni Juan tu dinom a Jordan.

⁶ Nadid, u badu ni Juan ay gimet tu linade a buuk nu dakál a hayup a kamelyo sakay u sinturon na ay koblet. U kákkanán na ay haksa sakay bisa ni pitukan.

⁷ Konna he u kákkagiyán na tu tolay hide, “U dumemát a kasunud ko ay mas makapangyariyan nan hikán. Awanák karapat-dapat a mangibut tu sinelas na.

⁸ Binawtismuwan takam tu dinom. Pero bawtismuwan nakam tu Banal a Ispirito.”

Binawtismuwan ni Juan ti Jesus

⁹ Ti panahunan itod ay dimmemát ti Jesus a gábwat ti Nazaret a sakup ni Galilea, sakay binawtismuwan siya ni Juan tu dinom a Jordan.

¹⁰ Tu káawas ni Jesus tu dinom ay netan na a bimmukas u langet sakay simmidung nikuna u Banal a Ispirito a kumán a kalapate.

¹¹ Sakay nasaneg na u boses a gábwat ti langet, “Hiko u pinakamamahal ko a anak, masayaák niko a tahod.”

U Págtokso ni Satanas ni Jesus

¹² Káttapos ay inggiyya nu Banal a Ispirito ti Jesus tu kaparangan.

¹³ Áppat a pulo a aldew siya a katoy hod a táttoksuwán ni Satanas. U hayup hod ay mágkatapang pero pinagserbiyan nu anghel hide ti Jesus.

Inakit ni Jesus u Áppat a Mángngikan

¹⁴ Nikuna a nepireso ti Juan ay immangay ti Jesus ti Galilea sakay nagtoldu hod siya tu Maganda a Baheta a gábwat tu Diyos.

¹⁵ Kinagi na, “Dimmemát dán u odas sakay adene dán a maghare u Diyos. Kaya magsise kamon tu kasalanan moy hide sakay maniwala kam ti iye a Maganda a Baheta.”

¹⁶ Mentaras a maglakad ti Jesus tu bihebi nu minalno ti Galilea ay netan na u matkaka a mángngikan, di Simon sakay ti Andres a mágsabud.

¹⁷ Kinagi nide ni Jesus, “Mákkuyog kam nikán, sapul nadid ay bakán dán a ikan u alapán moy nan tolay dán a para tu Diyos.”

¹⁸ Pákkakagi na hod ay agad de a inwahak u gila de sakay nákkuyog hide nikuna.

¹⁹ Nagdiretso la siya tu páglakad na, awan palla siya nakaadeyo ay netan na u matkaka a di Santiago ay ti Juan, a anak ni Zebedeo. Katoy hide tu abeng de a magayuma tu pante de.

²⁰ Dinulaw be hide a agad ni Jesus kaya be hide a nákkuyog nikuna, linakaden de u ama de tu abeng a kaguman nu áupaan hide a tolay.

Nagpiyya u Lállake a Sináddáp ni Madukás a Ispirito

²¹ Nadid ay immangay hide ti Capernaum. Tu Aldew nu Káimang ay simmáddáp ti Jesus tu Sinagoga sakay nagtoldu.

²² Nagtaka u tolay hide dipo magtoldu siya nide a te kapangyariyan, bakán a konna tu maisto hide nu Kautusan ni Moises.

²³ Mentaras a magtoldu ti Jesus bigla a simmáddáp tu Sinagoga u essa a lállake a sináddáp ni madukás a ispirito sakay pimmákhaw,

²⁴ “Ánya pák-alam muway nikame, Jesus a taga-Nazaret? Immangay kabe man he para puksaán mu kame? Tukoy taka, hiko u Banal a gábwat tu Diyos.”

²⁵ Pero inyutus ni Jesus tu madukás a ispirito, “Manahimik ka, sakay umibut ka nikuna.”

²⁶ Pinagpágpág nu madukás a ispirito u tolay sakay limmuwas a makán pákhawán.

²⁷ Nagtaka u atanan, kanya namágtanungan hide, “Ánya iye? Bigu a toldu? Mautusan na pate u mágkadukás hide a ispirito sakay sumunud be nikuna.”

²⁸ Dipo hod ay mabilis a kimmalat tu buo a Galilea u baheta tungkul tu ginimet ni Jesus.

Makpal a Tolay a Pinapiyya ti Jesus

²⁹ Nadid, kálluwas di Jesus sakay tu disepulus na hide, kaguman di Santiago sakay ti Juan, tu Sinagoga ay nagdiretso hide tu bilay di Simon ay ti Andres.

³⁰ Nedemáttan de ate katdug dálla u katugngan ni Simon Pedro, dipo tu lánggáng na a ladu, kanya agad di iye a kinagi ni Jesus.

³¹ Nikuna natukuyan iye ni Jesus ay inadeniyan na u bábbey, tinawiden na u kamát na sakay pinaikat na. Ti itod bila ay nagpiyya u ladu na sakay nagserbi nide.

³² Tu kássahám nu aldew ay inyangay de tu kán Jesus u atanan a te saket sakay u sináddáp hide ni madukás a ispirito,

³³ Sakay halus atanan a tolay tu banuwan ay naipun tu atubang nu bilay.

³⁴ Pinagpiyya na u tunay ti kakpal a te saket maski ni ányaman u bábbatiyán de sakay pinaibut na u madukás hide a ispirito. Awan na iye hide pinakultaden a magupos dipo tukoy de ni ti deya siya.

Nagtoldu ti Jesus ti Galilea

³⁵ Magamulaldew palla ay immikat dán ti Jesus sakay immangay tu tahimik a lugar sakay nagdasal.

³⁶ Tu káikat di Simon sakay tu agum na hide ay inehyok di siya.

³⁷ Nikuna a ketan di ti Jesus ay kinagi de a, “Ehyukán ka nu tolay hide.”

³⁸ Pero kinagi ni Jesus nide, “Kailangan a umangay kitam be tu agum a banuwan para makapagtolduwák hod. Iye u dahilan ni bakin a immangayák he.”

³⁹ Sakay linebut na u buo a Galilea a nagtoldu tu Sinagoga hide sakay nagpaibut tu mágkadukás hide a ispirito a hod tu tolay hide.

Pinagpiyya ni Jesus u Essa a Te Ketong

⁴⁰ Nadid tehhod a essa a te ketong a immadene ni Jesus. Limmuhud siya sakay nákkekakagbi, “Ni kaluuben mo a magpiyyaák ay mapagpiyyaák mo.”

⁴¹ Kinagbiyan siya ni Jesus kaya kinahap na sakay kinagi na, “On gusto ko! magpiyya ka.”

⁴² Ti itod bila ay nagpiyya u kinetong.

⁴³ Sakay pinalakad siya a agad ni Jesus,

⁴⁴ pero kinagiyan na siya, “Diyan mu iye kagi-kagiyán maski ni ti deya. Nan angay ka paileng tu saserdote. Káttapos ay mangatád ka nide ti iyalay de a konna tu inyutus ni Moises, támpara patunay tu tolay hide a nagpiyya ka dán.”

⁴⁵ Pero limmakad siya sakay imbábbaheta na u nangyare, kanya awan dán makalantad ti Jesus a makasáddáp tu banuwan nan hod dálla siya tu adeyo hide a lugar. Pero maski konna hod ay umangay pade nikuna u tolay hide a gábwat tu iba-iba a lugar.