Lukas 20 - U Maganda A Baheta Ni Jesu-Cristo

U Pággalangan tu Kapangyariyan ni Jesus

¹ Nadid, essa aldew mentaras a magtoldu ti Jesus tu templo sakay mangaral tu Maganda a Baheta, inadeniyan siya nu puno nu saserdote hide sakay u maisto hide nu kautusan sakay u puno hide nu banuwan.

² Sakay kinagi de nikuna, “Kagiyán mo ped nikame ni ánya karapatan muway a maggimet ti bagayan hidenye? Oni deya niko u nangatád ti kapangyariyan?”

³ Timmábbeg ti Jesus, “Tanungán takam be nadid. Kagiyán moy ped be nikán,

⁴ ni hádya a naggábwat u karapatan ni Juan a magbawtismo, tu Diyos beman oni tu tolay?”

⁵ Kaya namágguhon-uhon hide, “Ni kagiyán tam a gábwat tu Diyos, kagiyán na be nikitam, ‘Bakin awan moy siya pinaniwalaan?’

⁶ Pero ni kagiyán tam a gábwat tu tolay ay batikalán kitam nu tolay hide, dipo maniwala hide a prupeta ti Juan.”

⁷ Kaya tummábbeg hide, “Awan me tukoy!”

⁸ Kinagi ni Jesus nide, “Awan ko be kagiyán nikam ni hádya a gábwat u karapatan ko a maggimet ti bagayan hidenye.”

U Talinhaga tungkul tu Ubasan sakay tu Mágtarabaho hide hod

⁹ Nangaral siya a huway tu tolay hide sakay inyistorya na iye a talinhaga, “Te essa a tolay a nagmula ti ubas tu uma na. Impaupa na itod tu tarabahador na hide sakay immangay tu adeyo a lugar sakay nagnalay hod.

¹⁰ Nikuna sákbuhas dán ay pinaangay na u essa a alipin para alapán u kabunong na. Pero pákketa nu tarabahador hide tu utusan ay binálbág de sakay pinasole de a awan ti tawed.

¹¹ Kaya nagutus siya a huway tu essa na a alipin, pero binálbág de labe sakay pinasanike sakay pinasole a awan ti tawed.

¹² Pinaangay na u katállo na a alipin pero tinalinguwan dila siya sakay pinalakad.

¹³ Kinagi nu makákkao tu ubasan, ‘Ánya wád i dapat kuway a gimitán? Maganda wád ni u pinakamamahal ko a anak u paangayán ko hod. Siguradu a igalang di siya.’

¹⁴ Pero nikuna ketan nu tarabahador hide u anak nu makákkao ay namagguhon hide sakay kinagi de, ‘Iye u magmana, bunuwán tam siya para makao tam u manaán na.’

¹⁵ Kaya inyangay di siya tu luwas nu kaubasan hide sakay binuno.” Sakay kinagi ni Jesus, “Ánya wád u gimitán nide nu makákkao tu kaubasan?”

¹⁶ “Angay siya hod sakay bunuwan na u katiwala hide tu kaubasan sakay iyatád na tu agum u uma na.” Pákkasaneg nu tolay hide tu kinagi na ay kinagi de, “Dyan nakwan iye ipakultad nu Diyos a mangyare!”

¹⁷ Pero inileng hide ni Jesus sakay kinagi na, “Ni konna hod, ánya u gusto a kagiyán nu sumássulat tu Banal a Kasulatan? ‘U bito a inadiyan nu mágbilay hide ay siya u bito a nagin pundasyon?’

¹⁸ Ni deya man u matákneg ti bituwan ina ay mahito-hito sakay ni deya man u matáppelan na ay puma-páhtot.”

U Tungkul tu Págbayad ti Buwes

¹⁹ Gusto a dakáppán nu maisto hide nu Kautusan sakay u puno nu saserdote hide ti Jesus ti odasan itod. Dipo tukoy de a hide u páppatamaan ni Jesus tu talinhaga. Pero manteng hide tu tolay hide.

²⁰ Kaya naguhay dálla hide ti essa a tiyempo. Sinuhulan de u sangan a tolay para magkukunware a magehyok ti katutuhanan. Ginimet de iye para dakáppán de siya ni magkamale siya tu pággupos na, tánni konna hod ay mekaso de siya tu gubernador.

²¹ Essa aldew kinagi nu espiya hide ni Jesus, “Maisto, tukoy me a tama atanan ni kákkagiyán sakay itáttoldu muwe. Tukoy mi be a awan ka manuyo tu te mataas a tungkulin a tolay, nan itoldu mo u tatahoden a kagustuwan nu Diyos a gimitán nu tolay hide.

²² Ánya ti pangisip muwe, labag beman tu Kautusan a magbayad kitam ti buwes ni Cesar oni awan?”

²³ Pero tukoy ni Jesus u áisipán de a madukás, kaya kinagi na nide,

²⁴ “Igewat moy nikán u essa a pilak. Kandeya a hupa sakay ngahan u katoy ti pilakáy” “Kán Cesar.” Tábbeg de.

²⁵ Kinagi ni Jesus nide, “Ni konna hod ay iyatád moy ni Cesar u para ni Cesar, sakay iyatád moy tu Diyos u para tu Diyos.”

²⁶ Awan ti nangyare tu áisipán de a madukás a dakáppán de siya tu pággupos na tu atubang nu katolayan. Dipo awan hide ti netan a pangdakáppan de nikuna. Sakay nabigla hide tu intabbeg na nide, kanya nagtahimik dálla hide.

U Tanung tungkul tu Kákkabiyag a Huway

²⁷ Te sangan a Saduseo a ummadene ni Jesus. Iye hide ay mágtatolduwán a awan mabiyag a huway u patay hide.

²⁸ Sakay kinagi de, “Maisto, insulat ni Moises tu kautusan a para nikitam u konna he a batas, ‘Ni mara a matay u essa a lállake sakay awan hide ti anak ay tu kabanga na ay kailangan a pakasalan nu wadi nu lállake u bilo tánni mágkahod hide ti anak para tu natay.’

²⁹ Nadid, tehhod a pitto a mátkaka a lállake. Nákkabanga u panganay sakay natay a awan ti anak.

³⁰ Káttapos ay pinakasalan nu kaduwwa u nabilo, pero natay be a awan ti anak.

³¹ Sakay konna bi hod u nangyare tu katállo hanggan tu kapitto; naessa-essa a nakabanga nu bilo a bábbey u pitto a mátkaka. Pero nágkatay hide a atanan a awan ti anak.

³² Tu katapusan ay natay labe u bábbey.

³³ Kaya kinagi de, tu kákkabiyag a huway, deya wád u tenggiyán na a kabanga tu pitto dipo nakabanga na hide a atanan?”

³⁴ Timmábbeg ti Jesus, “Ti biyagan iye, u lállake hide sakay u bábbey hide ay mákkabanga.

³⁵ Pero u tolay a karapatdapat a mabiyag a huway sakay meangay ti langet ay awan dán hod mákkabanga.

³⁶ Dipo konna dán hide tu anghel hide a awan mata-matay sakay magin anak dán hide nu Diyos. Dipo biniyag na dán hide a huway.

³⁷ Pate ti Moises ay nágpatunay a mabiyag a huway u patay hide. Dipo nikuna a katoy siya tu maggehab a mahenggád a kayo ay dinulawan na u Panginoon a, ‘Diyos ni Abraham, Diyos ni Isaac, sakay Diyos ni Jacob.’

³⁸ Pero u Diyos ay bakán a Diyos nu patay hide nan Diyos nu biyag hide, u atanan a dinulaw nu Diyos ay bakán a patay nan biyag.”

³⁹ Sakay kinagi nu agum a maisto nu Kautusan, “Maisto, maganda u intábbeg mo!”

⁴⁰ Sakay sapul hod ay awan dán ti nangahas a magtanung nikuna.

U Tanung tungkul ni Cristo

⁴¹ Káttapos ay kinagi ni Jesus nide, “Kodya tam a makagi a anak ni David u Mesias?

⁴² Dipo ti David dán a mismo u nagkagi tu libro nu Kansiyon a, ‘Kinagi nu Panginoon tu Panginoon ko, “Mággetnod ka ti kawanan kuwáy,

⁴³ Mentaras awan ko niko mapasuko u kadima mo hide.”’

⁴⁴ Nadid, ti David dán u nagdulaw nikuna a Panginoon; bakin wád a kákkagiyán nu tolay hide a anak siya ni David?”

Babala tu Maisto hide nu Kautusan

⁴⁵ Mentaras a mágsaneg u tolay hide ni Jesus ay kinagi na tu disepulus na hide,

⁴⁶ “Magingat kam tu Maisto hide nu Kautusan dipo gugusto de a magsulot ti mágkalayon a damit tánni mapansin hide nu tolay. Sakay gugusto di be a igalang. Gugusto di be a mággetnod tu mágkaganda a pággetnudan para tu te mataas a tungkulin tu sinagoga hide sakay tu handaan hide.

⁴⁷ Alapán de u ari-arian nu bilo hide. Sakay gusto de a itagu u mágkadukás de a gimet kaya magdasal hide ti atakdug. Iye hide a tolay ay parusaan nu Diyos ti mas madágge a parusa!”