Lukas 16 - U Maganda A Baheta Ni Jesu-Cristo

U Talinhaga Tungkul tu Katiwala nu Mayaman a Lállake

¹ Nadid, kinagi pa ni Jesus tu disepulus na hide, “Tehhod a essa a mayaman a te katiwala. Te nagpilet nikuna a ginággastus nu katiwala u kabiyagen na.

² Kanya impadulaw na sakay tinanung, ‘Ánya ben i masaneg-saneg kuwáy tungkul niko? Magkuwentaan kita dán tu pángngasiwa mo. Dipo sapul nadid ay awan taka dán katiwala.’

³ Kinagi nu katiwala tu sadile na, ‘Ánya dán gimitán kuway nadid? Ibutanák dán nu amo ko a katiwala na. Awan ko kaya a magtarabaho ti luta sakay masanikiyák be a máklimus.

⁴ A, konna he i gimitán kuway tánni maski maibutanák tu tarabaho ko ay tehhodák palla a barkada a mangtanggap nikán tu bilay de!’

⁵ Kaya inessa-essa na a dinulawan u tehhod hide a utang tu amo na. Tinanung na u dipalongo, ‘Sangan utang muway tu amo ko?’

⁶ Timmábbeg siya, ‘Essa a datos a tapayan a langis.’ Sakay kinagi nu katiwala nikuna, ‘Salaáy u listaan nu utang mo. Magalisto ka! Mággetnod ka sakay isulat mo dálla a limma a pulo.’

⁷ Sakay kinagi na tu kaduwwa, ‘Ay hiko, sangan utang muway?’ Timmábbeg siya, ‘Essa a datos a kostal a trigu.’ Kinagi nu katiwala nikuna, ‘Salaáy u listaan nu utang mo hide, isulat mo dálla a walo a pulo.’

⁸ Pinure nu amo na u katiwala a madaya dipo impeta na a mautak siya. Dipo mas malalake a maggimet ti paraan u makamundu hide a tolay tu biyag de nan u tolay hide a te ánteng tu Diyos.”

⁹ Sakay káttapos ay kinagi ni Jesus, “Kagiyán ko nikam, gamitán moy u kayamanan moy ti lutaáy tu paggimet ti maganda tu kapareho a tolay. Maskin maubus iye ay tehhod a mangtanggap nikam tu bilay na a awan ti kahad ti langet.

¹⁰ U mapagkatiwalaan ti badit a bagay ay mapagkatiwalaan be ti dakál a bagay sakay ni deya man u mangdaya tu badit a bagay ay magdaya be tu dakál a bagay.

¹¹ Kaya ni awan kam mapagkatiwalaan tu kayamanan ti munduwáy, deya u magtiwala nikam tu tunay a kayamanan?

¹² Ni awan kam mapagkatiwalaan tu kayamanan nu agum ay awan kam be mapagkatiwalaan tu tatahoden a kayamanan a para nikam.

¹³ Awan maare a pagsabayán a serbiyan nu essa a utusan u duwwa a amo dipo kaiyamutan na u essa sakay mahalán na u essa. Pagserbiyan na ti husto u essa sakay awan na pospusán u essa. Awan moy maare a pagsabayán a serbiyan u Diyos sakay u kayamanan.”

Nagkagiyan ni Jesus u Pariseo hide

¹⁴ Nikuna masaneg iye nu Pariseo hide ay kinatawaan de ti Jesus dipo masássohan hide ti pilak.

¹⁵ Pero kinagi ni Jesus nide, “Mapagpakunwari kam tu atubang nu katolayan, pero tukoy nu Diyos u katoy tu puso moy. Dipo u mahalaga tu tolay ay sasala nu Diyos.”

¹⁶ “U kautusan ni Moises sakay u insulat nu prupeta hide u sassunudan nu tolay hide hanggan dummemat ti Juan a Mágbawtismo. Sapul hod ay nepangaral dán u Maganda a Baheta tungkul tu pághare nu Diyos. Kaya makpal u magpilit a magin kaparte hod.

¹⁷ Pero mas alisto pa a mawan u langet sakay tu luta, nan mawanan ti bisa u kabadit-baditan a parte nu kautusan.

¹⁸ U lállake a summina tu kabanga na sakay mákkabanga ti iba ay nangibábbey, sakay u mangkabanga tu bábbey a sininaan ay mángibabbey labe.”

U Mayaman sakay ti Lazaro

¹⁹ Nadid, kinagi pa ni Jesus, “Te essa a mayaman a mágbabihisan ti mágkamahal a damit sakay makpal a sare-sare a makan ti aldew-aldew.

²⁰ Sakay tehhod be a essa a mahirap a putat ti talingo u bággi na, sakay mágkatdug tu pintuwan nu mayaman, u ngahan na ay ti Lazaro.

²¹ U áasaan na a kanán ay u nágketápduk hide a mumo tu lamisaan nu mayaman. Kaya adeniyan siya nu aso hide sakay dáddeldelan u talingo na.

²² Natay u mahirap kaya inyangay nu anghel hide u kaliduwwa na tu páppagyanan ni Abraham. Natay be u mayaman sakay nelábbáng.

²³ Sakay tu bállog nu págtatiis na tu lugar nu patay hide sakay timmangad u mayaman netánnawan na tu adeyo ti Abraham a kaguman na ti Lazaro.

²⁴ Kaya pimmákhaw siya, ‘Ama a Abraham, kagbiyanák pay, utusan mo pay ti Lazaro a ilogbut na u toldu na tu dinom sakay ipatuhog na ti dila kuwáy dipo maghirapák dán ti magdalob-dalubáy a apoy.’

²⁵ Pero kinagi ni Abraham, ‘Anak isipán mo a nagpakasawa ka tu biyag mo ti luta atod. Sakay ti Lazaro ay nagtiis ti hirap. Pero nadid ay masaya dán u biyag na he sakay hiko damman ay mághahirapán ka hina.

²⁶ Bakán la ina, tehhod a malawa sakay madisalad a ábbut ti pag-itan tamáy, kaya u katoy he ay awan makaangay hina sakay u katoy hina ay awan be makaangay he.’

²⁷ Kaya kinagi nu mayaman, ‘Ni konna hod, Ama a Abraham, mákkekagbiyák niko a paangayán mo ti Lazaro tu bilay nama ko,

²⁸ dipo tehhodák a limma a kákkapatkákka a lállake hod, utusan mo siya a angay na hide pagkagiyán tánni awan be hide meangay ti lugaráy a paghirapan ko.’

²⁹ Pero kinagi nikuna ni Abraham, ‘Katoy dán nide u insulat hide ni Moises sakay u insulat nu propeta hide kaya dapat de itod a sunudán.’

³⁰ Timmábbeg u mayaman, ‘Awan itod hide sapat, Ama a Abraham. Pero ni angay nide u essa a natay dán sakay nabiyag a huway ay adággan de u kasalanan de hide.’

³¹ Pero kinagi nikuna ni Abraham, ‘Ni umád de a sunudán u insulat ni Moises sakay u insulat nu propeta hide ay awan dila be sanigán maski u essa a patay a nabiyag a huway.’”