Gimet 9 - U Maganda A Baheta Ni Jesu-Cristo

U Kákkadulaw ni Saulo

¹ Nadid, tunay u pagkasoh ni Saulo a pakantingán sakay bunuwán u disepulus hide nu Panginoon. Kanya immadene siya tu pinakapuno nu saserdote hide,

² sakay nák-aged siya ti sulat para tu sinagoga hide ti Damasco tánni madakáp u deya man a ketan na hod a kaguman tu mánnampalataya hide, lállake man oni bábbey sakay iyangay na hide ti Jerusalem.

³ Nadid, immangay ti Saulo ti Damasco. Nikuna adene dán siya tu banuwan ay bigla a kimmislap tu palebut na u makasile a demlag a gábwat ti langet,

⁴ kanya nalugmuk siya. Sakay nasaneg na u boses a nagdulaw nikuna, “Saulo, Saulo! Bakin páppahirapanák mo?”

⁵ Kinagi na, “Deya ka beman, Panginoon?” Timmábbeg ti Jesus, “Hikán ti Jesus, u páppahirapan mo.

⁶ Tumaknág ka sakay umangay tu banuwan. Te mángkagi hod niko ni ánya u dapat mo a gimitán.”

⁷ Netiláng-lángngan u kaguman hide ni Saulo nikuna masaneg de u boses pero awan hide ti ketan a tolay.

⁸ Timmaknág ti Saulo sakay nikuna ibulag na u mata na ay awan dán siya maketa, kanya inalalayan siya nu kaguman na hide sakay inyangay de ti Damasco.

⁹ Awan siya nakeketa tu alay nu tállo a aldew, sakay awan be kikimman oni immino-inom.

¹⁰ Nadid, ti Damasco ay te essa a disepulus, a u ngahan na ay ti Ananias. Kinagi nu Panginoon nikuna tu pangitain, “Ananias!” Timmábbeg siya, “Ánya itod Panginoon?”

¹¹ Sakay kinagi nu Panginoon, “Angay ka tu karsada a ngángngahanan de a Masunong, angay ka tu bilay ni Judas sakay itanung mo u essa a lállake a taga-Tarso, Saulo, u ngahan na. Pasiyaan siya nadid a magdasal,” kagi nu Panginoon.

¹² Sakay netan naka tu pangitain a simmáddáp tu páppágyanan na sakay intupo mo u kamát mo para maketa siya a huway.

¹³ Pero timmábbeg ti Ananias, “Panginoon, makpalák dán a nabaheta ti tolayan iye, tungkul tu kadukássan a ginággimet na tu mánnampalataya hide ti Jerusalem.

¹⁴ Sakay immangay siya ti Damasco wáy, a te karapatan a gábwat tu pupuno nu saserdote hide, para dakáppán u atanan a summampalataya niko.”

¹⁵ Pero kinagi nikuna nu Panginoon, “Kammudán hod! Dipo pinile ko siya para ipangaral tu Hentil hide u tungkul nikán, tu hare hide, sakay tu lahe hide ni Israel,

¹⁶ sakay ipeta ko nikuna atanan hirap a kailangan na a danasán dipo nikán.”

¹⁷ Kanya immangay ngane hod ti Ananias. Summáddáp siya tu bilay sakay intupo na u kamát na ni Saulo. Kinagi na, “Kapátkákka ko a Saulo, pinaangayák he nu Panginoon tam a ti Jesus, a nákpágguhon niko tu dilan nikuna patamo ka he. Inutusanák na tanni maketa ka a huway sakay maputat ka tu Banal a Ispirito.”

¹⁸ Sakay agad a natákneg u kumán hide a keskes tu mata ni Saulo kanya naketa dán siya a huway. Kaya timmaknág siya sakay nagpabawtismo.

¹⁹ Kimman siya sakay bimmegsak a huway u bággi na. Nákpágyan ti Saulo tu mánnampalataya hide ti Damasco ti sangan a aldew.

U Pángngaral ni Saulo ti Damasco

²⁰ Sakay simmáddáp siya tu sinagoga hide sakay nagtoldu tungkul ni Jesus, kinagi na, a siya u anak nu Diyos.

²¹ Nagtaka u atanan a nakasaneg nikuna, kanya kinagi de, “Awan beman sa iye u date mágpapahirapán tu mánnampalataya hide ti Jerusalem? Sakay awan beman immangay la he tánni dakáppán hide sakay tawidán tu pupuno nu saserdote hide?”

²² Pero lalo pa a nagin malalake ti Saulo tu pángngaral na, kanya awan dán tukoy nu Judio hide a mágyan ti Damasco ni ánya itábbeg diyay tu págpatunay na a ti Jesus ay u Mesias.

²³ Nikuna makalipas u sangan a aldew, ay namágkaessaan nu Judio hide a bunuwán ti Saulo.

²⁴ Aldew ay ti gibi ay isanáb de siya tu laguwerta nu banuwan para bunuwán. Pero natukuyan itod ni Saulo.

²⁵ Kanya essa gibi ay inyasák siya nu disepulus na hide tu balulang sakay intostos de tu dilupot nu pader.

Katoy ti Jerusalem ti Saulo

²⁶ Káddemát na ti Jerusalem ay pinurbaan na a mákpisan tu disepulus hod hide. Pero manteng hide nikuna, dipo awan hide makapaniwala a essa dán siya a disepulus.

²⁷ Pero kinuyog siya ni Bernabe, sakay inyangay na tu apostol hide. Impaliwanag na nide ni kodya pimmeta u Panginoon ni Saulo sakay nákpágguhon nikuna tu dilan. Kinagi na be ni kodya siya a nagtoldu ti Damasco a awan ti ánteng tungkul ni Jesus.

²⁸ Kaya sapul hod ay imbilang di dán ti Saulo a kakagumanan de ti Jerusalem, sakay awan siya ti ánteng a nagtoldu ti lugaran itod tungkul tu Panginoon.

²⁹ Nákpágguhon be siya sakay nákpagtábbegan tu Judio hide a magupos ti Griego, kaya binalak de siya a bunuwán.

³⁰ Kanya nikuna matukuyan iye nu kákkapátkákka hide a mánnampalataya ay inyangay de ti Saulo ti Cesarea sakay pinasole de ti Tarso.

³¹ Kanya sapul hod ay nagin tahimik u kalagayan nu mánnampalataya hide tu buo a Judea, Galilea sakay Samaria. Hide ay bimmegsák ti pánnampalataya sakay kimmakpal tu tulung nu Banal a Ispirito sakay nabiyag a te ánteng tu Panginoon.

Immangay ti Pedro ti Lida sakay ti Joppa

³² Nadid, nilebut ni Pedro u bawat banuwan tánni bisitaán u kákkapátkákka hide ti pánnampalataya. Nikuna bisitaán na u kákkapátkákka hide ti Lida,

³³ ay netan na hod u essa a lállake, Eneas u ngahan na. Lopog siya sakay walo dán a taon a kumákkatdug.

³⁴ Kinagi nikuna ni Pedro, “Eneas, pinagpiyya ka dán ni Jesu-Cristo. Tumaknág ka sakay isáddi mo i abák muwe!” Pagdaka a immikat ti Eneas.

³⁵ Nikuna a ketan nu atanan a mámmágyan ti Lida sakay Saron a nagpiyya dán siya ay summampalataya hide tu Panginoon.

³⁶ Ti Joppa ay tehhod be a essa a bábbey a mánnampalataya, u ngahan na ay Tabita, (ti Griego, u ngahan na ay Dorcas, u gusto na a kagiyán ay ogsa.) Inyobus na u atanan a odas na tu pággimet ti maganda sakay tu págtulung tu mágkahirap hide.

³⁷ Ti aldiwan itod ay nagkasakit siya sakay natay. Nikuna mapunasan dán u bangkay na ay indátton de tu mángngontok a kuwarto.

³⁸ Dipo adene la u Lida ti Joppa, nabaheta nu mánnampalatay hide a katoy hod ti Pedro, kanya inutusan de u duwwa a lállake para ipákpágguhon de a angay siya agad ti Joppa.

³⁹ Kanya naghika-hika sakay nákkuyog nide ti Pedro. Káddemát na hod ay inyangay de siya tu kuwarto tu ontok. Agad a immadene nikuna u bábbey hide a bilo a makán sangitán sakay inpeta de nikuna u pággalikábkáb sakay u damit a ginággimet ni Dorcas nikuna biyag palla siya.

⁴⁰ Pinaluwas ni Pedro u atanan a katolayan sakay limmuhud a nagdasal. Káttapos ay ummatubang siya tu bangkay sakay kinagi na, “Tabita, umikat ka dán!” Bimmulag ti Tabita sakay pákketa na ni Pedro ay immetnod siya.

⁴¹ Tinawiden ni Pedro u kamát ni Tabita sakay tinulungan na a tumaknág. Dinulawan na u mánnampalataya hide, u bilo hide a bábbey sakay inyatubang na nide ti Dorcas a biyag.

⁴² Nabaheta iye nu tolay hide a mágyan tu banuwan nu Joppa, kanya makpal u naniwala tu Panginoon.

⁴³ Nanalay pa a nágyan ti Pedro tu siyudad a Joppa. Náktulos siya tu bilay ni Simon a u tarabaho na ay máglinis ti koblet ni hayup para gimitán a gagamit.