Gimet 4 - U Maganda A Baheta Ni Jesu-Cristo

Ti Pedro sakay ti Juan tu Atubang nu Sanedrin

¹ Nadid, mentaras magupos palla di Pedro sakay ti Juan tu tolay hide ay inadeniyan hide nu saserdote hide, u kapitan nu guwardiya hide tu templo, sakay u Saduseo hide.

² Grabi u iyamut de tu duwwa a apostol dipo ibábbaheta de tu tolay hide a nabiyag a huway ti Jesus. Sakay iye u mángpatunay a mabiyag a huway u patay hide.

³ Kanya dinakáp de ti Pedro sakay ti Juan. Imbistigaan di pa nakwa hide a duwwa kanya la ay gibi dán, kaya ingkulung di hide hanggan tu dimadimang.

⁴ Pero maskin konna he u nangyare nide ay makpal u simmampalataya tu págtoldu de. Ummabut ti limma a libu u simmampalataya hide a lállake.

⁵ Tu kadimadimangan ay namágkatipun ti Jerusalem u puno nu saserdote hide, puno nu Judio hide sakay u tagapagtoldu hide tu Kautusan.

⁶ Kaguman bi hod ti Anas a pinakapuno a saserdote, sakay ti Caifas, ti Juan, ti Alejandro, sakay tu agum pa hide a miyembro nu pamilya ni Anas.

⁷ Inyangay di hod di Pedro sakay ti Juan sakay tinanung, “Kándeya a ngahan oni kapangyariyan u ginamit moy tu págpapiyya tu tolay a lopog?”

⁸ Kanya nagupos ti Pedro a tehhod a kapangyariyan nu Banal a Ispirito, kinagi na, “Hikam a puno nu saserdote hide sakay puno nu Judio hide,

⁹ ni itanung moyay nikame ay tungkul tu págpapiyya ti tolayáy a lopog,

¹⁰ gusto ko a matukuyan moy a atanan sakay konna be nikam a lahe ni Israel a itolayan iye a mágtaknág tu atubang moy ay nagpiyya dipo tu kapangyariyan ni Jesu-Cristo a taga-Nazaret. Siya u impaku moy tu kudus sakay binuno moy, pero biniyag siya a huway nu Diyos.

¹¹ Ti Jesus, u gusto a kagiyán nu sumássulat tu Banal a Kasulatan a, ‘U bito a inadiyan nu mágtolnák hide ti bilay, ay siya u nagin pinaka pundasyon a bito.’

¹² Awan dan ti iba a makapangatád ti kaligtasan, dipo awan ti iba a pinaangay he u Diyos ti lutaáy para iligtas u tolay hide nan ti Jesus la.”

¹³ Nagtaka u buo a Sanedrin tu begsák isip a impeta di Pedro sakay ti Juan, lalu dán nikuna naihupaan de a awan bál hide nakapagadal. Naihupaan dila be a hide u kakaguman ni Jesus tu itod.

¹⁴ Magupos pa nákwa hide kontara tu makataka-taka a ginimet di Pedro sakay ti Juan, pero dipo mágtaknág tu adene de u tolay a pinapiyya de ay timmahimik dálla hide.

¹⁵ Kanya pinaluwas di pala u duwwa a apostol tu pamággipun-ipunan de sakay namágguhon-uhon hide.

¹⁶ Kinagi de, “Ánya gimitán tamay nadid nide? Tukoy dán nu atanan a taga-Jerusalem hide u ginimet de a makataka-taka a bagay kaya awan tamon iye mepamen.

¹⁷ Para awan dán kumalat u pángngaral de tu tolay hide ay kagiyan tam hide a diyan dán hide magtoldu tungkul ni Jesus.”

¹⁸ Kanya impadulaw de a huway di Pedro sakay ti Juan sakay kinagiyan di hide a diyan magupos oni magtoldu tungkul ni Jesus.

¹⁹ Pero timmábbeg ti Pedro sakay ti Juan, “Hikamon i manghatulay ni ánya u tama sakay ni ánya u maganda tu atubang nu Diyos; sunudán mikam beman oni sunudán me u Diyos?

²⁰ Awan me maare a awan ibaheta u netan me sakay u nasaneg me.”

²¹ Pero mahigpit di pa hide a binawalan a mangaral sakay káttapos ay pinalaya di dán hide. Maski ni gusto di nakwa a pahirapan u duwwa ay awan de iye nagimet dipo manteng hide tu tolay hide. Dipo u tolay hide ay magpure tu Diyos dipo tu nangyare a himala.

²² Dipo u tolay a pinagpiyya de tu pamamagitan nu himala ay mahigit dán a áppat a pulo a taon a lumpo.

U Dasal nu Mánnampalataya hide

²³ Nikuna makaluwas dán di Pedro sakay ti Juan, ay immangay hide tu kakagumanan de hide sakay imbaheta de ni ánya u kinagi nu puno nu saserdote hide sakay u puno nu Judio hide.

²⁴ Pákkasaneg hod nu mánnampalataya hide ay nagkaessa hide a nagdasal, “Panginoon, hiko u nanglalang tu langet, tu luta, tu diget sakay tu atanan a bagay a katoy hod.

²⁵ Ti David a Tagapagserbi mo tu itod ay indipalongo nu Banal a Ispirito kanya insulat na u konna he: ‘Bakin wád a tunay iyamutay nu Hentil hide? Sakay bakin nagbalak u Judio hide ti baka-bakán?

²⁶ Nagkaessa u hare hide ti lutaáy, Sakay u pupuno hide para lumaban tu Panginoon sakay tu pinile na hide.’

²⁷ Natupad ngani iye nikuna a nagkaessa di Herodes ay ti Poncio a Pilato, kaguman u Hentil hide sakay u buo a Israel. Nagkaessa hide kontara ni Jesus a banal a pinile mo a tagapagserbi.

²⁸ Tu ginimet de ay natupad dán u balak mo tu itod. Sakay nangyare iye tu kapangyariyan mo sakay tu kagustuwan mo.

²⁹ Sakay nadid Panginoon, ay pagisipan de kame ti madukás. Tulungan mo u tagapagserbi mo hide a mepangaral me ti buung tapang u Upos mo.

³⁰ Payagen mu dán tu pamamag-itan nu kapangyariyan ni Jesus a banal mo a tagapagserbi a mapapiyya me u te saket hide sakay makagimet kame ti himala sakay makataka-taka a bagay.”

³¹ Káttapos de a magdasal ay nayanág u pamággipun-ipunan de a bilay. Atanan de ay naputat tu Banal a Ispirito sakay buung tapang a nangaral tu Upos nu Diyos.

³² Namágkaessa ti isip u mánnampalataya hide. Sakay awan sinadile nu bawat essa u ari-arian de nan para nide a atanan.

³³ Tu begsák nu kapangyariyan nu Diyos ay tulos-tulos la a magpatunay u apostol hide tungkul tu kákkabiyag a huway nu Panginoon Jesus. Kanya pinagpala nu Diyos u atanan a mánnampalataya.

³⁴ Awan ti kinulang tu kailangan de dipo inlako nu mánnampalataya hide u luta de hide sakay bilay,

³⁵ sakay u pilak a naglakuwan de ay inyatád de tu apostol hide. Sakay inyatád be iye nu apostol hide tu te kailangan hide.

³⁶ Konna bi he u ginimet ni Jose a Levita a taga-Cipre. Nginahanan siya nu apostol hide a Bernabe, u gusto na a kagiyán ay “Anak a Matáttulungán.”

³⁷ Inlako ni Jose u luta na sakay u pilak ay inyatád na tu apostol hide.