Gimet 28 - U Maganda A Baheta Ni Jesu-Cristo

Tu Lugar a Malta

¹ Nikuna makaapet kami dán ay natukuyan me a puduk bál lan itod ay ngángngahanan de a Malta.

² Mabait a tahod u tolay hod hide sakay tinanggap di kame ti maayus. Pinagnamo di kame ta madagnen dipo naguden sakay inasikaso di kame ti husto.

³ Nangopkop ti Pablo ti kayo sakay nikuna itolo na dán ay tehhod a bigla a limmuwas a makamandag a ulag dipo tu init nu apoy. Sakay kinaget na u kamát ni Pablo.

⁴ Nikuna ketan nu tagahod hide u ulag a bumábbátten tu kamát ni Pablo ay nakagi de tu balang essa nide, “Talaga a mágbabono i lállakeyan iye. Nakaligtas ngane siya tu diget, pero awan be siya pinakultaden nu hed ti langet a mabiyag pa siya.”

⁵ Pero inwatek la ni Pablo u ulag tu apoy sakay awan siya naaánya.

⁶ Áuhayán de ni bumige u kamát ni Pablo oni pagdaka a matumba sakay matay. Pero nalay dán hide a makán uhayán ay awan la ti nangyare nikuna, kanya nagbagu u isip de, kinagi de, “Essa siya a diyos!”

⁷ Ti itod ay te adene a luta a kao nu pinuno ti lugaran itod u ngahan na ay ti Publio; pinatulos nakame ti mahusay tu bilay na sakay inasikaso nakame ti husto tu luub nu tállo a aldew.

⁸ Nagkataun a te saket u ama ni Publio dipo maladu sakay magkurso. Kanya binisita siya ni Pablo, káttapos na a ipagdasal ay intupo na u kamát na tu te saket sakay nagpiyya.

⁹ Dipo ti iye a pangyayare ay nagdemáttan u agum hide a taga hod a tehhod a saket, sakay pinagpiyya na be hide.

¹⁰ Inatádden di kame ti makpal a regalo. Sakay nikuna maghektat kami dán ay indátton de tu abeng u kailangan mi hide.

U Biyahe Me Sapul ti Malta Hanggan ti Roma

¹¹ Tállo a bulan u limmipas bagu kami hod a limmakad. Simmakay kami dámman tu essa hod a barko a gábwat ti Alejandria a nagpalipas be ti amiyan hod. U ngahan nu barko ay “U Kambal a diyos.”

¹² Dimmung kame ti Siracusa sakay tállo kami hod a aldew.

¹³ Sapul ti Siracusa ay nagtulos-tulos kame a nágbarko hanggan ti Regio. Tu sumunud a aldew ay nagabagat, kanya tu alay nu duwwa la a aldew ay dimmung kame ti Puteoli.

¹⁴ Tehhod kame hod a netan a kákkapátkákka ti pánnampalataya, inakit dikame a mágyan pala hod ti sasimba. Sapul ti Puteoli ay nagtulos kame dán ti Roma.

¹⁵ Nikuna a mabaheta nu kákkapátkakka hide ti pánnampalataya ti Roma u tungkul nikame ay immangay hide tu Tindaan de Apio, sakay u agum ay hod tu Tállo a bilay a áupaan tanni tagbuwan di kame hod. Nikuna ketan ni Pablo u kákkapátkakka hide ay nagpasalamat siya tu Diyos sakay bimmegsák u isip na.

Ti Roma

¹⁶ Káddemát me ti Roma ay pinakultadan de ti Pablo a mangupa ti sadile na a págyanan, pero kaguman na u essa a sundalo a mágbantay nikuna.

¹⁷ Kállipas nu tállo a aldew ay impadulaw ni Pablo u puno nu Judio hide ti Roma. Nikuna namagkatipun dán hide ay kinagi na, “Kákkapatkákka ko hide, maskin awanák ti nagimet a kasalanan kontara tu banuwan tam oni tu patakaran nu nunu tam hide ay dinakappák de ti Jerusalem sakay inpiresuwák de tu gubiyerno ni Roma.

¹⁸ Nikuna matapusák a malitis ay palayaannák di dán nakwa dipo awanák be ti ginimet a madukás para maparusaan ti kamatayan.

¹⁹ Pero kinontra nu Judio hide, kanya napilitanák a iyadene u kaso ko tu hare, maskin awanák ti reklamo kontara tu kalugaran ko hide.

²⁰ Impadulaw takam dipo gusto takam a ketan sakay para makagi ko nikam a kanyaák a hod he a nakapireso dipo tu pánniwala ko ni Jesus a pag-asa nu Israelita hide.”

²¹ Kinagi di nikuna, “Awan kame ti natanggap a sulat a gábwat ti Judea tungkul niko, sakay tu kalugaran tam hide a immangay he ay awan ti nagbaheta oni nagupos ti maskin ányaman a kontara niko.

²² Pero gusto mi be a masaneg ni ánya makagi muway, dipo tukoy me a maski ni hádya a lugar ay ipáppadukás nu tolay hide i pánniwala muwe.”

²³ Kanya nagtakda hide ti essa a aldew, sakay makpal u immangay tu páppágyanan ni Pablo káddemát ni itod a aldew. Saldew siya a nagpaliwanag nide sakay nángpatunay tungkul tu pághare nu Diyos. Tu pamamag-itan nu Kautusan ni Moises sakay u insulat nu prupeta hide ay ginimet na u atanan a makaya na tán maakit na hide a sumampalataya ni Jesus.

²⁴ Tehhod a naniwala sakay tehhod labe a awan naniwala tu kinagi na.

²⁵ Kanya nikuna a awan hide mamágkasundu ay limmakad hide káttapos iye a kagiyán ni Pablo, “Tahod u kinagi nu Banal a Ispirito tu nunu tam hide tu pamamag-itan ni prupeta Isaias:

²⁶ ‘Umangay kahod ti iye hide a tolay sakay kagiyán mo nide, Mágsaneg kam man a mágsaneg ay awan kam makaintendi, Sakay umileng kam man a umileng ay awan kam maketa.

²⁷ Dipo tunay ti igát i puso wáy ni tolayan hidenye, Tinakáppan de u talinga de, Sakay ingkiháp de u mata-mata de. Dipo umád de a maketa u mata-mata de, oni makasaneg u tali-talinga de. Dipo makay maketa u mata de Sakay makasaneg u tali-talinga de, ay makaintendi u isip de hide, Sakay magpakumbaba hide nikán, sakay pagpiyyaán ko hide,’” kagi nu Panginoon.

²⁸ Kinagi pa ni Pablo, “Kanya nadid gustu ko a matukuyan moy a iye a impakapospos ko nikam tungkul tu kaligtasan a gubwát tu Diyos ay impáppangaral dán tu Hentil hide sakay hide pa u naniwala ti iye!”

²⁹ Káttapos iye a kagiyán ni Pablo ay naglakaden u Judio hide a mágdadibatiyán hide ti mahigpit.

³⁰ Sakay duwwa a taon ti Pablo a nágyan tu nákkaseruwan na sakay tinanggap na ti mahusay atanan a tolay a umadene nikuna.

³¹ Mabegsák u isip na sakay malaya siya a nangaral tungkul tu pághare nu Diyos sakay tungkul tu Panginoon Jesu-Cristo.