Gimet 24 - U Maganda A Baheta Ni Jesu-Cristo

Indimanda nu Judio hide ti Pablo

¹ Nadid, kállipas nu limma a aldew ay dimmemát ti Cesarea u pinakapuno nu saserdote hide a ti Ananias, kaguman u sangan tu pinuno hide nu banuwan sakay essa a abugadu a u ngahan na ay ti Tertulo. Inyatubang de tu gobernador u dimanda de kontara ni Pablo.

² Sakay nikuna meatubang dán ti Pablo ay sinapulan dán ni Tertulo a ingkagi u reklamo na kontara ni Pablo. Kinagi na, “Kagalang-galang a Gobernador Felix, dipo tu maganda mo a pámmalakad ay nagin payapa u bansa me, makpal pa a pagbabagu para tu kapiyyaan ni bansa miyáy.

³ Maski ni hádya sakay maski nikan, tenggiyán me iye a utang a luub sakay grabi ti kadakál u pasalamat me niko.

⁴ Tánni awan kam masiyadu a maabala, nakwa sanigán moy i kagiyán miyáy awan la mamalay.

⁵ Dipo netan me i tolayan iye a mággaguluwán. Gágguluwán na u atanan a Judio, maski hádya siya angayan sakay siya u puno nu tolay hide a simmunud tu toldu nu essa a lállake a taga Nazaret.

⁶ Pati u templo me ay awan na inggalang, kanya dinakáp me siya. Hatulan mi dán nakwa siya sigun tu Kautusan,

⁷ pero dimmemát ti Lisias a puno nu sundalo hide, sakay inagew na nikame ti Pablo.

⁸ Sakay kinagi na a ireklamo mi kan dálla niko i tolayan iye. Ni imbistigaan mo siya ay matukuyan mo u atanan nu reklamo me kontara nikuna.”

⁹ Inayunan be nu Judio hide u atanan a kinákkagi ni Tertulo.

Inpagtanggul ni Pablo u Sadile na tu atubang ni Felix

¹⁰ Sakay sininyasan nu gobernador ti Pablo a magupos kaya kinagi na, “Kagalang-galang a gobernador, tukoy ko a nalay ka dán a Huwes ti iye a bansa, kanya masayaák a mangatuwiran ti atubang muwe.

¹¹ Awan palla ti sapulo ay ti duwwa a aldew sapul dimmemátták ti Jerusalem para sumamba. Matukuyan mo iye ni magimbistiga ka.

¹² Sakay awanák di palla netan a nákpagdima maskin deya tu disalad nu templo, oni naggulo tu sinagoga oni maskin hádya a parte nu banuwan.

¹³ Awan hide ti mepeta a katibayan ti ibábbintang diye nikán.

¹⁴ Pero aminán ko a sumássampalatayaák tu Diyos nu nuno me hide sigun tu intoldu ni Jesus a kákkagiyán de a liwat a rilihiyon. Pero maniwalaák be tu atanan nu nakasulat tu Kautusan ni Moises sakay tu atanan a insulat nu prupeta hide.

¹⁵ Konna nide, sumampalatayaák tu Diyos a huway na a biyagán u atanan a tolay, matuwid oni awan matuwid.

¹⁶ Kanya gimitán ko u atanan nu makaya ko tán awanák magkasala tu atubang nu Diyos sakay tu tolay hide.

¹⁷ Sangan dán a taon a awanák ti Jerusalem; nagsoliyák para magtugán ti tulung tu kalugaran ko hide, sakay mag-alay tu Diyos.

¹⁸ Ina u ginimet ko nikuna a demáttanák de tu templo natapos ku dán a gimitán tu itod u atanan a bagay para tu páglinis sigun tu Kautusan, sasangan la a tolay u kaguman ko tu itod sakay awanák nanggulo.

¹⁹ Pero u hed la hod ay u sangan la hide a Judio a gábwat ti Asia. Hide nakwa u immadene niko para magreklamo kontara nikán ni tehhod hide a reklamo.

²⁰ Sakay dipo awan he hide, u tolay la hide a atoy he u magkagi nite napatunayan hide a tehhodák a nagimet a kasalanan nikuna hikán ay iyatubang de tu Sanedrin.

²¹ U maare dila a ibintang nikán ay u impákhaw ko a konna he, ‘Imbistigaanák moy nadid dipo tu pánniwala ko a huway a mabiyag u patay hide.’”

²² Dipo tukoy dán ni gobernador Felix u tungkul tu Toldu ni Jesus, kanya impeimang na u pággimbistiga. Kinagi na, “Iyatád ko u hatul ko ti kasuwan iye káddemát ni Lisias.”

²³ Káttapos ay inyutus na tu kapitan a bantayan ti Pablo, pero diyan de siya higpitan nan payagen dila siya a bisitaán sakay tulungan nu amigu na hide.

Nagupos ti Pablo tu atubang di Gobernador Felix ay ti Drusila

²⁴ Nadid kállipas nu sangan a aldew ay simmole ti gobernador Felix kaguman u kabanga na ati Drusila. Impadulaw na ti Pablo sakay nágsaneg siya tu kákkagiyan ni Pablo tungkul tu pánnalig ni Cristo Jesus.

²⁵ Pero nikuna ipaliwanag ni Pablo a dapat mabiyag a malinis u tolay, sakay magpugád tu sadile para awan magkasala, sakay impaliwanag nabe u tungkul tu pághatul a dumemát ay neántingan ti gobernador Felix. Kinagi na, “Maare ka dán a lumakad, ipadulaw taka dálla a huway ni tehhodák dámman a odas.”

²⁶ Pirme na a padulaw ti Pablo sakay kauhunán, dipo makán uhayan siya a pasoksukan siya ni Pablo ti pilak.

²⁷ Pero kállipas nu duwwa a taon ay pinalitan ni Porcio Festo ti Felix bilang gobernador. Dipo tu soh ni Felix a magustuwan siya nu Judio hide ay pinabayan na ti Pablo a pumáppireso.