Gimet 22 - U Maganda A Baheta Ni Jesu-Cristo

¹ “Nadid, kákkapátkákka hide sakay dáddakál hide, sanigán moy kagiyán kuwáy nadid bilang págdipensa ti sadile kuwáy.”

² Sakay nikuna masaneg de a nagupos siya ti upos a Hebreo ay lalo hide a timmahimik. Kanya nagtulos-tulos a nagupos ti Pablo kinagi na,

³ “Hikán ay essa a Judio, neenakák ti Tarso nu Cilicia pero dimmakállák he ti Jerusalemáy. U maisto ko ay ti Gamaliel mahigpiták na a tinolduwan tu Kautusan nu ninuno tam hide. Sakay mahigpit tu itod u págserbi ko tu Diyos, konna nikam.

⁴ Pinahirapan ko u tolay hide a simmunud tu Toldu nu Diyos tungkul tu kaligtasan a hod ni Cristo. Sakay pinabuno kupa u agum. U agum be ay pinapungo ko hide sakay impepireso, bábbey man oni lállake.

⁵ Makapagpatunay tungkul ti iye u pinakapuno nu saserdote hide sakay u buo a gurupo nu pinuno hide. Inatáddinák di pa ti sulat para tu Judio hide ti Damasco, kanya immangayák hod para dakáppán u kaguman ti tolduwan iye hide tungkul ni Cristo sakay iyangay he ti Jerusalemáy para parusaan.”

Impaliwanag ni Pablo ni Kodya Siya a Summampalataya

⁶ “Adene dán a magtanghale tu itod sakay adeniyák dán ti Damasco nikuna a bigla a tehhod a kimmislap tu palebut ko a tunay ti demlag a gábwat ti langet.

⁷ Kanya nágdámmohák tu luta sakay nasaneg ko u boses a nagkagi nikán, ‘Saulo, Saulo! Bakin a páppahirapanák mo?’

⁸ Timmábbegák, ‘Deya ka, Panginoon?’ ‘Hikán ti Jesus a taga-Nazaret a páppahirapan mo.’ Kagi na.

⁹ Nadid netan nu kaguman ko hide u demlag, pero awan de nasaneg u boses a nákpágguhon nikán.

¹⁰ Sakay tinanung ko siya, ‘Ánya u gimitán ko, Panginoon?’ Kanya kinagi na, ‘Tumaknág ka sakay angay ka ti Damasco. Hod mu hod a matukuyan u nelaan a dapat mu gimitán.’

¹¹ Nabuhákkák dipo ti makasiliyan itod a demlag, kanya kinabitanák dálla nu kaguman ko hide hanggan ti Damasco.

¹² Nadid tehhod a essa a lállake ti Damasco, u ngahan na ay ti Ananias. Tehhod a ánteng tu Diyos, sumássunud tu Kautusan, sakay igággalang nu Judio hide a mámmágyan hod.

¹³ Immangay tu páppágyanan ko sakay kinagi na nikán, ‘Kapatkákka a Saulo, maketa ka dán.’ Ti itod bila ay naketaák a huway sakay inileng ko siya.

¹⁴ Kinagi na pa a, ‘Pinile ka nu Diyos nu nuno tam hide tán matukuyan mo u kagustuwan na, tán ketan mo u Banal na a Tagapagserbi tánni masaneg mo u boses na.

¹⁵ Dipo hiko u magin sistigu na tánni patunayan tu atanan a tolay u netan sakay nasaneg mo.

¹⁶ Awan kadán ti dapat a uhayán? Tumaknág ka dán sakay magpabawtismo sakay dumulaw tu ngahan nu Panginoon tán mapatawad ka tu kasalanan mo hide.’ ”

Nangaral ti Pablo tu Hentil hide

¹⁷ “Nagsoliyák dán ti Jerusalemáy, mentaras a pasiyaanák a magdasal tu templo ay nagkahodák ti pangitain.

¹⁸ Netan ko u Panginoon, kinagi na nikán, ‘Magalisto ka! Lumakad ka agad ti Jerusalemáy, dipo awan tanggapán nu tolay he hide u patunay mo tungkul nikán.’

¹⁹ Pero kinagi ko, ‘Panginoon, tukoy de a balang sinagoga ay sáddappán ko tu itod tánni ipepireso sakay ipabálbág ko u mánnampalataya hide.

²⁰ Sakay nikuna bunuwán de ti Esteban a sistigu mo ay katoyák hod sakay nákpagkaessaák pa tu ginimet de. Hikán pa ngane u nagbantay tu damit nu nangbuno hide nikuna.’

²¹ Pero kinagi nikán nu Panginoon, ‘Lumakad ka dán dipo paangayán taka tu adeyo a lugar, tu Hentil hide.’”

²² Nágsaneg hide ni Pablo, pero pákkakagi na ti konna hod ay nagpákhawan hidi ti husto a, “Bunuwán moy tolayan itona! Awan siya dapat a mabiyag!”

²³ Sakay tulos-tulos hide a makán pákhawán, mentaras a iwáwwasiwas de u alikábkáb sakay isássapwah de tu pahás u alikabuk.

²⁴ Kanya inyutus nu puno nu sundalo hide a iyangay ti Pablo tu kampo, sakay ipabálbág tánni matukuyan ni bakin konna dálla hod u pákhaw nu Judio hide kontara nikuna.

²⁵ Pero nikuna mapungo di dán siya ay kinagi ni Pablo tu kapitan a katoy hod, “Katoy beman tu batas a bálbággán u essa a Romano maskin awan palla nahatulan?”

²⁶ Nikuna masaneg iye nu kapitan ay immangay siya tu pupuno sakay kinagi na nikuna, “Kodya dán iye? Romano bál i tolayan iye!”

²⁷ Kanya immadene u pinuno ni Pablo sakay tinanung na siya, “Romano ka beman?” “On,” kagi na.

²⁸ Kinagi nu pinuno, “Dakál nagastus kuway tánni magin Romano.” “Pero hikán ay Romanuwák dán sapul pa a anakák,” kagi ni Pablo.

²⁹ Pagdaka a immadeyo u magimbistiga hide nikuna. Nanteng be u pinuno nu sundalo hide dipo impapungo na ti Pablo, a essa bál a Romano.

Immatubang ti Pablo tu Atubang nu Mágkataas hide a Judio

³⁰ Pero gusto a matukuyan nu pinuno ni bakin a pinagbintangan nu Judio hide ti Pablo. Kanya tu kadimadimangan ay pinadulaw na u puno nu saserdote hide sakay tu buo a miyembro nu Sanedrin. Káttapos ay pinaokbis na u pungo ni Pablo sakay inyatubang na nide.