Gimet 21 - U Maganda A Baheta Ni Jesu-Cristo

Immangay ti Pablo ti Jerusalem

¹ Nadid, káttapos me a nagpaalam nide ay nággabeng kami dán a patamo ti Cos. Tu kadimadimangan ay dimmemát kame ti Rodas sakay sapul hod ay nagdiretso kame dán ti Patara.

² Dinemáttan mi hod u essa a barko a patamo ti Fenicia, kanya immagton kami hod a simmakay.

³ Dimmemát kame tu tapat nu Cyprus a matannaw tu banda ti kawihe. Nagdire-diretso kame hanggan ti Siria pero pimmundu kame ti Tiro dipo magawas ti karga u abeng.

⁴ Inehyok mi hod u disepulus hide a katoy hod, sakay náktulos kami nide ti pitto a aldew. Tu tulung nu Banal a Ispirito ay kinagi de ni Pablo a diyan siya tumulos ti Jerusalem.

⁵ Nikuna a dumemát dán u aldew a kállakad me ay nagtulos-tulos kame dán tu págbiyahe me. Intugán di kame a atanan hanggan tu luwas nu banuwan, kaguman de u kákkabanga de sakay u anak de hide. Káddemát me tu bihebi nu diget ay limmuhud kame sakay nagdasal.

⁶ Káttapos me a nagpaalam ay simmakay kame dán tu barko, sakay nagsole dámbe hide tu bila-bilay de.

⁷ Sapul ti Tiro ay nagtulos-tulos kame a nagbiyahe hanggan makademát kame ti Tolemaida. Nákpagketa kame tu mánnampalataya hide sakay he kame hod a saldew.

⁸ Tu kadimadimangan ay nagdiretso kame ti Cesarea sakay náktulos tu bilay ni Felipe a essa be a mangngaral tu Maganda a Baheta. Essa siya tu pitto a lállake a napile ti Jerusalem tu itod.

⁹ Tehhod siya a áppat a anak a mámmadiket a prupeta.

¹⁰ Kállipas nu sangan a aldew a págyan mi hod ay dimmemát u essa a prupeta a ti Agabo a gábwat ti Judea.

¹¹ Sakay immangay siya nikame, inalap na u sinturon ni Pablo sakay inigutan na u kamát na sakay u tikád na. “Saiye u kinagi nu Banal a Ispirito: Konna he a igutan nu Judio hide ti Jerusalem u makákkao ti sinturonáy, sakay ipadakáp de siya tu Hentil hide.”

¹² Tu pákkasaneg mi he ay impákkekagbi me sakay tu taga hod hide a diyan dán siya angay ti Jerusalem.

¹³ Pero timmábbeg siya, “Bakin magsanget kam? Diyan moy panghinaán isip kuwáy! Dipo nakahandaák a papungo maski matayák pa ti Jerusalem ni kailangan, alang-alang tu ngahan nu Panginoon Jesus.”

¹⁴ Nikuna awan me siya mapugád ay timmahimik kami dán. Sakay kinagi mi dálla a, “Masunud u kagustuwan nu Panginoon.”

¹⁵ Kállipas nu sangan a aldew ay naghektat kame dán a paangay ti Jerusalem.

¹⁶ Sakay nákkuyog nikame u sangan a mánnampalataya a taga-Cesarea sakay inyangay de kame tu bilay ni Manason a taga-Cyprus sakay hed kame hod a náktulos. Nalay dán siya a mánnampalataya.

Binisita ni Pablo ti Santiago

¹⁷ Nikuna makademát kame dán ti Jerusalem ay masaya kame a tinanggap nu mánnampalataya hod hide.

¹⁸ Tu kadimadimangan na ay bimmisita kame ay di Pablo tu kán Santiago. Katoy bi hod u pupuno hide nu mánnampalataya hide.

¹⁹ Káttapos na hide a kumustaán ay essa-essa na a kinagi u bagay hide a ginimet nu Diyos tu Hentil hide tu pamamag-itan nu págserbi na.

²⁰ Nikuna masaneg di iye ay nagpure hide tu Diyos. Sakay kinagi de ni Pablo, “Tukoy mo kapátkákka, tehhod dán a sangan a libu a Judio u summampalataya ni Jesus pero atanan de ay masigasig pade a sumunud tu Kautusan ni Moises.

²¹ Sakay nabaheta de a itáttoldu mu kan tu Judio hide a mámmágyan tu banuwan nu Hentil hide a awan di dán kailangan a sumunud tu Kautusan ni Moises. Kinagi mo kam pa a diyan di dán turiyán u anak di hide oni diyan di dán sunudán u kaugaliyan tam a Judio hide.

²² Ánya nadid i dapat tamay a gimitán? Siguradu a mabaheta de a dimmemát ka.

²³ Kanya konna he u gimitán mo: tehhod he a áppat a lállake a nagpananto tu Diyos.

²⁴ Ikuyog mo hide sakay gimitán moy u páglinis sigun tu Kautusan. Hiko dán u bahala tu magastus, tánni mapagappás di dán u buuk de. Tán matukuyan nu atanan a awan tatahoden u baheta tungkul niko nan sássunudán mo u Kautusan ni Moises.

²⁵ Pero tu mánnampalataya hide a Hentil, insulat mi dán nide u disisyon me a diyan hide kuman tu ányaman a nealay tu diyos-diyosan, pate u dige sakay u hayup a natay a awan napadigiyan, sakay diyan mangibábbey oni mangilállake.”

²⁶ Tu kadimadimangan na ay kinuyog ngane ni Pablo u lállake hide sakay tinupad de u pananto de u páglinis. Káttapos ay immangay siya tu templo sakay impakapospos na ni nikan a matapos u takda a panahun nu páglinis tánni mealay u alay para tu balang essa.

U Pángdakáp di ni Pablo

²⁷ Nikuna adene dán a matapos u netakda a pitto a aldew ay hed ti Pablo tu Templo. Netan siya hod nu Judio hide a taga-Asia. Kaya sinusutan de u makpal a tolay tu Templo a dakáppán de ti Pablo.

²⁸ Ipáppákhaw de, “Kalugaran me hide, tulungan moy kame! Iye a tolay u mágtatolduwán ti kontara tu bansa a Israel, kontara tu Kautusan ni Moises, sakay kontara tu templo, maskin hádya siya a dumemát. Nangkuyog pa siya ti Griego hide tu templo; dinangáttan na iye a banal a lugar.”

²⁹ (Konna hod u kinagi de dipo netan de a kaguman ni Pablo tu banuwan ti Trofimo a taga-Efeso. Inisip de a kinuyog siya ni Pablo tu disalad nu templo.)

³⁰ Kanya nagkagulo u tolay hide tu buo a Jerusalem, sakay bigla dálla a nagdemáttan u tolay hide tu templo para dakáppán de ti Pablo. Pákkadakáp de nikuna ay ginuyod de siya a paluwas sakay insiradu de a pagdaka u pintuwan nu templo.

³¹ Bunuwán di dán nakwa ti Pablo, pero nabaheta nu pinuno nu sundalo nu Romano hide a nagkagulo ti buo a Jerusalem.

³² Nangkuyog siya a agad ti sundalo sakay tu kapitan de hide, sakay gummággenan hide a paangay tu páppágyanan nu tolay hide. Pákketa de tu puno sakay tu sundalo hide ay inyemang de u págbabálbág de ni Pablo.

³³ Immadene u pinuno sakay dinakáp na ti Pablo, sakay pinapungo na ti duwwa a kadena. Sakay tinanung na u tolay hide, “Deya i tolayan iye? Ánya ginimet naay?”

³⁴ Pero awan pare-pareho u ipáppákhaw nu katolayan. Dipo magulo kaya awan maintendiyan nu pinuno ni ánya nangyariyay, kanya inpeangay na ti Pablo tu kampo.

³⁵ Sakay káddemát de tu agdenan ay inágkat dán nu sundalo hide ti Pablo dipo lalo dán a nagkagulo u tolay hide.

³⁶ Dipo umusoseg hide a magpapákhawán ti konna he, “Bunuwán siya!”

Inpagtanggul ni Pablo u Sadile na

³⁷ Nikuna isáddáp di dán ti Pablo tu kampo ay nákkekakagbi siya tu pinuno, “Maare taka a makauhon? Malalake kabál a magupos ti Griego!” Tábbeg nu pinuno.

³⁸ “Kagi ko ni hiko itod u Egipcio a nángdipalongo tu págribeldi sakay immangay hide tu kaparangan, kaguman na u áppat a libu a lállake.”

³⁹ Timmábbeg ti Pablo, “Essaák a Judio, dimmakállák ti Tarso nu Cilicia, tagahodák ti banuwanan itod a tanyag. Mákkekagbiyák niko a payaginák moy a makapagupos ti tolaye hide.”

⁴⁰ Pinakultaden be siya nu pinuno, kanya timmaknág ti Pablo sakay gimmemmak tu balitang nu agdenan sakay sininyasan na u tolay hide a tumahimik. Nikuna tahimik dán hide a atanan ay nagupos ti Pablo ti upos a Hebreo.