Efeso 1 - U Maganda A Baheta Ni Jesu-Cristo

¹ Mahal mi hide a kákkapatkákka, hikán ay ti Pablo a apostol ni Cristo Jesus a ayun tu kaluuban nu Diyos. Saiye u sulat ko para tu pinile hide nu Diyos a he ti Efeso sakay matapat be a sumunud ni Cristo Jesus:

² Magkahod kam nakwa ti pagpapala sakay kapayapaan a gábwat tu Diyos a Ama tam sakay tu Panginoon tam a ti Jesu-Cristo.

U Págpapala hide a Ispiritwal tu Pamamag-itan ni Cristo

³ Magpasalamat kitam tu Diyos sakay Ama nu Panginoon tam a ti Jesu-Cristo! Impagkaluub na nikitam u atanan a págpapala a ikapiya tam a gábwat ti langet dipo tu pákpagkaessa tam ni Cristo.

⁴ Bagu pa a lalangán i munduwáy ay pinile kitamon nu Diyos tánni magin banal sakay awan ti kapintasan tu atubang na. Dipo tu págmahal nu Diyos,

⁵ ay naplanu na dán tu itod a gimitán kitam a anak na tu pamamag-itan ni Jesu-Cristo ayun tu layunin sakay tu kaluuban na.

⁶ Puriyán tam u Diyos dipo tu makataka-taka a kagbi na a inyatád na nikitam tu pamamag-itan nu pinakamamahal na a Anak.

⁷ Tinubus kitam ni Cristo tu pamamag-itan nu kákkatay na, sakay pinatawad na kitamon tu kasalanan tam hide. Konna hod ti kadakál u págmahal na,

⁸ a impabate na nikitam! Inatádden na kitam ti karunungan sakay pangintendi.

⁹ Dipo gusto na a maintendiyan tam u sekreto a plano nu Diyos, a mehayag tu pamamag-itan ni Cristo,

¹⁰ káddemát nu netakda a panahun. U plano nu Diyos ay pagessaan na u atanan a bagay a katoy ti langet sakay ti lutaáy sakay ipasakup na ni Cristo.

¹¹ Dipo ni Cristo, ay nagin sakup kame nu Diyos a nanggimet tu atanan a bagay ayun tu plano sakay kaluuban na. Nangyare iye nikuna piliyán na kame tu itod pa.

¹² Ginimet na iye para hikame a nedipalongo a simmampalataya ni Cristo ay magpure nikuna dipo tu kapangyariyan na.

¹³ Hikam be ay nagin sakup nu Diyos dipo nikuna masaneg moy u Maganda a Baheta nu kaligtasan ay simmanpalataya kam ni Cristo. Kanya impagkaluub nikam u Banal a Ispirito a inpananto nu Diyos bilang tanda a pinile na kam.

¹⁴ U Banal a Ispirito u katibayan a matanggap tam a gábwat tu Diyos u impanantu na hide hanggan makao tam u ganap a kaligtasan. Kaya puriyán tam u makapangyariyan a Diyos.

U Dasal ni Pablo

¹⁵ Kanya sapul nikuna mabaheta ko u pánnampalataya moy tu Panginoon tam a ti Jesus sakay tu págmahal moy tu atanan a sakup hide nu Diyos,

¹⁶ ay awanák ti imang a mágpapasalamatán tu Diyos dipo nikam. Sakay palagi takam la a idáddasal.

¹⁷ Sakay u lagi ko a dasal tu Diyos nu Panginoon tam a Jesu-Cristo, u dakila a Ama, ay atádden na kam ti karunungan sakay pángngintendi gabwat tu Banal a Ispirito tánni makilala moy siya ti husto.

¹⁸ Idáddasal kube tu Diyos a nakwa demlagan nu Diyos i isip moye tánni matukuyan moy u tungkul tu asaan tam a inlaan na nikitam bilang sakup na hide. Sakay para maitendiyan moy ni sakodya ti kakpal u págpapala a inlaan na para tu pinili na hide.

¹⁹ Sakay ipagdasal ku be a matukuyan moy u awan ti kahád a kapangyariyan na nikitam a manalig nikuna. Itod be a kapangyariyan,

²⁰ u nangbiyag a huway ni Cristo sakay nangpaetnod nikuna tu kawanan nu Diyos ti langet.

²¹ Kanya sakup nu kapangyariyan ni Cristo u atanan a pághare, pámmahala, kapangyariyan, sakay pámmuno. Siya u pinakamataas a ngahan, bakán la ti panahunan iye nan pate tu pademát pa.

²² Impasakup be nu Diyos tu kapangyariyan ni Cristo u atanan a bagay, sakay siya u indátton na a puno tu mánnampalataya hide.

²³ Hikitam a mánnampalataya hide u kumán a bággi ni Cristo, dipo atanan a hed ni Cristo ay hod nikitam. Siya u mangatád ti biyag tu atanan a bagay siya ay hod tu atanan a lugar.