2 Timoteo 1 - U Maganda A Baheta Ni Jesu-Cristo

¹ Iye a sulat ay gábwat nikán a ti Pablo a apostol ni Cristo Jesus ayun tu kaluuben nu Diyos para ipangaral u nepananto a biyag a matanggap tam tu pamamag-itan ni Cristo Jesus.

² Para ni Timoteo a mahal ko a anak: Magkahod ka nakwa ti pagpapala, kagbi, sakay kapayapaan a gábwat tu Diyos a Ama sakay ni Cristo Jesus a Panginoon tam.

Págpasalamat sakay Paala-ala

³ Magpasalamaták tu Diyos a pagserbiyan ko ti tapat, konna tu ginimet nu nuno ko hide. Awan taka kalimunan a ipagdasal aldew ay ti gibi.

⁴ Maala-ala ko u págsanget mo tu itod sakay gugusto taka a ketan tánni magkahodák ti dakál a kasayaan.

⁵ Awan ko malimunan u tapat mo a pánnampalataya a konna tu pánnampalataya nu apo mo a bakás a ti Loida sakay nena mo a ti Eunice. Sakay hanggan nadid, ay siguraduwák a konna palla hod u pánnámpalataya mo.

⁶ Dipo he, ay ipaala-ala ko niko a gamitan mo a lagi u inyatad niko nu Diyos a kakayanan a tumulung tu mannampalataya hide nikuna itupo ko niko u kamát ko.

⁷ Dipo u Banal a Ispirito a inyatad nikitam nu Diyos ay bakán a ispirito nu ánteng nan Ispirito nu kapangyariyan, págmahal sakay págpugád ti sadile.

⁸ Kaya dyan mo ikasanike a magpatunay tu Panginoon tam oni tu kákkepireso ko alang-alang nikuna. Nan mákpagtiis ka tu hirap dipo tu págtoldu tam tu Maganda a Baheta. Ta atadden ka nu Diyos ti begsak a gimitan iye.

⁹ Siya u nángligtas sakay nangpile nikitam para magin banal a tolay tu atubang na. Ginimet na iye tu pamamag-itan ni Cristo Jesus, bakán a dipo tu mágkaganda tam a gimet nan ayun iye tu kagbi sakay tu kaluuban na a inlaan na para nikitam bagu pa a lalangan i munduway.

¹⁰ Sakay nehayag la iye nikuna dumemát ti Cristo Jesus a Tagapagligtas tam. Natalo na u kamatayan sakay inhayag na ate hod a biyag a awan ti kahad tu pamamag-itan nu Maganda a Baheta.

¹¹ Piniliyák na a apostol sakay tagapagtoldu para mepahayag ko u Maganda a Baheta.

¹² Ina u dahilan kaya maghirapák ti konna he. Pero maskin konna pa man hod u nangyare nikán, ay awan ko iye ikasanike. Dipo tukoy ko nitideya u sinampalatayaan ko sakay siguraduwák a awan na pabayan u impagkatiwala ko nikuna hanggan tu aldew a kássole na.

¹³ Sunudán mo u tatahoden a adal a intoldu ko niko. Manatile ka tu pánnampalataya sakay tu págmahal a natanggap tam tu pákpagkaessa tam ni Cristo Jesus.

¹⁴ Tu tulung nu Banal a Ispirito a katoy nikitam, ay ingatan mo u atanan a tatahoden a toldu a nepagkatiwala niko.

¹⁵ Tukoy mo be a inadagginak dán nu atanan a mannámpalataya hide ti Asia, pate di Figelo sakay ti Hermogenes.

¹⁶ Pagpalaán nakwa nu Diyos u pamilya ni Onesiforo; dipo pirmiyák na a angay bisitaán sakay pasayaán. Awanák na ikasanike maskin piresuwák.

¹⁷ U tatahoden, tu káddemát na ti Roma ay piliták na a inehyok hanggan a netanak na.

¹⁸ Kagbiyan nakwa siya nu Panginoon káddemát nu aldew a Pághatul na. Tukoy-tukoy mo labe ni kodya siya a nagserbi nikán ti Efeso.