2 Tesalonica 3 - U Maganda A Baheta Ni Jesu-Cristo

Ipagdasal Moy Kame

¹ Nadid, kákkapatkákka me hide, ipagdasal moy kami be para u upos nu Panginoon ay mabilis a mekalat sakay masaya a tanggapán nu iba pa hide a lugar, a konna tu ginimet moy.

² Ipagdasal moy kami be a iligtas kame nu Diyos tu mágkadukás a tolay. Dipo awan atanan a tolay ay maniwala tu itoldu me.

³ Matapat u Panginoon. Atádden na kam ti begsak ni pannampalataya sakay ingatan na kam para awan kam matalo ni Satanas.

⁴ Dipo tu Panginoon ay dakál u tiwala me nikam sakay tukoy me a tulos-tulos moy a sunudán u intoldu me nikam.

⁵ Igiya kam nakwa nu Panginoon tán lalo moy a maintendiyan u tungkul tu pagmahal nu Diyos sakay tu tiyaga a gabwat ni Cristo.

Dapat Kitam a Magtarabaho

⁶ Nadid, kákkapatkákka, te iyutus kame nikam a gábwat tu Panginoon Jesu-Cristo, adeyuwan moy u tamad hide sakay u umád a sumunud tu itáttoldu me nikam.

⁷ Tukoy moy labe a dapat moy a ahigán u ginimet me. Awan kame nagin tamad a magtarabaho nikuna a hod kami palla hina.

⁸ Awan kame immasa maski ni ti deya nikam tu kákkabiyag me, nan binayaden me u natanggap me nikam. Aldew ay ti gibi ay nagtarabaho kame para awan kame kailangan a mangabala nikam a mangaged ti magastus me.

⁹ Ginimet mi iye bakán a awan kame ti karapatan a maguhay tu tulung moy nan atáden me kam ti halimbawa a dapat moy a ahigán.

¹⁰ Nikuna a kaguman moy kame palla, ay sa iye u utus a kinagi me nikam: “Diyan moy pakanán u deyaman a umád a magtarabaho.”

¹¹ Kanya ikagi me nikam nadid iiye a utus, dipo nabaheta me a te umád nikam a magtarabaho, a awan ti agum a gággimitán nan mak-alam tu biyag nu agum a tolay.

¹² Tu ngahan nu Panginoon tam a ti Jesu-Cristo, mahigpit me a kagiyán ti tolayan iye hide a ayusan de u biyag de sakay magtarabaho hide para tu kabiyagen.

¹³ Kákkapatkákka me hide, diyan kam magsawa a maggimet ti maganda.

¹⁴ Ni tehhod man hina a awan sumunud ti kákkagiyan kuwáy ti sulatáy, tandaan moy siya sakay iwasan para mapasanike siya.

¹⁵ Pero diyan moy be siya ibilang a kadima moy. Nan, tolduwan moy siya, ta dipo siya ay nebilang dán a kapatkákka moy.

¹⁶ U Panginoon tam a naggábwatan nu kapayapaan ay siya nakwa u mangatád nikam ti kapayapaan tu atanan a pagkakataun. Nakwa ay pirme kam a aguman nu Panginoon.

¹⁷ Hikán a ti Pablo u nagsulat ti iye a pángngumusta nikam: Iye u pirma ko tu atanan a sulat ko. Konnaák he a magsulat.

¹⁸ Pagpalaan kam nakwa nu Panginoon tam a ti Jesu-Cristo.