2 Tesalonica 1 - U Maganda A Baheta Ni Jesu-Cristo

¹ I sulatan iye ay gabwat nikan a ti Pablo, sakay kaguman ko di Silas ay ti Timoteo. Tu Simbaan ti Tesalonica, mákkumusta kame nikam a mánnampalataya hide a taga-Tesalonica, a pinile nu Diyos Ama sakay u Panginoon tam a ti Jesu-Cristo.

² Magkahod kam nakwa ti págpapala sakay kapayapaan a gábwat tu Diyos Ama sakay tu Panginoon tam a ti Jesu-Cristo.

U Pághukum

³ Kákkapatkákka me hide, lagi kame a magpasalamat tu Diyos dipo nikam. Dapat mila iye a gimitán, dipo tulos-tulos la u kállagu nu pánnampalataya moy ni Cristo, sakay mas pa u págmahal moy tu balang essa.

⁴ Kanya ipagmadakál mikam tu agum hide a mánnampalataya tu Diyos dipo tu katatagen moy sakay tu pánnampalataya moy. Mepagmadakál me be u págtiis moy tu atanan a hirap sakay tu tulos-tulos moy a kassampalataya tu Diyos maski ni makpal u mangpahirap nikam.

⁵ Nadid u matibay a kassampalataya moy, ay saina u katunayan a tama u hatul nu Diyos. U keangayan ni ina a hirap moy, ay gimitán kam nu Diyos a karapat-dapat a pasakup tu kahariyan na. Kanya u págtiis moy nadid, ay alang-alang tu kahariyan na.

⁶ Gimitán nu Diyos u karapat-dapat; talaga a parusaan na u nagpahirap hide nikam.

⁷ Sakay hikam be a mághahirapán hide ay atádden na ti imangan moy a kaguman me. Mangyare ina tu kássole nu Panginoon Jesus a gábwat ti langet a kaguman nu makapangyariyan na hide a anghel.

⁸ Dumemát siya a tehhod a maggehab a apoy, sakay parusaan na u awan hide nangtengge tu Diyos sakay awan naniwala tu Maganda a Baheta tungkul tu Panginoon tam ati Jesus.

⁹ U parusa de ay awan ti katapusan a paghihirap, mehiwalay hide tu Panginoon, sakay hiwalay be hide tu makataka-taka a kapangyariyan na.

¹⁰ Sa ina u mangyare nide tu aldew nu káddemát na. Ta itona a aldew ay puriyán siya sakay parangalan siya nu pinagin banal na hide, a awan ti agum nan u atanan a simmampalataya nikuna. Sakay hikam ay kasale kam bi hod, ta tinanggap moy be u Maganda a Baheta a ingkagi me nikam.

¹¹ Iye u dahilan ni bakin lagi me kam a idáddasal. U dasal me ay nakwa ay magin karapat-dapat kam tu Diyos tu pángdulaw na nikam. Sakay idasal mi be a tu tulung nu kapangyariyan na ay magimet moy u atanan a mágkaganda a bagay a gusto moy a gimitán dipo tu pánnampalataya moy.

¹² Para tu konna hod ay puriyán nu iba hide a tolay u Panginoon Jesus, dipo tu ugale moy a maganda. Sakay maparangalan kam be a kaguman na. Mangyare ina dipo tu kagbi nu Diyos, sakay nu Panginoon Jesu-Cristo.