2 Juan 1 - U Maganda A Baheta Ni Jesu-Cristo

¹ Hikán a Tagapangasiwa u nagsulat ti iye. Iye a sulat ay para tu pinile nu Diyos a bábbey sakay tu anak na hide a mahal ko a tahod. Bakán la a hikán u nagmahal nikam nan pate u atanan a nakatukoy tu tatahoden.

² Mahal mikam dipo tu tatahoden a mágyan nikitam sakay katoy nikitam hanggan-hanggan.

³ Iyatád nakwa nikitam nu Diyos a Ama sakay ni Jesu-Cristo a anak na u págmahal, kagbi sakay kapayapaan tu pamamagitan nu tatahoden sakay tu págmahal.

U Tatahoden sakay u Págmahal

⁴ Masayaák a tahod ta netan ko a simmampalataya tu tatahoden u agum hide a anak mo. Gággimitán de u inyutus nu Ama nikitam.

⁵ Nadid pinile nu Diyos a bábbey, te iyohunák niko. Iye a sulat ko niko ay awan bigu a kautusan nan u date a kautusan a sapul pa ti sapul ay tukoy tamon. Iye ay u kautusan a magmahalan kitam a atanan.

⁶ Sakay sa iye u gusto a kagiyán nu págmahal: sunudán tam u kautusan na. Sakay sa iye u inyutus nu Diyos a natukuyan tam tu sapul pa, a magmahalan kitam tu balang essa.

⁷ Nadid, makpal dán ti munduwáy u manglinlang hide, magtoldu hide a ti Jesu-Cristo ay awan nagin tolay. U konna hod hide a tolay ay máglinlang sakay kontara ni Cristo.

⁸ Magingat kam tánni awan mawanan ti kabuluhan u pinaghirapan me nan maalap moy u kabuuwan nu gantimpala moy.

⁹ Ni ti deyaman u awan umayun nan dagdagen napa u toldu ni Cristo ay awan nákpagkaessa nikuna u Diyos. Ni ti deyaman u umayun tu toldu ni Cristo ay mákpagkaessa nikuna u Ama sakay u Anak.

¹⁰ Ni te dumemát nikam a tolay a te iba a toldu ay dyan moy siya tanggapán tu bilay moy oni uhunán,

¹¹ dipo u umuhon nikuna ay kaessa na tu madukás na a gimet.

Katapusan a Bilin

¹² Makpalák pa nakwa a ikagi nikam pero awan ko dálla isulat. Dipo umasaák a makaangayák hina sakay makauhon takam tánni mas masaya kitam a tahod.

¹³ Kumusta ka kan kagi nu anak hide nu kapatkákka mo a bábbey a pinile be nu Diyos a kapareho mo.