2 Corinto 9 - U Maganda A Baheta Ni Jesu-Cristo

Tulung para tu Kákkapatkákka hide

¹ Nadid, awan ku dán kailangan a magsulat pa nikam tungkul tu káttulung tu kákkapatkákka hide ti Jerusalem.

² Dipo tukoy ko a handa kamon a tumulung, sakay impagmadakál takam pa tu taga-Macedonia hide. Kinagi ko a handa kamon a taga-Acaya hide, tu nakalipas pa he a taon; kaya makpal u nalukag tu págtulung dipo tu págmalasakit moy.

³ Kaya pinágdipalongo ku dán hina u kákkapatkákka tam hide tánni awanák mepasanike tu pángmadakál ko tungkul nikam sakay tánni mehanda dán u tulung moy, a konna tu kinagi ko.

⁴ Dipo ni dimmemátták hina sakay ti kákkapatkákka tamáy hide a taga-Macedonia, sakay ketan de a awan kam palla handa, ay mepatagamaák la sakay pati hikam.

⁵ Kaya naisip ko a mágdipalongo dálla hina u kákkapatkákka tam bagu hikán tánni mehanda de u tulung a inpananto moy. Tánni konna hod ketan a magaan tu pággisipan moy u pángngatád moy bakán a sapilitan.

⁶ Tandaan moy iye: u magmula ti badit ay mag-ane labe ti badit, sakay u magmula ti makpal ay mag-ani labe ti makpal.

⁷ U balang essa ay dapat mangatád ayun tu kagustuwan na sakay tehhod a kasayaan bakán a napilitan la, dipo mahal nu Diyos u mangatád ti kusa a te kasayaan.

⁸ Sakay kaya kam a pasaganaán nu Diyos tu atanan a bagay a higit pa tu kailangan moy hide. Para tu atanan a panahun ay magin sapat kam tu atanan a bagay, tánni tehhod kam a metulung tu te kailangan hide.

⁹ Konna tu kinagi nu Kasulatan: “Siya u mángngatád tu mágkahirap hide; Awan ti kahád u kabaitan na.”

¹⁰ U Diyos a mangatád ti bine tu mágmula sakay makan ay siya be u mangatád sakay mangpasagana tu atanan a kao moy para maslalo kampa a makatulung tu agum.

¹¹ Pasaganaán nakam tu atanan a bagay para lalu kam a makatulung tu agum. Tu pamamag-itan moy ay kumakpal u magpasalamat tu Diyos dipo tu tulung moy a iyangay ko nide.

¹² U káttulung moy tu kákkapatkákka hide ay bakán la a pángsuporta tu pangangailangan de, nan magin dahilan pa nu awan ti kahád a págpasalamat de tu Diyos.

¹³ U pángngatád moy ay mangpatunay nide a tapat moy a sinunud u Maganda a Baheta tungkul ni Cristo. Dipo hina, magpure hide tu Diyos.

¹⁴ Kaya buo a págmahal di kam a idáddasal, dipo tu dakila a kaluub nu Diyos nikam.

¹⁵ Salamat tu Diyos dipo tu kaluub na a awan ti kapareho!