2 Corinto 8 - U Maganda A Baheta Ni Jesu-Cristo

U Dapat a Pángngatád Nu Essa a Kristiyano

¹ Nadid, kákkapatkákka me hide, gusto ko a ibaheta nikam u nagimet nu págmahal nu Diyos tu mánnampalataya hide ti Macedonia.

² Nagdanas hide ti matindi a kahirapan, madággi iye a pagsubuk nide. Pero te kasayaan pade hide kaya masaya hide a mangatád ti makpal a tulung maski grabi u hirap de.

³ Nagbuluntaryo hide a mangatád bakán la a ayun tu makaya de, nan susubra pa. Tukoy ko iye dipo,

⁴ mákkekakagbi hide nikame a atádden hide ti pagkakataun a makatulung tu kákkapatkákka ti Judea.

⁵ Sakay higit pa tu áasaan me u ginimet de; dipo inlaan de u sadile de tu Panginoon, sakay káttapos ay inyalay de u sadile de nikame, ayun tu kaluuban nu Diyos.

⁶ Dipo ti iye ay naisip me a maganda nakwa ni itulos moy u pággipun tu tulung para tu mágkahirap hide. Kaya ti Tito a nangsapul ti gawainan iye hina nikam ay inuhon me a magsole hina para tapusán na u sinapulan na a pággipun tu tulung moy.

⁷ Hikam a taga Corinto hide ay tanyag dipo mabegsák u pánnampalataya moy, mágkalalake kam a mangaral, makpal kam a tukoy, masipag kam a magserbi tu Diyos, sakay dakál u págmahal moy nikame. Nadid, gusto ko a magin tanyag kam tu pángngatád.

⁸ Awan ko iye kagiyán para utusan takam; nan kagiyán ko la iye a káttulung nu agum a simbaan tánni mepeta moy nikame u katapatan nu págmahal moy.

⁹ Dipo tukoy moy ni sa kodya ti kadakál u págmahal nu Panginoon tam a ti Jesu-Cristo, a maski mayaman siya ay nagin mahirap tánni yumaman kam tu pamamag-itan nu pagka-mahirap na.

¹⁰ Sakay sa iye u mepayo ko tungkul hina: itulos-tulos moy u pángngatád a nasapulan tu taon he. Hikam u nángdipalongo bakán la a tu pággimet nan pate tu págplano.

¹¹ Kaya itulos-tulos moy dán iye! U págsumikap a impeta moy tu itod ay itulos-tulos moy hanggan a matapos. Mangatád kam ayun tu makaya moy.

¹² Dipo ni kusang-luub u pángngatad moy, tanggapán nu Diyos u ánya man a kaya moy a meatád; awan nakam pagagiden tu awan nikam.

¹³ Awan ko kagiyán a mangatád kam tánni magaanan u agum sakay hikam be u maghirap nan u gusto ko la ay pareho kam a makatulung tu bawat essa para magkahod kitam ti pantay-pantay a kalagayan.

¹⁴ Pero masagana kam be nadid kaya dapat la a tulungan moy u tehhod hide a kailangan. Ni hikam be u tehhod a kailangan sakay hide ay masagana, ay hide be u tumulung nikam. Tánni mamagtulungan kam tu odas nu pangangailangan. Ti konna hod ay pantay-pantay u kalagayan nu balang essa.

¹⁵ Ayun tu kinagi na tu Kasulatan: “U nagipun ti makpal ay awan summubra, Sakay u nagipun ti badit ay awan be kinulang.”

¹⁶ Pero magpasalamaták tu Diyos dipo impabate na ni Tito u págmalasakit na nikam a kapareho nu págmalasakit ko nikam.

¹⁷ Dipo bakán la a pimmayag siya tu impákpágguhon me, nan siya dán u nagpirisenta dipo gusto na be a angay hina.

¹⁸ Pakuyugán me nikuna u kapatkákka tam a matengge nu atanan a mannampalataya hide dipo tu pángngaral na tu Maganda a Baheta.

¹⁹ Sakay bakán la a ina! Siya u pinile nu mánnampalataya hide a makaguman me tu págbiyahe tánni matulungan di kame tu pángngasiwa a págtugán tu iambag moy ti Judea. U konna he a págserbi ay para tu kadakilaan nu Panginoon, sakay para mepeta me u kagustuwan me a makatulung.

²⁰ Iye u ginimet me bilang pággingat tánni awan ti makagi u deya man tungkul tu pángngasiwa me ti iye a kakpal a tulung a táttawidán me.

²¹ Sikapán me a megimet iye ti maayus, bakán la tu pangileng nu Panginoon nan magin tu pangileng nu tolay hide.

²² Kaya paangayán me hina para makaguman de u essa tam pa a kapatkákka a napurbaan mi dán tu makpal a pagkakataun sakay netan me nikuna a masigasig siya a tumulung. Mas lalo siya a matiyaga a tumulung nadid dipo tu págtiwala na nikam ti husto.

²³ Tungkul ni Tito, siya u kaguman ko sakay katulung ko tu gawain. Tungkul be tu kákkapatkákka a kaguman na, hide u pinaangay nu mánnampalataya hide. Sakay ti Cristo u maparangalan dipo tu gawain de hide.

²⁴ Kaya ipabate moy nide u tapat moy a págmahal tánni ketan nu mánnampalataya hide a awan kame nagkamale tu pángmadakál me tungkul nikam.