2 Corinto 7 - U Maganda A Baheta Ni Jesu-Cristo

¹ Nadid, mahal me hide a kákkapatkákka, nadid ta inpananto nikitam nu Diyos iye hide a bagay ay adággen tam u atanan a mágkadukás a gimet a makapangatád ti dangát tu isip tam sakay makedukás tu bággi tam. Sikapán tam a mabiyag ti banal sakay tehhod a ánteng tu Diyos.

U kasayaan ni Pablo

² Tanggapán moy kame tu puso moy. Awan kame ti ginimet a madukás maski ni tideya man nikam. Awan me sinida oni dinaya u tideyaman.

³ Awan ko iye kagiyán para págngállan takam. Konna ngane tu kinagi ko nikam, mahal takam a tahod. Kaya biyag man oni kamatayan awan magbagu u págmahal ko nikam.

⁴ Grabi ti kadakál u págtiwala ko nikam, lagi takam a ipagmadakál! Maski makpal kame a tiniis, u mabate ko ay kasayaan a awan ti kapareho.

⁵ Nikuna dimmemát kame ti Macedonia ay awan kame padi ti imang, Dipo maski ni hádya ay puro hirap u nadanas me. Tu palebut me ay atoy hod u kumontara hide nikame sakay tu pusu me ay tehhod a ánteng.

⁶ Pero u Diyos a mangpáppasaya tu mágkalungkut hide ay pinasaya na kame tu pamamag-itan nu káddemat ni Tito.

⁷ Sakay bakán la a tu káddemát na u nangpasaya nikame nan u kabaitan a ginimet moy nikuna. Imbaheta na a maammaw kam a tahod nikán. Imbaheta na be u kalungkutan moy dipo tu nangyare hide, sakay u págmalasakit moy nikán, kaya mas laluwák a minasaya.

⁸ Dipo maski ni nakapangatád ti kalungkutan i sulat kuwáy ay awan ko padi pinagsisiyan u págsulat ko. Nagsisiyák tu dipalongo dipo tukoy ko a nakapangatád nikam ti kalungkutan u sulat ko, pero awan la nalay.

⁹ Pero nadid ay masayaák dipo u kalungkutan a itod u nánggiya nikam tánni magsise sakay addággen moy u kasalanan. Iye a kalungkutan ay kaluuban nu Diyos, kaya awan nakepadukás nikam u insulat ko hide.

¹⁰ Dipo u kalungkutan a ayun tu kaluuban nu Diyos, u mánggiya nikam tánni magsise sakay magbagu, para maligtas kam. U konna he a kalase ni kalungkutan ay awan pagsisiyan. Pero u kalungkutan nu bakán hide a taga sunud nu Diyos ay kamatayan u demáttán na dipo awan ti págsise.

¹¹ Ilingán moy u inyatád nu kalungkutan a ayun tu kaluuban nu Diyos. Dipo ti ina ay nagin masigasig kam a patunayan a awan kam ti kasalanan tungkul tu bagay hide a kinagi ko. Naiyamut kam tu gimet a madukás sakay nagkahod kam ti ánteng. Nagin masigasig kam a mesole u date tam a pamággagum. Sakay pinarusaan moy a agad u te kasalanan hide. Pinatunayan moy dán ina nikán a áwan kam ti tukoy ti kasalananan itod.

¹² Tukoy nu Diyos a u sulat ko nikam, ay bakán la a para tu nagkasala oni tu nagkasalaan na, nan tánni ipeta ko nikam tu atubang nu Diyos a hikam ay tunay a tapat nikán.

¹³ Kaya u ginimet moy u nangpasaya nikán a tahod. Mas laluwák pa a nasaya dipo tu kasayaan a nabate ni Tito nikuna nakaguman nakam hina.

¹⁴ Dipo impagmadakál takam nikuna tu itod, sakay nadid ay napatunayan na a tatahoden u atanan a kinagi ko nikuna tungkul nikam kanya awanák nasanike.

¹⁵ Sakay nadid maslalo kampa a nepamahal nikuna dipo awan na be malimu-limunan u kássunud moy sakay u maganda a págtanggap sakay pággalang moy nikuna.

¹⁶ Masayaák dipo napatunayan ko a mapagkatiwalaan takam ti husto.