2 Corinto 6 - U Maganda A Baheta Ni Jesu-Cristo

¹ Nadid, bilang kaguman tu gawain nu Diyos, ay mákkekakagbi kame nikam a dyan moy sayangán u inyatád nikam nu Diyos a pagpapala.

² Dipo kinagi nu Diyos: “Sinaneg takam tu tama a panahun, Sakay tinulungan taka tu aldew nu págligtas.” Mágsaneg kam! Nadid dán u tama a panahun! Nadid dán u aldew nu págligtas!

³ Iniwasan me a makagimet ti makasaket tu agum, tánni awan hide ti makagi tu págserbi me tu Diyos.

⁴ Nan impeta me tu atanan a gimitán me a tagapagserbi kame nu Diyos: tu pamamag-itan nu págtiis tu atanan kalase nu kahirapan, kalungkutan, sakay kagipitan.

⁵ Binálbág di kame, impireso, sakay ginulo kame nu katolayan. Nadanas me a magtrabaho ti husto, awan mátdug ti magdamag sakay awan kuman ti sangan a aldew.

⁶ Pinatunayan me a tagapagserbi kame nu Diyos tu pamamag-itan nu malinis a kákkabiyag, karunungan, págtiyaga, kabaitan, tu pamamag-itan nu pángdipalongo nu Banal a Ispirito sakay tapat a págmahal.

⁷ Tapat me a impangaral u Maganda a Baheta tungkul tu kapangyariyan nu Diyos. U matuwid a kákkabiyag u armas me a panglaban sakay pangsangga.

⁸ Bilang tagapagserbi nu Diyos, nadanas me a ahakán sakay imetmet, puriyán sakay sestiyan. Neturing kame a mabule, maski ni tatahoden u kagiyán me.

⁹ Inturing kame nu agum a awan di kame kilala, maski tanyag kame lagi a dilikadu u biyag me pero biyag kame palla hanggan nadid. Maski ni pinahirapan di kame, ay awan kame padi natay.

¹⁰ Maski maglungkut kame, ay tehhod kame padi a kasayaan; maski ni mahirap, pero mapayaman be u agum; lubu-lubus, pero u tatahoden kao me u atanan a bagay.

¹¹ Tapatan kame a nagupos nikam taga-Corinto hide. Ni ánya u katoy tu puso me ay siya u ingkagi me nikam.

¹² Awan kame nagkulang tu págmahal me nikam, pero hikam u nagkulang tu págmahal moy nikame.

¹³ Mákpagguhunák nikam a konna tu essa ama, mahalán moy kame a konna tu págmahal me nikam.

U Pákpággagum tu Awan Mánnampalataya

¹⁴ Dyan kam mákkaessa tu awan hide mánnampalataya. Dipo awan maare a magkaessa u malinis sakay u madukás, oni demlag sakay u diklám.

¹⁵ Ni kodya a awan magkasundu ti Cristo sakay ti Satanas konna bi hod u mánnampalataya tu awan mánnampalataya.

¹⁶ U Diyos u hed nikitam kaya hikitamon u Templo nu Diyos a biyag dipo hina madukás nite ugnayan u Templo nu Diyos tu diyos-diyosan. Siya dán u nagkagi: “Mágyanák sakay mákkabiyagák nide, Hikán u magin Diyos de, sakay hide ay magin kao ko.

¹⁷ Kaya umadeyo kam tu tolay hide a awan sumássunud nikán, Humiwalay kam nide,” kagi nu Panginoon. “Dyan kam kumahap tu ánya man a neturing a madangát, tánni tanggapán takam.

¹⁸ Hikán u magin ama moy, sakay hikam be u magin anak ko hide. Kagi nu Panginoon a Makapangyariyan.”