2 Corinto 4 - U Maganda A Baheta Ni Jesu-Cristo

U Kayamanan a Ispiritwal tu Págdáttonan a Gimet ti Luta

¹ Nadid, dipo tu kagbi nu Diyos, ay pinili na kame para ti iye a tarabaho, kaya awan kame panghinaan ti isip.

² Inadággen midán u gimet me hide a makasani-sanike sakay gággimitán ti tagu. Awan kame mángloko sakay awan me dag-dagen oni palitan u upos nu Diyos. Nan hayagan me a impangaral u tatahoden sakay iye ay tukoy nu Diyos. Kaya handa kame a pahatul maskin deya.

³ Pero maski ni maliwanag u ibbbaheta me. Kumán pade iye a te tapoh dipo u netakda hide a maparusaan ay awan de maintendiyan u gusto ni iye a kagiyán.

⁴ Awan hide summampalataya, dipo u isip de ay binuhák nu diyos ni munduwáy. Binuhák na hide tánni awan de ketan u demlag nu Maganda a Baheta tungkul tu demlag ni Cristo a kapareho nu Diyos.

⁵ Bakán a u sadile me u ipáppangaral me nan ti Cristo Jesus a Panginoon tam. Nagserbi kame nikam dipo tu págmahal me ni Cristo Jesus.

⁶ Dipo u Diyos mismo u nagkagi a, “Magkahod ti demlag tu kadiklámman.” Siya be u nangdemlag tu puso me hide tánni ketan me u kadakilaan nu Diyos a netan tu hupa ni Cristo.

⁷ Kumán kame la a pággasákkan a banga dipo awan kame ti kakayanan, pero intiwala na nikame i kayamanan iye a Ispirituwal dipo gustu na a ipatengge au awan masukat a kapangyariyan ay gábwat nikuna bakán me a kao.

Nákpagkasundo tu Diyos tu Pamamag-itan ni Cristo

⁸ Páppahirapan di kame ti husto pero awan kame summuko. Ni minsan, ay awan me tukoy u gimitán me pero awan padi mawanan ti pag-asa.

⁹ Usigán di kame pero awan kame pinabayan nu Diyos. Páppasakitan dikame pero awan pade matuluyan a matay.

¹⁰ Lagi kame a dumanas ti kahirapan konna tu pághirap a dinanas ni Cristo nikuna a natay siya; para ipareho me u biyag me tu biyag ni Cristo a siya u mángpeta a biyag pade ti Jesus a atoy nikame.

¹¹ Dipo lagi kame a katoy tu dilikadu a kalagayan alang-alang ni Cristo, tanni tu pamamag-itan nu bággi me a matay, ay mehayag a biyag siya.

¹² Kaya maski ni kamatayan u maguhay nikame dipo tu pángngaral me tu Maganda a Baheta, itod u ingkapiya moy dipo nagkahod kamon ti biyag a awan ti kahád.

¹³ Kinagi tu Kasulatan, “Nagupusák dipo simmampalatayaák.” Konna bihod u ginággimet me, kaya magupos kame dipo simmampalataya kame.

¹⁴ Dipo tukoy ko a u Diyos a nangbiyag a huway tu Panginoon a ti Jesus, ay siya labe u huway a mangbiyag nikame a konna tu ginimet na ni Jesus. Sakay siya u máng-angay nikam sakay nikame tu atubang na.

¹⁵ Dipo u atanan nu págtiis me ay para tu kapiyyaán moy, tánni lalu pa a kumáppal u tolay a makatanggap tu págpapala nu Diyos. Para makpal be u magpasalamat sakay magpure nikuna.

Kákkabiyag tu Pánnampalataya

¹⁶ Kaya awan kame manghina ti isip. Maski ni humina dán u bággi me ti lutaáy, ay tulos-tulos pade a bumegsák u ispirito me aldew-aldew.

¹⁷ Dipo u pághirap a nadanas me nadid, ay pangsandaliyan la sakay awan masiyadu a madágge. Dipo tukoy me a tehhod a inhanda a dakál a gantimpala u Diyos para nikame. Iye ay manatile a magpakahanggan sakay awan mapantayan.

¹⁸ Kaya awan me pahalagaan u bagay hide a ketan nan tu bagay hide a awan ketan. Dipo pansandaliyan la u bagay hide a ketan, pero awan ti kahád u bagay hide a awan ketan.