2 Corinto 3 - U Maganda A Baheta Ni Jesu-Cristo

U Tagapagserbi hide tu Bigu a Tipan

¹ Nadid, tu palagay moy beman ay páppuriyán me dámman i sadile miyáy? Awan kame konna tu agum a kailangan pa ti sulat para tanggapán moy oni sulat a gábwat nikam para tanggapán be tu agum a lugar.

² Hikamon u patunay me, a kumán a nakasulat dán tu puso me. Dipo u kákkabiyag moy ay kumán a sulat a matenggi sakay mabasa nu atanan a tolay.

³ Maliwanag a u biyag moy ay kumán a essa a sulat a gábwat ni Cristo a nesulat tu pamama-itan me. Nesulat iye, bakán a tu tinta nan tu Ispirito nu Diyos a biyag. Sakay bakán bi iye a nesulat tu natáppeng a bito nan tu puso nu tolay hide.

⁴ Makagi me u konna hod dipo tu págtiwala me tu Diyos tu pamamag-itan ni Cristo.

⁵ Ni tu sadile mi la, ay awan sapat u kakayanan me a gimitán iye; nan u Diyos u nángkaluub nikame ti kakayananan iye.

⁶ Inatádden na kame ti kakayanan para ipangaral u tungkul tu bigu na a tipan. Sakay i ipáppangaral miyan iye ay awan neayun tu nakasulat tu Kautusan nan tu Ispirito. Dipo u iyatád nu nakasulat a Kautusan ay kamatayan, pero u Ispirito ay mangatád ti biyag.

⁷ Nikuna iyatád u patakaran a nakasulat tu natáppeng a bito, kaguman a nehayag u demlag nu Diyos. Awan maileng nu Israelita hide u hupa ni Moises, kaya la iye a demlag ay limmipas. Nadid ni nángpeta u Diyos tu kapangyariyan na nikuna a iyatád na u Kautusan a nakapangatád ti kamatayan,

⁸ maspa u ipeta na a kapangyariyan ni magahikad dán u Banal a Ispirito.

⁹ Ni nángpeta u Diyos tu kapangyariyan na nikuna a iyatád na u Kautusan a nakapangatád ti kamatayan, maspa u ipeta na a kapangyariyan ni ibutan na dán u kasalanan nu tolay.

¹⁰ Dipo hina, makagi tam a u date a demlag ay awan dán dipo napalitan dán ti mas mademlag.

¹¹ Ni tehhod a kapangyariyan a impeta u Diyos tu páng-atád na tu Kautusan a limmipas maspa u kapangyariyan a ipeta na tu bigu a tipan a manatile hanggan-hanggan.

¹² Dipo ti pag-asa miyan iye, ay mabegsák u pággisipan me a ibaheta u upos nu Diyos.

¹³ Bakán kame a konna ni Moises a tinakáppan na u hupa na tánni awan ketan nu Israelita hide u kállipas ni demlagan itod.

¹⁴ U tatahoden, awan naintendiyan nu Israelita hide u kahulugan ni iye tu itod dipo mágkaigát u ulu de a kumán a te tumáttakáp tu isip de. Sakay hanggan nadid ay awan di palla naintediyan iye kada basaán de u date a kasunduwan dipo te tumáttakáp palla tu isip de. Sakay mawan la i takáppan ina, ni nákpágkaessa u essa a tolay ni Cristo.

¹⁵ Hanggan nadid, ay tehhod palla a tapoh u isip de kada basaán de u libro ni Moises dipo awan di iye naintendiyan.

¹⁶ Pero ni sumole u tolay sakay maniwala tu Panginoon, ay mawan u nakatapoh tu pággisipan na.

¹⁷ U Panginoon a nabanggit he ay u Banal a Ispirito, sakay ni hádya u Banal a Ispirito nu Panginoon, ay tehhod bi hod a kalayaan a gimitán u kagustuwan nu Diyos.

¹⁸ Sakay nadid ay nawan dán u tapoh tu isip tam, sakay netan dán nikitam u kapangyariyan nu Panginoon. I kapangyariyanan iye ay gábwat tu Panginoon a Banal a Ispirito. Siya u utay-utay a mangbagu nikitam, hanggan magin kapareho na kitam.