2 Corinto 13 - U Maganda A Baheta Ni Jesu-Cristo

Dimodyan a Paalala sakay Pángngumusta hide

¹ Nadid, iye u katállo ko a káangay hina nikam. Kinagi tu Kasulatan. “U ánya man a kaso ay kailangan a tehhod a duwwa oni tállo a magtistigu.”

² Gusto ko a huwayán a kagiyán tu nagkasala hide sakay tu agum pa a awan ti makaiwas tu disiplina ko. Kinagi ku dán iye nikuna kapenduwwa ko hina a káangay sakay huwayán ko iye nadid mentaras a awanák palla nakademát hina:

³ Gimitán ko iye tánni mapatunayan nikam a ti Cristo ay magupos tu pamamag-itan ko, dipo iye u áehyukán moy nikán. Awan siya mahina tu págdisiplina na nikam, nan makapangyariyan.

⁴ Dipo maski ni mahina siya nikuna ipako siya tu kudus, pero nabiyag siya tu kapangyariyan nu Diyos. Mahinaák be konna ni Cristo tu itod, pero dipo tu pákpagkaessa ko ni Cristo ay mabiyagák nadid tu kapangyariyan nu Diyos tánni mangaral nikam.

⁵ Suriyán moy u sadile moy tánni matukuyan moy a talaga ni tehhod kam a pánnampalataya ni Cristo; purbaan moy sadile moye. Awan moy beman tukoy a katoy nikam ti Cristo Jesus? Maliban dálla ni awan kam tunay a mánnampalataya.

⁶ Umasaák nikam, a áisipán moy a tunayák a apostol ni Cristo.

⁷ Pero idáddasal ko tu Diyos, a nakwa ay awan kam mággimet ti madukás, bakán a para paluwasán a tamaák, nan para makagimet kam ti maganda maski ni lumitaw a liwaták.

⁸ Dipo awan me maare a kontraán u tatahoden; nan u gimitán mila ay u tatahoden.

⁹ Dipo masayaák ni mahinaák sakay hikam ay bumegsák. Kaya, u idáddasal ko ay tulos-tulos kam a lumagu.

¹⁰ Insulat ko iye hide a bagay mentras awanák palla hina, tánni káddemát ko ay awan ko dán kailangan a magpakatapang tu pánggamit tu kapangyariyan a inyatád nikán nu Panginoon. Iye a kapangyariyan ay inyatád na nikán para gamitán tu kapiyyaan moy, bakán a tu kasidaan moy.

¹¹ Hanggan dálla he, kákkapatkákka, paalam dán nikam. Sikapán moy a lumagu kam sakay sunudán moy u payo ko hide; magkaessa kam, sakay mabiyag a tehhod a kapayapaan. Ni konna hod, u Diyos nu págmahal sakay kapayapaan ay makaguman moy.

¹² Magkumustaan kam bilang mátkaka ni Cristo. Kumustaán kam nu atanan a kákkapatkákka tam he.

^13-14 Nákwa ay hod nikam u atanan a págpapala a gábwat tu Panginoon tam a ti Jesu-Cristo, u págmahal nu Diyos sakay tu pákpágkaessa nu Banal a Ispirito.