2 Corinto 12 - U Maganda A Baheta Ni Jesu-Cristo

U Pangitain sakay Mensahe hide

¹ Nadid, dipo kailangan ko a mágmadakál, maski tukoy ko a awanák ti pakinabang tu pággimet ti iye, ay itulos-tulos ko. U kagiyán ko nadid ay u pangitain sakay mensahe hide a gábwat tu Panginoon.

^2-3 Tehhodák a kilala a essa a Kristiyano a neangay tu katállo a langet, sapulo ay ti áppat dán a taon u nakalipas. Awan ko la tukoy ni pangitain itod oni tunay a nangyare, u Diyos la u makatukoy.

⁴ Sakay nakasanigák hod ti bagay hide a awan kaya a mepaliwanag sakay awan maare a kagiyán tu maskin deya.

⁵ Mepágmadakál ko i karanasan kuwan iye, pero ni hikán la ay awanák ti mepagmadakál, maliban tu kahinaan ko hide.

⁶ Ni magmadakállák man ay bakánnák a kumán a awan ti tukoy, dipo tatahoden u kagiyán ko. Pero magpugáddák la ta umád ko a magisip u tolay hide a masmataasák kasera tu ketan de a ginimet ko sakay tu nasaneg de a págtoldu ko.

⁷ Para awan ko mehambug u makataka-taka a mensahe nu Diyos nikán, áy inatáddinák na ti kahirapan tu bággi ko a kumán a saet tu pilas ko. Pinakultaden na u essa a utusan ni Satanas a nagpahirap nikán, tán para awanák magmadakál.

⁸ Tállo ko a beses a indáddasal tu Panginoon a ibutan na iye pero,

⁹ kinagi na nikán, “U tulung ko ay sapat tu atanan a kailangan mo; mas lalu a mehayag u kapangyariyan ko ni mahina ka.” Kaya mas masayaák a ipagmadakál u kahinaan ko tánni pabegsákkánnák nu kapangyariyan ni Cristo.

¹⁰ Dipo ni Cristo ay awan nikán ti halaga ni mahinaák, insultuwán, pahirapan, usigán, sestiyán, sakay magtiis. Dipo ni nikanák a mahina ay sakaák be a pabegsákkán nu Diyos.

U Malasakit ni Pablo tu Taga-Corinto hide

¹¹ Kumánnák a essa a tolay a awan ti tukoy dipo tu pághambug ko, pero hikam u nángtoglad nikán a manggimet ti konna hina. Hikam nakwa u dapat a mangpure nikán, dipo maski awanák ti kabuluhan, awanák be medimodyan ti mágkalalakiyan ina hide a apostol kan.

¹² Buo ko a tiyaga a pinatunayan nikam a hikán ay tunay a apostol tu pamamag-itan nu makataka-taka hide sakay u agum pa a tanda.

¹³ Anya beman u lamang nikam nu agum a mánnampalataya? Awan, maliban tu awan ko pángngaged nikam tu maskin ánya. Patawadánnák moy ni essa itod a pagkukulang ko.

¹⁴ Handaák dán tu katállo ko a káangay hina pero konna tu date awanák makadágge nikam. Hikam u kailangan ko, bakán a u ari-arian moy. U dáddakál hide u dapat a magipun para tu anak de hide, bakán a u anák de hide u mag-ipun para tu dáddakál de.

¹⁵ Masayaák maski ni iyatád ko u atanan a hod nikán sakay maski ni iyalay ko u biyag ko para tu kapiyyaan moy. Ni minahal takam ti husto, bakin awanák moy mamahal ti konna hod?

¹⁶ Maski tukoy moy a awanák nakadággi maskin deya nikam, kinagi pade nu agum nikam a mautákkák sakay dáddayaán takam la.

¹⁷ Bakin? Pinagsamantalaan ku beman u kabaitan moy tu pamamag-itan nu pinaangay ko hina hide?

¹⁸ Nákpágguhunák ni Tito a umangay hina sakay pinákkuyog ko nikuna u essa tam a kapatkákka. Dinaya kam beman ni Tito? Awan! Dipo eessa a Ispirito u sássunudán me sakay eessa u layunin me.

¹⁹ Akala moy beman ay isuhog ko u sadile ko? Awan! Mahal me hide a kákkapatkákka, kagiyán ko nikam nadid tu atubang nu Diyos sakay bilang alipin ni Cristo, a atanan nu gággimitán ko ay para bumegsák u pánnampalataya moy.

²⁰ Dipo mággaisipánnák a bakay tu káangay ko hina ay te ketanák a awan ko gusto nikam sakay te ketan kam be a awan moy gusto nikán. Bakay u medemáttan ko ay dimaan, seniyan, iyamután, makasadile, págsidaan, metmetan, pághambug, sakay kaguluwan.

²¹ Mággaisipánnák a bakay káangay ko hina a huway ay mepasanikiyák tu atubang nu Diyos dipo nikam. Makay malungkuták ni tu káddemát ko hina, ay te sangan padi nikam a awan palla nagsise to ginimet de a madukás. Lalu dán tu pángngibábbey sakay tu pángngilállake.