2 Corinto 11 - U Maganda A Baheta Ni Jesu-Cristo

Ti Pablo sakay tu Magkukunware hide a Apostol

¹ Nadid, pagpasensiyaanák moy ni magupusák a kumán a tolay a awan ti tukoy. Sabagay páppasensiyaannák moy labe.

² Dakál u págmalasakit ko nikam konna tu págmalasakit nu Diyos. Konna kam tu essa a malinis a madiket a ingkasundu ko tu essa a lállake, ni Cristo.

³ Pero mabalisaák baka malasun u isip moy sakay meadeyo kam tu tapat sakay malinis a pánnalig ni Cristo, konna ni Eva a nalinlang nu biklat.

⁴ Dipo masaya kam a mangtanggap tu maskin deya a dumemát sakay mangaral ti iba a Jesus kesa tu impangaral me. Tinanggap moy u ispirito sakay adal a iba tu itáttoldu me nikam.

⁵ Tu palagay ko be ay awanák medimodyan ti mágkalalakiyan ina hide a apostol.

⁶ Maski ni awanák malalake tu pággupos, ay awanák be kinulang ti karunungan. Tu atanan a pagkakataun ay pinatunayan me iye nikam.

⁷ Awanák nák-aged ti upa nikuna impangaral ko nikam u Maganda a Baheta. Nagpakababaák tánni melangkaw kam. Makagi beman a kasalanan ko iye?

⁸ Iba a simbaan u mággaatáddán tu kailangan ko hide nikuna magserbiyák nikam; kumán ko hide a pakán takawan para la matulungan kam.

⁹ Sakay nikuna nagkulangák hina ay awanák nakadágge maskin deya man nikam dipo tinulunganák nu kákkapatkákka hide ti Macedonia. Sapul pa ti sapul ay iniwasan ko dán a makadággi nikam ti anya man a paraan sakay ina u gimitán ko hanggan-hanggan.

¹⁰ Mentaras a he nikan u tatahoden tungkul ni Cristo, ay awan ko iyemang i págmadakál kuway a iye maski ni hádya ti Acaya.

¹¹ Bakin ginimet ko iye? Dipo beman a awan takam mahal? Tukoy nu Diyos, a mahal takam a tahod!

¹² Sakay tulos-tulos ko a gimitán u gággimitán ko nadid tánni awan magkahod ti rason u mágbabahetaán hide a u pagserbi de ay konna tu gággimitán me.

¹³ Dipo iye hide a tolay ay bakán a tunay a apostol nan makándayaán la sakay magkukunware a apostol ni Cristo.

¹⁴ Sakay awan iye págtakaan! Dipo maski ti Satanas ay maare a magkunware a anghel nu Diyos.

¹⁵ Kaya awan pagtakaan a magkunware a alipin nu katuwiran u tagapagserbi hide ni Satanas. Kaya dumemát u aldew a maparusaan hide ayun tu atanan nu ginimet de hide.

U Tiniis hide a Hirap ni Pablo Bilang Apostol

¹⁶ Huwayán ko: dyan moy isipán a awanák ti tukoy. Pero ni konna hod u pangakala moy ay tanggapán ku dán tánni makapagmadakállák be a konna tu essa a awan ti tukoy.

¹⁷ U kákkagiyán ko a págmadakál ay bakán a gábwat tu Panginoon nan págmadakál nu tolay a awan ti tukoy.

¹⁸ Nadid, dipo makpal u magmadakál tungkul tu bagay hide a makamundu, hikán be ay dapat a magmadakál.

¹⁹ Dipo págtatiyagaan moy u awan hide ti tukoy, palibhasa a mágkalalaki kam.

²⁰ U tatahoden, págtatiisan moy la a alipinán dikam, maski ni lokuwán dikamon, áagiwan ti kayamanan, badit-baditán dikam sakay ipasanike ay tiisán moy pade hide!

²¹ Makasani-sanike man, aminán ko a mahinaák ngane dipo awan ko kaya a gimitán ina! Pero ni tehhod a magmadakál ay makapagmadakállák be maski ni kumánnák a essa a awan ti tukoy.

²² Ipagmadakál di beman a Judio hide, oni Israelita hide, sakay kaguman tu lahe ni Abraham? Hikán be.

²³ Tukoy ko a kumánnák dán a essa a magaheng, pero ni kagiyán de a tagapagserbi hide ni Cristo, mas malalakeyák a tagapagserbi ni Cristo nan hide. Susubra u págpagud ko nan hide; sangan a besesák a nepireso, nabálbág sakay pirme a te áng-áng ti kamatayan.

²⁴ Pumenlimmaák a makatanggap ti tállo a pulo ay ti siyam a latigu a gábwat tu Judio hide.

²⁵ Pumentállo ko a nadanas u bálbág nu Romano hide, pumensan a binatikal. Pumentállo a mehombak u barko a sássakayan ko, saldiwák sakay sagibi a palatak-latak tu diget.

²⁶ Tu madalas ko a págbiyahe ay nadanas ko u iba-iba a delikadu a kalagayan: tu dilikadu a dinom, tu mágbabano hide, tu kalugar ko hide a Judio sakay tu Hentil hide. Tu dilikadu hide a banuwan, paparang, tu diget, sakay tu tolay hide a magkukunware a mánnampalataya.

²⁷ Nadanas ko be u matindi a hirap sakay pagud, pirme a magpuyat, matindi a aláp sakay uwaw. Nagdanasák ti dágnen dipo awanák ti mealikábkáb.

²⁸ Maliban tu agum pa a karanasan a awan ko nabanggit, áisipán ko pa aldew-aldew u mánnampalataya hide.

²⁹ Ni tehhod a manghina ay karamayák de; sakay ni tehhod a nagkasala, grabi u pághirap ni puso kuwáy.

³⁰ Ni magmadakállák ay mas maganda pa ni ipagmadakál ko u kahinaan ko hide.

³¹ Awanák magbule-bule. Tukoy ina nu Diyos sakay Ama nu Panginoon a ti Jesus. Puriyán u ngahan na a awan ti kahád.

³² Nikuna hedák ti Damasco ay pinabantay nu gubernador a sakup ni Hare Aretas u pintuan nu banuwan tánni ipadakáppák na.

³³ Pero inyasákkák nu kaguman ko hide tu kumán a balulang sakay intostosák de tu dilupot nu pader kaya nakaginanák.