2 Corinto 10 - U Maganda A Baheta Ni Jesu-Cristo

Impagtanggul ni Pablo u Págserbi Na

¹ Nadid, hikán ti Pablo a u kagi nu agum a mapagpakumbaba tu atubang moy pero matapang ni adeyo, mákkekakagbiyák nikam alang-alang tu kapakumbabaan sakay kabaitan ni Cristo.

² Ipákpágguhon ko nikam a dyanák moy pilitán a magupos ti masaket káddemát ko hina. Dipo handaák a umatubang sakay pagupusan u tolay a nagkagi nikam a makamundu kan u kákkabiyag me.

³ Dipo maski ni tolay kami la ay awan kame mákpaglaban ayun tu pámmalakad ni munduway.

⁴ Dipo u armas me ay bakán a pangmundu nan u kapangyariyan nu Diyos a makapangsida tu kumalaban hide nikuna sidaán me u liwat a katuwiran.

⁵ Sidaán me u bawat katuwiran a mapagmataas a manghadlang tu pángtengge nu tolay tu Diyos, sakay pasukuwán me u atanan a áisipán de hide tánni sumunud hide ni Cristo.

⁶ Ni matukuyan mi dán a masássunudán kam, handa kame dán a magparusa tu atanan a awan sumássunud.

⁷ U problema nikam ay u panluwas la u áilingan moy. Tehhod hina a tolay a magkagi a hide kan ay tagapagserbi ni Cristo, ni konna hod ay dapat dibe a isipán a maski hikame ay hed ni Cristo.

⁸ Dipo maski susubra dán u págmadakál ko tu kapangyariyan a inyatád nu Diyos nikán ay awanák masanike dipo iye ay pángpasibát tu pánnampalataya moy bakán a para tu kákkepahamak moy.

⁹ Dyan moy isipán a pangpakanteng la u sulat ko nikam.

¹⁰ Dipo kagi nu agum ay “Tu sulat la siya a matapang; pero tu harapan ay awan ti magimet.”

¹¹ Dapat a matukuyan ni nagkagiyán iye a tolay a ni ánya u insulat me nadid a adeyo kame, ay itod labe u gimitán me ni kaharap moy kame dán.

¹² Awan ko gusto a ibilang oni ipareho u sadile ko tu agum a magmadakál tu sadile de. Awan ti tukoy i tolayan ina hide! Dipo u sadile dila u ginimet de a sukatan sakay parisan.

¹³ Pero awan kame lummampas tu kahád a inyatád nu Diyos nikame, u tarabaho a inlaan na nikame, kaguman dán u pángngaral me nikam.

¹⁴ Bakán a essa a págmadakál ni kagiyán me a hikam u nagin bunga nu gawain me dipo ina u tatahoden. Awan beman hikame u dipalongo a immangay hina nikam, a tawed u Maganda a Baheta tungkul ni Cristo?

¹⁵ Awan me ipagmadakál u nagpagudan nu agum. Nan asaan me a tu káttibay nu pánnampalataya moy, ay lumawak palla u gawain me nikam, pero awan kame lummampas tu impagimet nu Diyos nikame.

¹⁶ Tánni ipangaral me u Maganda a Baheta tu banuwan hide tu palebut moy a awan padla ti nagtoldu. Dipo umád me a angkinán u nagpagudan nu agum.

¹⁷ Konna tu kinagi tu Kasulatan, “Ni gusto a magmadakál nu deya man, u Panginoon u ipagmadakál na.”

¹⁸ U parangalan nu Diyos ay u tolay a karapat-dapat tu kaluuban na bakán a u mánglangkaw tu sadile na.