2 Corinto 1 - U Maganda A Baheta Ni Jesu-Cristo

¹ Gábwat iye a sulat nikán a ti Pablo a apostol ni Jesu-Cristo, ayun tu kaluuban nu Diyos sakay gábwat tu kapatkákka tam a ti Timoteo. I sulatan iye ay para tu mánnampalataya hide ti Corinto sakay tu mánnampalataya hide a mágyan ti buo a Acaya:

² Pagpalaán kam nakwa sakay magkahod ti kapayapaan a gábwat tu Diyos a Ama tam sakay tu Panginoon a ti Jesu-Cristo.

Nagpasalamat ti Pablo

³ Puriyán tam u Diyos sakay Ama nu Panginoon tam a ti Jesu-Cristo, siya u maháhhabagán a Ama. Siya u Diyos a pinaggábwatan nu atanan tulung.

⁴ Pinabegsák na kitam tu kalungkutan tam hide para makatulung kitam be tu maglungkut hide, tu pamamag-itan nu kasayaan a natanggap tam tu Diyos.

⁵ Dipo ni sa kodya ti kadágge u táttiisán me a hirap tu pákpágkaessa ni Cristo, ay konna bi hod u kasayaan a natanggap me a gábwat nikuna.

⁶ Ni maghirap man kame, ay para iye tu kasayaan sakay tu kaligtasan moy. Ni paha-pahaán kame, ay mapaha-paha kam be sakay bumegsák kam be tánni matággád moy u kahirapan a dáddanasán moy a konna nikame.

⁷ Kaya matibay u pag-asa me para nikam dipo tukoy me a ni kodya a nagin kaguman mi kam tu pághirap ay konna labi hod kaguman mikam tu kasayaan me.

⁸ Kákkapatkákka hide, ibaheta mi nikam u kahirapan a nadanas me ti Asia. Tunay ti kadágge iye a nadanas me, akala me ni matay kami dán.

⁹ U akala me ay dummemát dán u odas me. Pero nangyare itod tánni awan kame magtiwala tu sadile me nan tu Diyos a mangbiyag a huway tu patay hide.

¹⁰ Inligtas na kame tu kákkatay sakay tulos-tulos a ilálligtas, sakay umasa kame a tulos-tulos padi u pangligtas na nikame,

¹¹ tu tulung nu dasal moy hide. Ni konna hod, ay makpal u magpasalamat nikuna dipo tu págpapala na nikame bilang tábbeg tu dasal nu kakpalan.

Nagbagu ti Plano ti Pablo

¹² Essa a bagay u mepagmadakál me: nabiyag kame ti matuwid sakay tapat tu atubang nu atanan a tolay, lalu dán nikam. Nagimet mi iye dipo tu kagbi nu Diyos bakán a tu pamamag-itan nu karunungan nu mundu. Sakay mapatunayan nu isip me a tatahoden u ipagmadakál me.

¹³ U insulat mila nikam ay u kaya moy a basaán sakay intendiyán kaya umasaák, kaya umasaák a tu dimodyan a aldew ay maintendiyan moy kame ti husto.

¹⁴ Para káddemát nu aldew a kássole nu Panginoon Jesus, ay mepagmadakál moy kame, a konna tu pángmadakál me nikam.

¹⁵ Dipo ti pánniwala kuwan iye, ay binalak ko a penduwaák hina a umangay tánni maduble u págpapala moy.

¹⁶ Nagplanuwák a humoyot pa hina káangay ko ti Macedonia. Sakay tu kássole ko, ay humoyuták dámman hina tánni matulunganák moy tu págbiyahe ko ti Judea.

¹⁷ Dipo beman a konna he u plano ko ay makagi moy dán a pabagu-baguwák ti isip? Akala moy beman a pabagu-bagu u plano ko konna tu gággimitán nu tolay a makamundu, a kagiyán na nadid a, “On” sakay mamaya-maya ay “Awan?”

¹⁸ Ni kodya a tapat u Diyos, ay konna bi hod u upos ko nikam: u “On” ko nadid ay manatile a “On.”

¹⁹ Hikame ay di Silvano sakay Timoteo ay nangaral nikam tungkul ni Jesu-Cristo a anak nu Diyos. Sakay tukoy moy a ti Cristo ay tapat tu upos na. Talaga a tupadán na u panantu na.

²⁰ Dipo atanan a pananto nu Diyos ay natupad ni Jesu-Cristo. Kaya ngane makagi tam a tapat u Diyos sakay iye ay makapangatád ti kapuriyan nikuna.

²¹ U Diyos u nangpatibay nikame sakay nikam tu pákpágkaessa tam ni Cristo, sakay siya be u nangpile nikitam.

²² Tinatakan na kitam bilang kao na tu pamamag-itan nu pángkaluub na nikitam tu Ispirito na. Iye u patunay a matanggap tam u atanan a impanantu na.

²³ Tistigu ko u Diyos, tukoy na u katoy tu puso ko a kayaák a awan immangay hina ti Corinto ay dipo gusto takam a atádden ti pagkakataun a magsise tu mágkadukás moy hide a gimet. Sakay para awan takam makagiyan.

²⁴ Bakán a gusto mi kam a págdipalonguwan tu pánnampalataya moy nan gusto mi la a tumulung tánni magin masaya kam tu pánnampalataya moy. Dipo matatag kamon tu pánnampalataya moy hina.