1 Timoteo 5 - U Maganda A Baheta Ni Jesu-Cristo

U Tungkulin tu Kapareho a Mánnampalataya

¹ Nadid, u mágkatanda hide niko a lállake ay dyan mo págngállan nan pákpágguhunan mo hide a konna tu pángnguhon mo nama mo. Ibilang mo a wáwwadi mo u áolito hide,

² sakay ituring mo a ina u mágkatanda hide a bábbey. Mákpággagum ka tu mámmadiket hide a tehhod a kalinisan, ibilang mo hide a konna tu wáwwadi mo.

³ Igalang moy sakay tulungan u bilo hide a bábbey a awan dán ti maasaan.

⁴ Pero ni tehhod a anak oni apo u bilo a bábbey ay hide dapat u purumero a magserbi nikuna. Bilang gante tu dáddakál de hide, sa iye u kasayaan nu Diyos.

⁵ U tatahoden a bilo a bábbey ay u mággeessa dálla ti kákkabiyag sakay u Diyos dálla u áasaan na, kaya makándasalán siya aldew ay ti gibi.

⁶ Pero ni u bilo ay magbabalang ti kákkabiyag ay mebilang dán siya a patay maski biyag palla siya.

⁷ Ipatupad mo nide iye hide a utus tánni awan ti mepintas nide u agum.

⁸ Ni deya man u awan mangpospos tu kákkapatkákka na, lalu dán tu pamilya na ay immadág ti pánnampalataya, dipo mas madukás pa u ugali na nan tu awan ti pánnampalataya.

⁹ U isale mo tu listaan nu bilo hide a bábbey a dapat a tulungan ay kailangan a awan kumulang ti ánnám a pulu a taon u idad na sakay pumensan la a nákkabanga.

¹⁰ Sakay kailangan a kilala siya dipo tu mágkaganda na a gimet. Napadakál na u anak na ti maganda a paraan, sakay masaya siya a mágpatulos tu bilay na. Nagserbiyan na u pinile hide nu Diyos, tumáttulung tu tehhod a kailangan, sakay inlaan na u biyag na tu pággimet ti maganda.

¹¹ Dyan mo páklista u anak palla a bilo, dipo kákkasoh de a mákkabanga a huway ay mapabayan de u págserbi de tu Diyos.

¹² Ni magkakonna hod ay te panagutan hide ta sinida de u pananto de ni Cristo.

¹³ Bakán la a itod nan magin tamad pa hide sakay mamilaybilay a mákpággauhon. Bakán la hide a tamad nan magin mametmet pa sakay mák-alam tu biyag nu agum sakay mággistorya tu awan dapat a iyistorya.

¹⁴ Kaya para nikán ay mas maganda pa ni mákkabanga hide a huway sakay magenak hide. Sakay alagaan u sadile de a pamilya tánni awan ti makagi a madukas u kumontara hide nikitam.

¹⁵ Kinagi ko iye dipo tehhod dán a sangan a bilo a netawtaw sakay naakit ni Satanas.

¹⁶ Ni u bábbey hide a mánnampalataya ay tehhod a kákkapatkákka a bilo ay kailangan hide i mangpospusay. Tánni u bilo hide a talaga a awan ti maasaan u pospusán dálla nu simbaan.

¹⁷ U pinuno hide a mangasiwa ti mahusay ay dapat la a tumanggap ti pággalang sakay madagdagen u suweldu de lalu dán u mángngaral hide sakay mágtoldu tu upos nu Diyos.

¹⁸ Dipo nakasulat tu Kasulatan, “Dyan mo busalan u baka mentaras a pagággik mo, nan pabayan mo a kuman a tagpensan.” Nakasulat be a, “U magtrabaho ay dapat upaan.”

¹⁹ Sakay dyan mo paniwalaan u reklamo kontara tu pinuno ni awan ti mangtistigu a duwwa oni tállo.

²⁰ Pero nite pinuno a tulos-tulos a mággagimitán ti kasalanan ay pagkagiyan mo tu atubang nu kakpalan, tánni meántingan u agum a maggimet ti kasalanan.

²¹ Iyutus ko niko tu atubang nu Diyos, sakay ni Jesu-Cristo sakay tu anghel na hide a ipatupad mo iye a awan ti panigan.

²² Dyan mo basta itupo i kamát muwe tu maskin deya la para magin pinuno, nan tukuyán mo pa u pagkatolay na. Magingat ka a awan mesale tu kasalanan nu agum. Magtulos-tulos ka a awan ti dangát.

²³ Bakán a puro la a dinom i inumán muway: nan uminom ka be ti tágsabadit a alak dipo ti tiyan muwe a lagi a magsaket.

²⁴ Tehhod a tolay a u kasalanan de ay hayag dán bagu a mahatulan, pero u kasalanan nu agum ay tu dimodyan dán a mehayag.

²⁵ Konna labe hod u agum a mágkaganda a gimet ay alisto a ketan; pero ni awan man mapansin a agad ay ketan labe iye dipo awan iye metagu ti atakdug a panahun.