1 Timoteo 3 - U Maganda A Baheta Ni Jesu-Cristo

U Pinuno hide tu Simbaan

¹ Nadid, tatahoden i kakagiyanan iye: Nitideyaman u masoh a magin pinuno tu simbaan ay maganda u hangarin na dipo mahalaga i tungkulinan ina.

² Pero u essa a pinuno ay kailangan a awan ti kapintasan, essa la u kabanga na, kaya a magpugád tu sadile na sakay awan pabigla-bigla. Kailangan a kagalang-galang, mágpatulos tu bilay na, sakay malalake a magtoldu.

³ Sakay awan siya máglalasingán, awan mágbálbág nan masássohán ti kapayapaan, awan mákpágdadima sakay awan be masássohán ti pilak.

⁴ U sadile na a pamilya ay kailangan a mapangasiwaan na ti maganda. U anak na hide ay dapat a gumalang sakay sumunud nikuna.

⁵ Dipo ni awan na kaya a mapangasiwaan u sadile na a pamilya, kodya na a mapangasiwaan u simbaan nu Diyos?

⁶ Kailangan a nalay dán siya ti pánnampalataya, dipo ni awan ay bakay magin hambug siya sakay maparusaan a konna ni Satanas.

⁷ Kailangan be a igaggalang siya nu awan hide ti pánnampalataya tánni awan siya mamansaan sakay tulos a maekhutan ni Satanas.

U Tagapangasiwa hide

⁸ Konna be tu dyakuno hide tu simbaan, kailangan ay magin kagalang-galang hide, awan mabule, awan máglalasing, sakay awan masássohán ti pilak.

⁹ Kailangan a matapat hide tu pánnampalataya a impakapos-pos nikitam nu Diyos sakay tehhod a malinis a isip.

¹⁰ Sakay kailangan pa hide a purbaan. Sakay ni mapatunayan a karapat-dapat hide, maari dán hide a idátton, bilang dyakuno.

¹¹ U kákkabanga di be hide ay kailangan a mágkatino, awan hide mametmet nan mapagpugád ti sadile sakay matapat tu atanan a bagay.

¹² Kailangan be a essa la u kabanga nu dyakuno sakay mapangasiwaan na ti maganda u pamilya de sakay maayus u pagdisiplina na tu anak na.

¹³ Dipo u dyakuno nu pinuno tu simbaan a matapat tu tungkulin na ay igalang nu atanan. Sakay buo a tiwala de a ipahayag u pánnampalataya de ni Jesu-Cristo.

U Lihim nu Pánnampalataya Tam

¹⁴ Umasaák a awan magmalay ay magketa kitamon. Pero insulat ku padi i bilinan hidenye niko ta

¹⁵ ni mara awanák makademát a pagdaka ay tukoy mu dán u dapat a ugale nu tolay hide a kabilang dan tu pamilya nu biyag a Diyos. Dipo intiwala nikitam u tatahoden tungkul ni Cristo a kuman a hikitam u adigi sakay pundasyon nu tatahoden.

¹⁶ Tunay ngane a maganda u impakapos-pos nu Diyos nikitam a tama a pannampalataya: Ti Jesus ay nehayag nikitam nikuna nagin tolay siya, sakay pinatunayan nu Banal a Ispirito a siya ay matuwid sakay netan nu anghel hide. Sakay nadid ay nepahayag dan tu buo a mundu u tungkul nikuna sakay tehhod a simmampalataya. Sakay siya ay inyontok ti langet ni hadya siya a maghare.