1 Timoteo 2 - U Maganda A Baheta Ni Jesu-Cristo

Payo Tungkul tu Págdasal

¹ Nadid, u pinakadipalongo tu atanan a ipákpágguhon ko nikam ay ipagdasal moy u atanan a tolay. Iagum moy hide tu agidán moy hide, pákkekagbi, sakay págpasalamat.

² Ipagdasal moy be u hare hide sakay tu atanan a te katungkulan tánni magkahod kitam ti tahimik a biyag sakay mapayapa, kagalang-galang sakay maka-Diyos.

³ Iye u maganda sakay makasaya tu Diyos a Tagapagligtas tam.

⁴ Gugustu na a maligtas u atanan a tolay sakay makatukoy tu tatahoden,

⁵ a tehhod a eessa a Diyos sakay tehhod be a eessa a mángtaknág tu tolay tu Diyos, u tolay a ti Jesu-Cristo.

⁶ Siya u náng-atád tu sadile na a biyag tánni tubusán u atanan a tolay tu kasalanan de hide. Iye ay nangyare tu tama a panahun a intakda nu Diyos a nangpatunay tu kagustuwan nu Diyos a maligtas u atanan a tolay.

⁷ Dipo he ay napiliyák a tagapagbaheta, apostol, sakay tagapagtoldu ti pánnampalataya sakay tu tatahoden tu Hentil hide. Tatahoden i kagiyán kuwáy, awanák magbule-bule.

⁸ Kaya gusto ko a manalangin u lállake hide tu bawat pággipun-ipun, sakay ni magdasal hide ay maari de a iyontok u kamat de bilang patunay a malinis u paggisipan de sakay awan ti hinanakit oni pamágdadema.

⁹ Kagiyan kube nikam a u babbey hide ay dapat awan magbadu ti makatokso nan u dapat ay magbadu hide ti marangal. Dapat dibe a iwasan u subra-subra a paggayus ti buuk sakay pagsulot ti ginto oni perlas, sakay mágkamahal a badu.

¹⁰ Nan u mágkaganda la a gimet u nebagay tu bábbey hide a maki-Diyos.

¹¹ U bábbey hide ay kailangan a tahimik a magadal sakay pasakup, tu panahun nu págtoldu.

¹² Awan ko hide pakultadan a magtoldu oni pagdipalonguwan u lallake hide nan dapat hide a tumahimik.

¹³ Dipo ti Adan u purumero a nilalang bagu ti Eva.

¹⁴ Sakay bakán a ti Adan u nalinlang. Nan u babbey u nalinlang sakay nagkasala.

¹⁵ Pero maligtas u bábbey tu pággenak na ni magtulos-tulos siya tu pánnampalataya na, págmahal, pagin banal sakay malinis a kákkabiyag.